އައްޑޫއިން ކުޑަކުއްޖަކު ހިމަބިއްސަށް ޕޮޒިޓިވްވެއްޖެ
ހިމަބިއްސަކީ ރާއްޖޭން ނައްތާލެވިފައިވާ ބައްޔެއް
އައްޑޫ އެކުއެޓޯރިއަލް ހޮސްޕިޓަލް
އައްޑޫއިން ކުޑަކުއްޖަކު ހިމަބިއްސަށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނި ގޮތުގައި ހޯމަ ދުވަހު އައްޑޫއިން ކުޑަކުއްޖަކަށް ހިމަބިހި ޖެހިފައިވާއިރު ހިމަބިހިކަމަށް ބެލެވޭ އިތުރު ކޭސްއެއް ވެސް ވަނީ ފެނިފައެވެ. އެއީ ހިމަބިިހިކަން ޔަގީންކުރުމަށް ސާމްޕަލް ނަގައި ޓެސްޓު ހެދުމުގެ މަސައްކަތް ކުރަމުންދާ ކަމަށް ވެސް އެ އިދާރާއިން ބުނެއެވެ.
އެޗްޕީއޭއިން ބުނި ގޮތުގައި މި ދެ ކޭސްއަކީ ވެސް ކުޑަކުދިންގެ ކިބައިން ފެނިފައިވާ ދެ ކޭސްއެވެ. އެހެން ނަމަވެސް، މި ދެކުދިންގެ ގައިން ބަލި ފެތުރޭ މުއްދަތު ފާއިތުވެފައިވާތީ މި ދެ ކުދިންގެ ފަރާތުން މި ވަގުތު އިތުރަށް ބަލި ފެތުރުމުގެ ފުރުސަތު ކުޑަކަމަށް ވެސް އެ އިދާރާއިން ބުނެއެވެ.
ހިމަބިއްސަކީ ރާއްޖޭގައި ނައްތާލެވިފައިވާ ބައްޔެއް ކަމަށްވުމާއެކު މި ބަލީގެ އެންމެ ކޭހެއް ފެނުނު ކަމިގައި ވިޔަސް އެ ބެލެވެނީ އައުޓްބްރޭކެއްގެ ގޮތުގައި ކަމަށް އެޗްޕީއޭއިން ބުނެއެވެ. އަދި މި ފަދަ ހާލަތްތަކުގައި އަމަލުކުރަން ހަމަޖެހިފައިވާ އުސޫލުގެ މަތިން، ކޮންޓެކްޓް ދެނެގަތުމާއި ބަލި ޖެހެން މެދުވެރިވި ސަބަބު ދެނެގަތުމުގެ މަސައްކަތް އެޗްޕީއޭގެ ލަފާގެ މަތިން އައްޑޫ އިކުއިޓޯރިއަލް ހޮސްޕިޓަލުން ކުރަމުން ދާ ކަމަށް ވެސް އެ އޭޖެންސީން ބުނެއެވެ. އަދި ވަރަށް އަވަހަށް ވެކްސިން ދޭން ޖެހޭ ފަރާތްތަކަށް ވެކްސިން ދިނުމުގެ މަސައްކަތް ވެސް ކުރާނެ ކަމަށް ބުނެއެވެ.
ހިމަބިހީގެ މައިގަނޑު އަލާމާތްތަކަކީ ހުން އައުމާއެކު ހަމުގައި ރަތް ބިހިތަކެއް ނެގުމެވެ. މީގެ އިތުރުން ކެއްސުން، ނޭފަތުން އަރިދަފުސް ފޭބުން އަދި ލޯ ރަތްވުން ފަދަ އަލާމާތްތައް ވެސް ބައެއް މީހުންގެ ފަރާތުން ފެނުން އެކަށީގެންވެއެވެ. އެހެންކަމުން، އެއްވެސް ފަރާތަކަށް މިފަދަ އަލާމަތް ތަކެއް ފެނިއްޖެ ނަމަ ލަސްނުކޮށް ސިއްހީ ހިދުމަތްތެރިއެއްގެ ލަފާ ހޯދުމަށް އެޗްޕީއޭއިން އިލްތިމާސްކުރެއެވެ.
