"ކޮންމެ ރޯދަ މަހަކަށް ދަރިއަކު ގެއްލޭ"

މައިވަންތަ ލޯބީގެ މިސާލުތަކުގެ ވާހަކައަކީ ދައްކައި ކޮޅުންލާނެ ވާހަކަތަކެއް ނޫނެވެ. އެ ވާހަކަތައް ދެއްކުމަކީ، އެ މައިން ވަމުންދާ ގުރުބާނީގެ ބަދަލާ ގާތްވެސް ނުކުރާނެ ކަމެކެވެ. އެފަދަ ގުރުބާނީއެއް ވަމުންދާ އެއް އަންހެނަކީ، ސޫރިޔާގެ ޖަންދާރީސްގައި ތޮއްޖެހިފައިވާ ޓެންޓެއްގެ ތެރޭގައި އިން، އުމުރުން 60 އަހަރުގެ ޚަދީޖާ އަލް-ހަސަނެވެ. މިހާރުވެސް ޚަދީޖާ އަވަދިނެތި އުޅެމުން އެ ދަނީ، އޭނާއަށް މާމަކިޔާ 6 ދަރިންގެ ރޯދަ ވީއްލުމުގެ ކަންކަން ހަމަޖައްސައިދިނުމަށެވެ.

އެތައް އަހަރަކަށް ސޫރިޔާގައި ކުރި ވަރުގަދަ ހަނގުރާމައާއި، ދާދި މިދާކަށް ދުވަހު، ތުރުކީވިލާތާއި ސޫރިޔާގެ ބޯޑަރަށް އައި ބާރުގަދަ ބިންހެލުމުގެ ހާދިސާއަށްފަހު، މިއަދު ޚަދީޖާއާއެކު ވަނީ ހަމައެކަނި އެ 6 މާމަ ދަރިންނެވެ. ހަނގުރާމައާއި ބިންހެލުމުގައި، ޚަދީޖާގެ 4 ދަރިން ވަނީ މި ދުނިޔެ ދޫކޮށްފައެވެ. ދިރިއުޅެމުން ދިޔަ ގެއެއް ނެތެވެ.

ޚަދީޖާގެ އުފަން ދަރިންގެ ތެރެއިން 2 ކުދިން މަރުވީ ދާޚިލީ ހަނގުރާމައިގެ ތެރޭގައެވެ. 3 ވަނަ ދަރިފުޅަށް ވީނުވީއެއް ނޭނގި ގެއްލިފައިވާއިރު، 4 ދަރިންގެ ތެރެއިން ބާކީ ހުރި މުހައްމަދު މި ދުނިޔެ ދޫކުރީ ފެބުރުއަރީ މަހުގެ ބިންހެލުމުގެ ކާރިސާގައެވެ.

މިއަދު ޚަދީޖާ ދިރިއުޅެމުން ދަނީ ބިންހެލުމުގެ ކާރިސާގައި ފުރާނަ ސަލާމަތްވި މީހުންނަށް ޚާއްޞަކޮށްގެން ކޮށްގެން ޖަންދާރީސްގައި އަޅާފައިވާ ވަގުތީ ހިޔަލެއްގައެވެ.

ރޯދަ މަހަކީ ޚާދީޖާގެ ހިތަށް އިންތިހާ ދަތި ކުރުވާ މަހަކަށް ވަނީ ވެފައެވެ. ރޯދަ މަހަކީ އާންމު ގޮތެއްގައި އާއިލާތަކުން އެއްތަންވެ، އުފަލުގައި ވަގުތުތަކެއް ހޭދަކުރާ ދުވަސްވަރަކަށް ވާއިރު، އޭނާގެ ދަރިން މި ދުނިޔޭގައި ނެތުމުގެ ފަޅުކަން އިންތިހާއަށް ކުރެވެއެވެ.

އެއީ ހަމަ އެކަނި މި ރޯދަ މަހުގެ ހާލެއް ނޫނެވެ. މިދިޔަ ދެތިން އަހަރު ދުވަހުވެސް ޚަދީޖާގެ ހާލަކީ އެއީއެވެ.

ފެބުރުއަރީ 6 ވަނަ ދުވަހުގެ ބިންހެލުމުގެ ކާރިސާއަކީ އަދުގެ ތާރީޚުގައި ތުރުކީވިލާތަށް ކުރިމަތިވި އެންމެ ބޮޑު، ގުދުރަތީ ކާރިސާއެވެ. އެ ކާރިސާގައި ތުރުކީވިލާތާއި ސޫރިޔާއިން މަރުވި މީހުންގެ ޢަދަދު 56000އަށްވުރެ މައްޗަށް އަރާފައިވާއިރު، ލިބުނު ގެއްލުމުގެ އަގު އެތައް ބިލިއަން ޑޮލަރަކަށް އަރައެވެ.