މުސާރަ ބޮޑުކަމުން ޗެލްސީގެ ކޯޗު މީޑިއާގެ ސަމާލުކަމަށް

މުސާރަ ބޮޑުކަމުން ޗެލްސީގެ ކޯޗު ގްރެހަމް ޕޮޓާ އަނެއްކާ ވެސް މީޑިޔާތަކުގެ ސަމާލުކަމަށް އައިސްފި އެވެ.

ނަތީޖާތައް އެހާ ރަނގަޅުނުވުމުން ކިރިޔަ ކިރިޔާ ވަޒީފާ ސަލާމަތްވަމުން އަންނަ ކޯޗަށް އަހަރަކު 11 މިލިއަން ޕައުންޑްގެ މުސާރައެއް ލިބޭނެ ކަމަށް އިނގިރޭސި ނޫސްތަކުން ބުނެ އެވެ. މިއީ ޔޫރަޕުގެ އެންމެ ގަދަ ބައެއް ކޯޗުންނަށް ލިބޭ ވަރަށްވުރެ ވެސް ބޮޑު މުސާރައެކެވެ. މިކަން ފަޅާ އަރުވާލީ ފްރާންސްގެ ނޫސްތަކުންނެވެ. އެމީހުން ބުނާ ގޮތުގައި އެންމެ ބޮޑު މުސާރަލިބޭ ހަތަރު ކޯޗުންގެ ތެރެއިން ތިން ކޯޗުން މަސައްކަތް ކުރަނީ އިނގިރޭސި ޕްރެމިއާ ލީގުގަ އެވެ. ޕޮޓާ އަށް އަހަރަކު 11 މިލިއަން ޕައުންޑް ލިބޭނަމަ ކޮންމެ ހަފުތާއަކު 229180 ޕައުންޑް އޭނާ ގެޔަށް ގެންދާނެ އެވެ.

ފްރާންސްގެ ނޫސްތަކުން ބުނާ ގޮތުގައި ޕޮޓާއަށްވުރެ ގިނައިން މުސާރަ ލިބެނީ އިނގިރޭސި ޗެމްޕިއަން މެންޗެސްޓާ ސިޓީގެ ކޯޗު ޕެޕް ގާޑިއޯލާ އާއި ލިވަޕޫލްގެ ކޯޗު ޔާގެން ކްލޮޕާއި ސްޕޭނުގެ އެތްލެޓިކޯ މެޑްރިޑްގެ ކޯޗު ޑިއެގޯ ސިމިއޯނީ އަށެވެ.