ދައުލަތުން ސެކިއުރިޓީ ދޭ ބޭފުޅުން މަސްތުވާތަކެތީގެ މައްސަލަތަކުގައި ހިމެނޭ ކަމަށާއި، އެފަދަ މައްސަލަތައް ހައްލުކުރަން ދިމާވާ އެންމެ ބޮޑު އެއް ގޮންޖެހުމަކީ އެއީ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.

ރޮޒެއިނާ އެފަދައިން ވިދާޅުވީ, މަސްތުވާތަކެތި ބޭނުންކުރާ މީހުންނަށް ފަރުވާ ހޯދުން ފަސޭހަކޮށްދިނުމަށް ގޮވާލައި ރައްޔިތުންގެ މަޖިލީހަށް ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށަހަޅުއްވާފައިވާ ގަރާރަށް ބަހުސްކުރައްވަމުންނެވެ. މަސްތުވާތަކެތީގެ ވަބާއަކީ މި ފަސް އަހަރު އެކަނި ރާއްޖެއަށް ދިމާވެފައިވާ ކަމެއް ނޫންކަން ފާހަގަކުރައްވައި ރޮޒެއިނާ ވިދާޅުވީ، އެ ވަބާއަކީ މި ގައުމުގައި އެތައް ދުވަހެއް ވަންދެން އޮތް މައްސަލައެއް ކަމަށެވެ. އަދި އެކަމުގައި ގައުމުގެ މުއައްސަސާތަކާއި އިސް ބައެއް ފަރާތްތަކުގެ ބައިވެރިވުން އޮތްކަމަށް ރޮޒެއިނާ ވަނީ ވިދާޅުވެފައެވެ. އަދި މަސްތުވާތަކެތީގެ މައްސަލަތައް ހައްލުކުރަން ހަދާފައިވާ ގާނޫނުތައް ތަންފީޒުކުރަން އަދިވެސް ވަރަށް ގިނަ ގޮންޖެހުންތައް ހުރިކަމަށް އޭނާ ވިދާޅުވިއެވެ. މި ސަރުކާރުގައި ސަރުކާރުގެ ތެރޭގައި ޕޮލިސީތަކާ ހިލާފު މީހުން ތިބުމަކީ ބޮޑު ގޮންޖެހުމެއްކަމަށް ރޮޒެއިނާ ވިދާޅުވިއެވެ.

ރޮޒެއިނާ ވަނީ ފަހަކަށް އައިސް މަޖިލީހުގެ ތެރޭގައި އެފަދަ ކަންކަން ބެލެނީ ކިހާވަރަކަށްތޯ ސުވާލު އުފައްދަވާފައެވެ. އަދި މަޖިލީހަށް ވައްދަނީ ކޯޗެއްތޯ ނުބެލޭކަމަށް ދޭހަވާ މޭރުމަކުން އޭނާ ވަނީ ވާހަކަދައްކަވާފައެވެ. ރޮޒެއިނާ ވަނީ މަސްތުވާތަކެތީގެ ވާހަކަ ދައްކާއިރު، ހަމައެކަނި ބާރުގަދަ މަސްތުވާތަކެތި ބޭނުންކުރާ މީހުން ކުށްވެރިވާގޮތަށް ވާހަކަދައްކާތީ ކަންބޮޑުވުން ފާޅުކުރައްވާފައެވެ.

ހަސަން ލަތީފުގެ އެ ގަރާރުގައި، މަސްތުވާތަކެއްޗަށް ދެވިހިފާފައިވާ މީހުންނަށް ފަރުވާ ދިނުމުގެ ގޮތުން މިހާރު ސަރުކާރުން އެކުލަވާލާފައިވާ ނިޒާމުގެ ތެރެއިން ފަރުވާ ނުލިބޭ އެތައް ބަޔަކު ތިބިކަން ވަނީ ފާހަގަކުރައްވާފައެވެ. އަދި އެފަދަ ފަރާތްތަކަށް ފަރުވާ ނުލިބި މުޖުތަމައުން ބާކީވެ، އެ މީހުންގެ އާއިލާތައް ނިކަމެތިވެގެންދާ ކަމަށްވެސް ވަނީ ވިދާޅުވެފައެވެ. އެހެންކަމުން އެކަން ހުއްޓުވައި، އެ މައްސަލައަށް ހައްލު ލިބޭގޮތަށް ނިޒާމެއް ތަންފީޒުކުރުމަށް އެ ގަރާރުގައި ވަނީ ގޮވާލާފައެވެ.