އޮފީހެއް ފަޅާލައި، 7 ލައްކައަށްވުރެ ގިނަ ރުފިޔާ ވަގަށް ނެގި މީހާ 15 ދުވަހަށް ބަންދުކޮށްފި
29 މާރިޗު 2023 | ބުދަ 10:53ފަސް ލައްކައަށްވުރެ ގިނަ ފައިސާ ހޯދާފައިވޭ
ކްރިމިނަލް ކޯޓު
ހެންވޭރު ގެއެއްގެ ފުރަތަމަ ފަންގިފިލާގައި ހުރި އޮފީހެއް ފަޅާލައި ހަތް ލައްކައަށްވުރެ ގިނަ އަދަދެއްގެ ފައިސާ ވަގަށް ނެގި މީހާ 15 ދުވަހަށް ބަންދުކޮށްފިއެވެ.
މި މައްސަލައާ ގުޅިގެން ފުލުހުން ހައްުޔަރު ކޮށްފައިވަނީ ލ. ގަމަށް ނިސްބަތްވާ, އަދި މިހާރު މާލޭގައި ދިރިއުޅެމުންދާ 43 އަހަރުގެ ދިވެހި ފިރިހެނެކެވެ. އެގޮތުން މައްސަލަ ހުށަހަޅާފައިވާ ފަރާތުގެ ސިޓީއާއި، ފިންގަރ ޕްރިންޓް އައިޑެންޓިފިކޭޝަން ނޯޓިސް، އަދި އެމްއެމްއައި މޯލްޑިވްސް ޕްރައިވެޓް ލިމިޓެޑުގެ އޮފީހުގެ ފޮޓޯތަކަށް ބަލާއިރު، އެއީ އޭނާ ކުރި ކުށެއްކަމަށް ބެލެވޭކަމަށް ކޯޓު އަމުރުގައި ބަޔާންކޮށްފައިވެއެވެ.
ވުމާއެކު އޭނާ 15 ދުވަހަށް ބަންދުކުރުމަށް ކްރިމިނަލް ކޯޓުގެ ގާޒީ، އަލީ ނަދީމް ބުދަ ދުވަހު ވަނީ ނިންމަވާފައެވެ.
މިމައްސަލައާ ގުޅިގެން ފުލުހުން ބުނީ މިމައްސަލަ ފުލުހުންނަށް މާޗް މަހުގެ 23 ވަނަ ދުވަހު ހުށަހަޅާފައިވާކަމަށެވެ. މައްސަލައިގެ ތުހުމަތުގައި އޭނާ ހައްޔަރުކޮށްފައިވަނީ އަންގާރަ ދުވަހުއެވެ.
އޭނާ ހައްޔަރުކޮށް، ދިރިއުޅުނުތަން ބަލައި ފާސްކޮށް، 5 ލައްކައަށްވުރެ ގިނަ އަދަދެއްގެ ފައިސާ ހޯދާފައިވާކަމަށް ފުލުހުން ބުނެއެވެ.
މިމައްސަލަ ސީރިއަސް އެންޑް އޯރަގަނައިޒްޑް ކްރައިމް ޑިޕާޓްމަންޓުން އަންނަނީ ތަހުގީގުކުރަމުން ކަމަށް ފުލުހުން ބުނެއެވެ.
