ބްރެޑް ޕެޓީސް

ޕެޓީސް އާންމުކޮށް ތައްޔާރު ކުރަނީ އަލުވިވެސް އަޅައިގެންނެވެ. ނަމަވެސް މި ފަހަރު މި ގެނެސްދޭ ރެސިޕީގައި ބޭނުންކޮށްފައިވާ ބާވަތްތައް ތަފާތު ވާނެއެވެ.

ފުރަތަމަ ތަވައެއްގައި ތެޔޮ ހޭކުމަށްފަހު، ލޮނުމެދާ، ފިޔާ ކުޑަކޮށް ފްރައިކޮށްލުމަށްފަހު، އޭގެ ތެރެއަށް ކެރެޓް، ދެ ވައްތަރުގެ ބެލް ޕެޕަރ، ކެބެޖް އަދި ކުކުޅު އަޅައިގެން ރަނގަޅަށް މިކްސް ކޮށްލާށެވެ. ދެން އޭގެ ތެރެއަށް ލޮނު ހެޔޮވަރު ކުރުމަށްފަހު، އަސޭމިރުސް، ގަރަމް މަސާލާ، ޗިލީ ފްލޭކްސް އަޅައިގެން ހުރިހާ ބާވަތެއް އެއްކޮށްލުމަށްފަހު، 3 މިނިޓް ކައްކާލާށެވެ. ކައްކާ ނިމުމުން ދެ ސަމުސާ ފުށް އަޅައި އެއްކޮށްލުމަށްފަހު، މިލްކް ޖޯޑު އަޅައިގެން 4 މިނިޓް ކައްކާލާށެވެ. ދެން އޭގެ ތެރެއަށް ޗިލީ ސޯސް އާއި ސޯއީ ސޯސް އަޅައި އެއްކޮށްލުމަށްފަހު އުނދުން ނިއްވާލާށެވެ. މިހާރު މިހިރީ މަސްގަނޑު ތައްޔާރުކޮށް ނިމިފައެވެ.

ދެން ޕާން ފޮތިތަށް ވަށް ބައްޓަމަށް ތައްޔާރުކޮށްލާށެވެ. އެއަށްފަހު، ތައްޔާރު ކުރި ޕާނުގެ މައްޗަށް މަސްގަނޑު އެ ބައްޓަމަށް ފަތުރާލާށެވެ. ދެން ބިހަށް ލުމަށްފަހު ޕާންކުޑި ހާކާލާފައި، މޮށި ކުލަ އަރަންދެން ފްރައި ކޮށްލާށެވެ.