މަގުމަތީގައި މަސްތުގެ ހާލަތުގައި ސަލާންޖަހަން އުޅޭ އިތުރު 47 މީހުންނަށް ވަރަށް އަވަހަށް ފަރުވާ ދެވޭނެ ކަމަށް ނޭޝަނަލް ޑްރަގް އެޖެންސީ (އެންޑީއޭ) އިން ބުނެފިއެވެ.

އެންޑީއޭއިން ވަނީ އެކި މުއައްސަސާތަކުގެ އެހީތެރިކަމާއެކު، މަސްތުގެ ހާލަތުގައި ސަލާންޖަހާ ބައެއް އަންހެނުންނާއި ފިރިހެނުން ހޯދައި، އެމީހުންނަށް ފަރުވާ ދިނުމުގެ މަސައްކަތް ފަށާފައެވެ.

މި މަސައްކަތާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އެންޑީއޭގެ ސީއީއޯ އިމާދު ޞާލިހު ވިދާޅުވީ މިހާތަނަށް މި ޕްރޮގްރާމުގެ ތެރެއިން 10 ފަރާތެއް ފަރުވާއަށް ގެންގޮސްފައިވާކަމަށެވެ. އެއީ 3 އަންހެނުންނާއި 7 ފިރިހެނުން ކަމަށް އިމާދު ވިދާޅުވިއެވެ.

އިމާދު ވިދާޅުވީ މިގޮތަށް މާލޭގެ މަގުމަތީގައި ސަލާންޖަހަން އުޅޭ އިތުރު 47 މީހަކު ފާހަގަކުރެވިފައިވާކަމަށެވެ. އެމީހުންގެ ވަނަވަރު ހިމެނޭ ލިސްޓެއް އެކުލަވާލާފައިވާކަމަށް އޭނާ ވިދާޅުވިއެވެ. އިމާދު ވިދާޅުވީ އަންނަ ހަފްތާގެ މެދާ ހަމައަށް ދާއިރު މި ލިސްޓުވެސް ކްލިއަރ ކުރެވި އެމީހުން ފަރުވާގެ ތެރެއަށް ގެނެވޭނެ ކަމަށެވެ.

އިމާދު ވިދާޅުވީ މިއީ ވަކި އަދަދެއްގެ މީހުންނަށް ކަނޑައަޅައިގެން ކުރިއަށްގެންދާ ޕްރޮގްރާމެއް ނޫން ކަމަށެވެ. ކުރިއަށްއޮތްތަނުގައި އަތޮޅުތެރޭގައިވެސް އެންޑީއޭގެ ސެންޓަރުތައް ހުރި ތަންތަނުގައި މި ޕްރޮގްރާމް ކުރިއަށްގެންދިއުމަކީ އަމާޒެއް ކަމަށް އިމާދު ވިދާޅުވިއެވެ.