''ޒަކާތު ނަފާ'' ޕްރޮގްރާމް: ދެތިން އަހަރެއްގެ ތެރޭގައި ފަގީރުންގެ ދަފްތަރު އެއްކޮށް ހުސްކޮށްލެވޭނެ
28 މާރިޗު 2023 | އަންގާރަ 06:40ޕްރޮގްރާމް ކުރިއަށް ގެންދިއުމަށް ވަނީ ޚާއްސަ ޕްލޭނެއް އެކުލަވާލެވިފައި
އިސްލާމިކް މިނިސްޓަރު ޑރ. އަހުމަދު ޒާހިރު
ފަގީރުންގެ ލިސްޓުގައި ތިބި މީހުން އަމިއްލަ ފައިމައްޗަށް ތެދުވެވޭނެ ގޮތްތައް ހޯދައިދިނުމުގެ ގޮތުން ''ޒަކާތު ނަފާ'' ޕްރޮގްރާމެއް ކުރިއަށް ގެންދަން ނިންމާފައިވާ ކަމަށާއި، ކުރިއަށް އޮތް ދެތިން އަހަރެއްގެ ތެރޭގައި ފަގީރުންގެ ދަފްތަރު އެއްކޮށް ހުސްކޮށްލެވޭނެ ކަމަށް ކަމަށް އިސްލާމިކް މިނިސްޓްރީން ބުނެފިއެވެ.
ރާއްޖެޓީވީގައި ވާހަކަފުޅުދައްކަވަމުން އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވީ ފަގީރުންގެ ލިސްޓުގައި ތިބި މީހުން އަމިއްލަ ފައިމައްޗަށް ތެދުވެވޭނެ ފަދަ ގޮތްތައް ހޯދައިދިނުމަށް މިނިސްޓްރީގެ ފަރާތުން ޚާއްސަ ޕްރޮގްރާމްތަކެއް ކުރިއަށް ގެންދަން ނިންމާފައިވާ ކަމަށެވެ. އަމާޒަކީ މި ޕްރޮގްރާމްގެ ތެރެއިން ފަގީރުންގެ ދަފްތަރު އެއްކޮށް ހުސްކޮށްލުން ކަމަށް މިނިސްޓަރު ވިދާޅުވިއެވެ.
ޒަކާތު ނަފާގެ ނަމުގައި ކުރިއަށް ގެންދާ ޕްރޮގްރާމްގެ ދަށުން ދަނޑުވެރިކަމާއި، ފެހުމާއި، ފަރުމަސްވެރިކަމާއި އަދިވެސް އަމިއްލަ ފައިމައްޗަށް ތެދުވެ އެމީހުންނަށް އަމިއްލައަށް ކުރެވޭނެ މަސައްކަތްތައް ކުރުމަށް މަގުފަހިކޮށްދޭނެ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ އިގްތިސާދީ ކުރިއެރުވުމުގައި ފަރުދުންގެ ބައިވެރިވުން އިތުރުކުރުވަން އެ ޕްރޮގްރާމްގައި މަސައްކަތްކުރާނެ ކަމަށެވެ.
ކުރިއަށް އޮތް ދެތިން އަހަރެއްގެ ތެރޭގައި ފަގީރުންގެ ދަފްތަރު އެއްކޮށް ހުސްކޮލެވޭވަރުވާނެކަން ފާހަގަކުރައްވައި މިނިސްޓަރު ވިދާޅުވީ އެ އަމާޒަށް ވާސިލްވުމަށް ވަކި ޕްލޭންއެއް އެކުލަވާލެވި އެ ޕްލޭންއާ އެއްގޮތަށް މަސައްކަތް ކުރާނެ ކަމަށެވެ. މިނިސްޓަރު ވިދާޅުވީ ޕްރޮގްރާމްގެ ތެރެއިން އެމީހުން ތަމްރީން ކުރުމަށްފަހު، އެ މަސައްކަތް ކުރާނެ އާލަތްތައް ފޯރުކޮށްދޭނެ ކަމަށެވެ. އަދި ދަނޑުވެރިކަން ކުރަން ބޭނުންވާ މީހެއް ނަމަ، އެމަސައްކަތް ކުރުމަށް ބޭނުންވާ ހުރިހާ ސާމާނެއް ފޯރުކޮށްދޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މާލެސީޓީ އަދި އަތޮޅުތެރެއިން ފަގީރުންގެ ލިސްޓަށް ބަލާއިރު، ޕްރޮގްރާމްގައި ބައިވެރިވުމަށް ޚާއްސަ ފޯމެއް ފޮނުވާނެ ކަމަށެވެ. އަދި ފޯމަށް ބެލުމަށްފަހު، ލިސްޓް އެކުލަވާލުމުގެ މަސައްކަތް ކުރިއަށްދާނެ ކަަމަށް މިނިސްޓަރު ވިދާޅުވިއެވެ.
''ޒަކާތު ނަފާ'' ޕްރޮގްރާމަކީ އިކޮނޮމިކް މިނިސްޓްރީއާ ގުޅިގެން ކުރިއަށް ގެންދާ ޕްރޮގްރާމެކެވެ. މި ޕްރޮގްރާމް ކުރިއަށް ގެންދިއުމަށް ނިންމާފައިވަނީ ފިޔަވަހިތަކަކަށް ބަހާލައިގެންނެވެ.
