ހުޅުމާލޭގައި ތަރައްގީކޮށްފައިވާ "ވިނަރެސް" ހައުސިންގ މަޝްރޫއުން އެޕާރޓްމަންޓް ގަތުމަށް އެދި ފޯމު ހުށަހެޅި މީހުންގެ ތެރެއިން ޕޮއިންޓްގެގޮތުން އެއްވަރުވި މީހުންގެ މެދުގައި ގުރުއަތު ނެގުން އޮންނާނީ އަންނަ ބުދަ ދުވަހު ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.

އެޗްޑީސީން ބުނީ މިނިސްޓްރީ އޮފް ނޭޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރއިން މުރާޖައާކޮށްފައިވާ ލިސްޓްގައި، މިނިސްޓްރީގެ މިންގަނޑުތަކާ އެއްގޮތަށް ޕޮއިންޓް ދެވިފައިވާއިރު، ޕޮއިންޓްގެ ގޮތުން އެއްވަރުވެފައިވާ ފަރާތްތަކުގެ ތަރުތީބު ކަނޑައެޅުމަށް ހަމަޖެހިފައިވަނީ އެމީހުންގެ މެދުގައި ގުރުއަތު ލައިގެން ކަމަށާއި، ގުރުނެގުން 29 މާރިޗް 2023 ވަނަ ދުވަހު އެ ކޯޕަރޭޝަނުން ކުރިއަށް ކުރިއަށްދާނެ ކަމަށެވެ.

އެޗްޑީސީން ބުނީ މި ލިސްޓުގައި ހިމެނޭ މީހުންގެ ތެރެއިން މައި-އެޕްލިކަންޓް އަދި ކޯ-އެޕްލިކަންޓްގެގޮތުގައި އެއް ފޯމަށްވުރެ ގިނަ ފޯމުގައި ނަން ހިމަނާފައިވާ، އަދި ދެމަފިރިން ވަކިން ފޯމު ހުށަހަޅާފައިވާ ފަރާތްތަކުން އެއް އެޕްލިކޭޝަން ދޫކޮށްލުމަށް އީމެއިލްކޮށް، އަދި އެޕްލިކޭޝަން ދޫކޮށްލުމަށް އެއްބަސްވެވޭ ފޯމުގައި ސޮއިކޮށްފައިވާ ފަރާތްތައް އެ ލިސްޓުން އުނިކުރެވިފައިވާކަމަށެވެ. އަދި ދާއިމީ ލިސްޓް ޝާއިއުކުރުމަށްފަހު އެޕްލިކޭޝަން ދޫކޮށްލުމަށް އެދި މިކޯޕަރޭޝަނަށް ހުށަހަޅާފައިވާ ފަރާތަކަށް ދެވަނަ ފަހަރަށް އެޕްލިކޭޝަނައިގެން ކުރިއަށް ދިއުމުގެ ފުރުސަތު ނުދެވޭނެކަމަށް އެޗްޑީސީން ބުނެއެވެ.  

މި މަރުހަލާ ފުރިހަމަވުމުން ބުކިންގ ފީ ނެގުމާއި އެޕާޓްމަންޓް އިޚްތިޔާރު ކުރުން ކުރިއަށް ގެންދާނީ ގުރުނެގުމަށްފަހު ލިސްޓް ތަރުތީބުކޮށް، ޝާއިއުކުރެވޭ ލިސްޓާ އެއްގޮތަށް ކަމަށް އެޗްޑީސީން ބުނެއެވެ.

އެޗްޑީސީން ބުނީ ލިސްޓު ތަރުތީބުކުރުމަށް ނެގޭ ގުރުއަތުލުން އެ ކޯޕަރޭޝަނުގެ ރަސްމީ ފޭސްބުކް ޕޭޖުން ލައިވްކުރާނެ ކަމަށެވެ. އަދި ގުރުނެގުން ކުރިއަށްދާ ގޮތް އޮބްޒަރވްކުރުމަށް، 2 ކެޓަގަރީންވެސް މަދުވެގެން 5 މީހުންނަށް ދައުވަތު އެރުވޭނެ ކަމަށެވެ. މިކަމާ ގުޅޭގޮތުން އެމީހުންނަށް ފޯނުގެ ޒަރީއާއިން ގުޅާނީ ހަމައެކަނި އެ ކޯޕަރޭޝަނުގެ ހޮޓްލައިން ނަންބަރ 3353535 މެދުވެރިކޮށެވެ.

އެޗްޑީސީން ބުނީ އެ ކޯޕަރޭޝަނުން އެއްވެސް މޯބައިލް ފޯނު ނަންބަރަކުން ވިނަރެސް ހައުސިންގ މަޝްރޫއާ ގުޅޭގޮތުން އެއްވެސް މީހަކަށް ނުގުޅާނެ ކަމަށެވެ. މީގެއިތުރުން، މިކަމާ ގުޅޭގޮތުން އެސް.އެމް.އެސް ނުވަތަ އެއްވެސް ލިންކެން ނުފޮނުވާނެކަމުގެ ޔަގީންކަންވެސް އެޗްޑީސީން ވަނީ ދީފައެވެ.

އިތުރު މައުލޫމާތު ސާފުކުރުމަށް އެޗްޑީސީގެ ހޮޓްލައިން ނަންބަރ 1516އަށް ގުޅުމަށް އެޗްޑީސީން އެދިފައިވެއެވެ.