އަދީލް ޖަލީލް: ވެލެންސިއާ ހިންގީ އަނބިދަރިން ނުކައި ތިއްބަސް ވަރިހަމަކަމަށް

މޯލްޑިވްސް ސްޕޯޓްސް އެވޯޑްސްގައި ކުޅިވަރަށް ހިދުމަތް ކުރުމުގެ ރޮނގުން ހިތްވަރު ދިނުމުގެ އިނާމް ލިބިވަޑައިގެންނެވި ގަލޮޅު ފަހިވާގޭ އަދީލް ޖަލީލަކީ ރާއްޖޭގެ އެންމެ ކާމިޔާބު އެއް ކްލަބު، ވެލެންސިއާގެ ކުރީގެ ޗެއާމަން އަދި އެއް މުއައްސިސްއެވެ. ވެލެންސިއާ އުފެއްދެވުމުގެ އެއް މުހިންމު އެއް ހިއްސާދާރަކީ ވެސް އޭނާ އެވެ. އެ ހިޔާލު އައީ އެދުވަސްވަރު ގިނަ ބަޔަކު ކުޅިވަރު ކުޅެން ޖަމާވި އޭނާގެ ގޭތެރޭގައި ހުރި ޓީޓީ މޭޒު ދޮށުންނެވެ. ވެލެންސިއާ ހިންގެވުމަށް އެކުލަބުގެ މަސްއޫލުވެރިކަމަށް އެންމެ ފުރަތަމަ ވަޑައިގެންނެވީ 1996 ވަނަ އަހަރު އެވެ. އޭގެ ފަހުން 2015ގަ އެވެ. ކުލަބު އުފެއްދެވިއިރު އޭނާ އާއި ރަހުމަތްތެރިންނަށް އެފުރުސަތު ނުލިބުނީ އުމުރު ހަނގުވުމުންނެވެ.

ވެލެންސިއާގެ ތާރީހުން އަދީލް ޖަލީލްގެ ނަމަށް ދުވަހަކުވެސް ފަނޑުކަމެއް ނާންނާނެ އެވެ. ކުލަބުގެ އެންމެ ކާމިޔާބު ދުވަސްވަރު ވެލެންސިއާގެ ހިންގެވުމުގެ މުގުލުގައި ހުންނެވީ އޭނާ އެވެ. އެންމެ ގިނަ ތަށި ހޯދީ އޭނާގެ ވެރިކަމުގަ އެވެ. ރާއްޖޭގެ އެންމެ މޮޅު ކުޅުންތެރިން ވެލެންސިއާގެ އަށް ގެންގޮސް ގަދަ ބާރެއްގެ ގޮތުގައި އެ ކުލަބު ބޭއްވުމުގެ ވިސްނުން އެންމެ ބޮޑަށް ގެންގުޅުއްވީ ވެސް އަދީލެވެ. ހާއްސަކޮށް 1996 ވަނަ އަހަރުން ފެށިގެންގޮސް 2006 ވަނަ އަހަރާ ހަމައަށް ވެލެންސިއާ ފުޓްބޯޅައިގައި ރަސްކަންކުރީ އޭނާގެ ހިތްވަރާއި ކުޅަދާނަ ވިސްނުމާއި ރޭވުންތެރިކަމާއެކުގަ އެވެ. މީގެ އިތުރުން ވެލެންސިއާ ގިނަ ބަޔަކަށް ކަމުދިޔަ އެއް ސިފަކަމަށްވާ ޕާސިން ގޭމަކީ ވެސް އޭނާގެ ވިސްނުމެކެވެ.

ކުލަބު ވެލެންސިއާގެ ތާރީހުން އެންމެ ހާއްސަ އެއް ދުވަހަކީ އެކުލަބުން އެއްލައްކަ ރުފިޔާގެ އަގުބޮޑު ކަޕް ވިނާސް ކަޕް މިލްކުކުރި ދުވަހެވެ. އެއްވެސް ކުލަބެއްގެ އަތުގައި ނުޖައްސައި ކަޕް ވިނާސް ކަޕް މިލްކުކުރަން އެންމެ ބޮޑަށް ފޯރި ނެންގެވި ބޭފުޅަކީ ވެސް އަދީލެވެ. އެ އަހަރު ބޮޑު އަގުގައި ކުލަބަށް މަޝްހޫރު އެތައް ކުޅުންތެރިން ގެނައީ ސީދާ އޭނާގެ އަމިއްލަ ޖީބުން ހަރަދު ކުރައްވައިގެންނެވެ. އެ ކާމިޔާބީ އަށް ފަހު އިޖްތިމާއީ ގޮތުން ވެލެންސިއާގެ ދައުރު ފުޅާކުރެއްވުމަށް މަޝްހޫރު ހެޕަނިން ޝޯ ބާއްވައި ކުލަބުގެ ކުރިމަގަށް ހަރުދަނާ ފިޔަވަޅުތަކެއް އެޅުއްވި އެވެ.

އަދީލަކީ އޭނާގެ ކުޅުންތެރިންނަށް ވަރަށް ހެޔޮ، އަދި ކުޅުންތެރިންގެ އިހްތިރާމާއި ލޯބި ވަރަށް ބޮޑަށް ހޯއްދެވި ލީޑަރެކެވެ. ރާއްޖޭގެ އެންމެ މަޝްހޫރު ކުޅުންތެރިން ކަމަށްވާ އައްސަދު އަބުދުލްގަނީ އާއި ތޮއްޑޫ މުހައްމަދު ނިޒާމާއި އަލީ އުމަރާއި އަލީ އަޝްފާގް (ދަގަނޑޭ) އާއި އަލީ ޝިހާމާއި އަލީ ރަޝީދު (ސިލާޗީ) އާއި ބިންމާ އަބުދުﷲ ވަހީދު ފަދަ އެތައް ތަރިންނެއް ހޯދުމަށް ވާދަވެރި ކުލަބުތަކުން ކުރި މަސައްކަތް ނާކާމިޔާބުވި ހަގީގީ ސަބަބަކީ ވެސް އަދީލެވެ. އޭނާ އާއި ކުޅުންތެރިންނާ އޮތީ ވަރަށް ގާތް ވަރުގަދަ އިތުބާރެކެވެ.

"އަޅުގަނޑުގެ ވިސްނުމަކީ ޓީމު ބަލިވިޔަސް ކުޅުންތެރިޔާ ދޫކޮށްނުލުން. އެއީ ތަށި ލިބެނީ އެމީހުން ކުރާ މަސައްކަތަކުން ކަމަށްވާތީވެ. އެގޮތުގެ މަތިން ކުޅުންތެރިންނަށް ކަންތައް ކޮށްދެމުން އައީ އަމިއްލަ ދަރިން ފަދައިން. ބައެއް ކުޅުންތެރިން ގޭގައި ވެސް ގެންގުޅުނިން. އަޅުގަނޑާއި ކުލަބުގެ މެނޭޖްމަންޓް އިސް ބައެއް މީހުންނާ މައްސަލަ ވެސް ޖެހޭ މާބޮޑަށް ކުޅުންތެރިންނަށް ގާތްކޮށް ކަންތައްކޮށްދޭތީވެ. އެކަމަކު އަޅުގަނޑު ވިސްނުންހުރީ ކުޅުންތެރިން ހިފަހައްޓަން،" އަދީލް ވިދާޅުވި އެވެ.

އަދީލް ވިދާޅުވީ ވެލެންސިއާގެ ތާރީހުން މޮޅު އެތައް ކުޅުންތެރިންނަށް ފެނުނަސް އޭނާ އަށް އެންމެ މޮޅީ ފޯވަޑް އަލީ އުމަރު ކަމަށެވެ. އަދި އެހެން ކުލަބެއްގައި ހުއްޓައި އެންމެ ބޭނުންވެގެން ވެލެންސިއާ އަށް ގެނައީ ހުރާގެ އަލީ ޝިހާމް ކަމަށެވެ.

"އަޅުގަނޑުގެ ވިސްނުމަކީ އެޓޭކް ވަރުގަދަ ކުރުން. އިރާދަ ކުރެއްވީތީވެ އަޅުގަނޑަށް އެކަން ކުރެވުނު. އަޅުގަނޑު ހިންގިއިރު އެއިރަކު އޮންނަ އެންމެ ވަރުގަދަ ފޯވަޑް ލައިން އޮންނާނީ ވެލެންސިއާގައި. ހާއްސަކޮށް ތިން އަލީގެ (އަލީ ޝިހާމް، އަލީ އުމަރު، އަލީ އަޝްފާގް) ޕާޓްނަޝިޕް ފާހަގަކުރަން،" އަދީލް ވިދާޅުވި އެވެ.

އޭނާގެ އެންމެ ހާއްސަ އެއް ސިފައަކަށްވެފައިވަނީ މުސާރަ ނުދެވި ގިނަ ދުވަސްވާއިރު ވެސް ކުޅުންތެރިން އަދީލަށްޓަކައި ވެލެންސިއާ ވަންތަ ބައެއްގެ ގޮތުގައި ތިބުމެވެ. އެކަމުގެ ސިއްރަކީ ކޮބައިތޯ އެހުމުން ވިދާޅުވީ "ދަތި ވަގުތު އައުމުން އެމީހުންނަށް ވިސްނައިދެން ފައިސާ ލިބުމުން ދޭނެ ވާހަކަ. ވަރަށް ގިނަ ކުޅުންތެރިން އެކަން ގަބޫލުކޮށްގެން ވެލެންސިއާ އަށް ކުޅޭހިތުން ކުޅެދިން. އެކަން އަޅުގަނޑު މިއަދު ވެސް ވަރަށް ބަލައިގަންނަން،" ކަމަށެވެ.

އަދީލާއި އޭނާގެ އެކުވެރިން އަމިއްލަ ގޭގެ ޓީޓީ މޭޒުދޮށުން އުފެއްދި ހިޔާލު ފައްކާކޮށް ވެލެންސިއާ އުފައްދައިގެން އޭނާގެ ހިދުމަތް އޮތީ ހަމައެކަނި ކުލަބު ހިންގެވުމުގައި އެކަންޏެއްނޫނެވެ. ފުޓްބޯޅަ ޓީމާއި ޓީޓީ ޓީމަށް ކުޅުއްވި އެވެ. އަދި ގައުމީ ޓީޓީ ޓީމުގެ ކެޕްޓަންކަންކޮށް އިންޑިއަން އައިލެންޑް ގޭމްސްއިން ބްރޯންޒް މެޑަލް ވެސްހޯދި އެވެ.

ވެލެންސިއާގެ ފުރަތަމަ މެޗުގައި ފުރަތަމަ 11ގައި ކުޅުއްވި އެވެ. ފުރަތަމަ ލަނޑު ޖަހަން ވެސް ފުރުސަތު ލިބުނެވެ.

ވެލެންސިއާ އަށް ލިބުނު ފުރަތަމަ ރަސްމީ ތަށި ކަމަށްވާ 1980 ވަނަ އަހަރުގެ ގައުމީ ޓީޓީ މުބާރާތުގެ ތަށި ހޯދިއިރު އަދީލަކީ އަކީ އެ ޓީމުގެ ފަހުރުވެރި ކެޕްޓަނެވެ. އަދި އެ އަހަރުގެ ސިންގަލްސް ޗެމްޕިއަނަކީ ވެސް އަދީލެވެ. ޑަބަލްސް ޗެމްޕިއަނަކީ އަދީލާއި އަނބިކަނބަލުން ލަތީފާ އެވެ. ހަގީގަތުގައި ސިންގަލްސް ޗެމްޕިއަންކަން ލިބިއްޖެނަމަ އަނބިކަނބަލުންނާ ކައިވެނި ބައްލައިވައިގަތުމަށް އަދީލް "އޮތީ ވައުދު" ވެވަޑައިގެންފައެވެ. މިވާހަކަ އެހުމުން އަދީލްގެ ދެމަފިރިކަނބަލުން ވަރަށް ސާމާސާ ކުރައްވާފައި ވިދާޅުވީ "އެއީ ލޯބިން ފުރިގެންވާ ގުޅުމެއް،" ކަމަށެވެ.

ހަގީގަތުގައި ވެސް އެއީ ތެދެކެވެ. މި ޖޯޑުގެ ލޯބި އަދިވެސް އޮތީ އިހު އޮތް ފަދައިންނެވެ. ޒަވާޖީ ހަޔާތުގެ ލޯތްބާއި ވެލެންސިއާގެ ކުލަތަކުންގެ ތެރެއިން އަދީލް ކުޅިވަރުގެ ތެރެއަށް ފައްކާކުރި މޭވާ އަކީ އޭނާގެ ދެ ދަރިން ކަމަށްވާ ބައްސާމް އަދީލް ޖަލީލާއި ރަސްލާން އަދީލް ޖަލީލެވެ. ރަސްލާނަކީ ވެލެންސިއާގެ މިހާރުގެ ޗެއާމަނެވެ. ވެލެންސިއާގެ އެންމެ އާދައިގެ ވަޒީފާއިން ފެށިގެން ގޮސް ކުލަބު ހިންގެވުމަށް ބައްސާމް ނެރުއްވައި މިއަދު ގައުމީ ފުޓްބޯޅަ އިދާރާގެ އެންމެ އިސް ވާޖިބު ކޮނޑުގައި އަޅުއްވައިގެން ދޮށީ ދަރިފުޅު ބައްސާމް ހުންނެވުމަކީ އަދީލް ހޯއްދެވި ވަރަށް ފަހުރުވެރި ކާމިޔާބީއެއް ކަމަށް އޭނާ ގަބޫލުކުރައްވަ އެވެ.

އަދީލަށް ފަހު ވެލެންސިއާ އެއް ފެންވަރެއްގައި ކުރިއަކަށްނުދެ އެވެ. 2018 ވަނަ އަހަރު ރެލިގޭޓްވެފައި މިހާރު އަނެއްކާ ވެސް އޮތީ އަރައިފަ އެވެ. މިކަމާމެދު ސުވާލު ކުރުމުން ޖަވާބުދޭން އަދީލަށް ދަތިފުޅުވި އެވެ. ވިދާޅުވީ "ތިއީ ވަރަށް ޕާސަނަލް ސުވާލެއް،" ކަމަށާއި "ރެލިގޭޓްވި ހަބަރު އިވުމުން ވަރަށް ދެރަވި،" ކަމަށެވެ. އަދި "ތަށި ނުހޯދާނަމަ ކުލަބު ހިންގަން ނޫޅުމަށް ދަރިން ގާތުގައި ވެސް ބުނިން،" ކަމަށެވެ.

ހަގީގަތުގައި ވެސް އޭނާ އަކީ ކުޅިވަރުގެ ލެޖެންޑެކެވެ. އެތައް ކުޅުންތެރިންނަކަށް އެހީތެރިވި މަދަދުގާރެކެވެ. އެހިދުމަތް ފާހަގަކޮށް އެފްއޭއެމް ޕްރެޒިޑެންޓް އެވޯޑް 2018 ވަނަ އަހަރު އަދި މި އަހަރު ކުޅިވަރާ ބެހޭ ވަޒީރުގެ ހިތްވަރު ދިނުމުގެ އިނާމު އޭނާ އަށް ދީފި އެވެ. އެކަމަކު 61 އަހަރުގެ އަދީލަށް އަށް މިހާރު ދޭންވީ ހިތްވަރެއްނޫނެވެ. ޝަރަފުވެރިކަމުގެ އިނާމެވެ. އޭނާ އަކީ ރާއްޖޭގެ ފުޓްބޯޅައިގެ އެންމެ ވަރުގަދަ އެއް ހިދުމަތްތެރިޔާ އެވެ.