2022 ވަނަ އަހަރު ޖޭއެސްސީއަށް ލިބިފައިވާ ބަޖެޓުގެ 88 އިންސައްތަ ބޭނުންކުރެވިފައިވޭ
15 މިލިއަން ރުފިޔާގެ މަސައްކަތް ތަންފީޒުކޮށްފައިވޭ
ޖުޑީޝަލް ސަރވިސް ކޮމިޝަން
2022 ވަނަ އަހަރު ޖޭއެސްސީއަށް ލިބިފައިވާ ބަޖެޓުގެ 88 އިންސައްތަ ބޭނުން ކުރެވިފައިވާކަމަށް އެ ކޮމިޝަނުގެ އަހަރީ ރިޕޯޓުން ދައްކައިފިއެވެ.
ޖޭއެސްސީގެ އަހަރީ ރިޕޯޓުގައި ބަޔާންކޮށްފައިވާ ގޮތުގައި 2022 ވަނަ އަހަރު ކޮމިޝަނަށް ލިބިފައިވާ ބަޖެޓު 17،400،000 (ސަތާރަ މިލިއަން ހަތަރުލައްކަ) ރުފިޔާގެ ތެރެއިން 15 މިލިއަން ރުފިޔާގެ މަސައްކަތް ތަންފީޒުކޮށް، ބަޖެޓުގެ 88 އިންސައްތަ ވަނީ ބޭނުން ކުރެވިފައިވެއެވެ.
2022 ވަނަ އަހަރު ކޮމިޝަނަށް 392 ޝަކުވާއެއް ހުށައެޅިފައިވާއިރު، އޭގެ ތެރެއިން ފަނޑިޔާރުންގެ ސުލޫކީ މައްސަލައިގެ ގޮތުގައި ބެލުމަށް ނިންމީ 15 މައްސަލައެވެ.
އެގޮތުން ބަލާއިރު، 2022 ވަނަ އަހަރު ބަލަން ނިންމުނު މައްސަލައިގެ އަދަދު ދަށްވުމަކީ ފަނޑިޔާރުންގެ ސުލޫކަށް ހެޔޮ ބަދަލު އައިސްފައިވާކަމުގެ ހެއްކެއްކަމަށް ކޮމިޝަނުގެ ރައީސް ހިސާން ހުސައިން މި ރިޕޯޓުގައި ފާހަގަ ކުރައްވާފައިވެއެވެ.
ރިޕޯޓުގައި އިތުރަށް ފާހަގަކޮށްފައިވާ ގޮތުގައި ފަނޑިޔާރުންގެ ތެރެއިން މެޖިސްޓްރޭޓުންގެ މުސާރައަށް އައި ހެޔޮ ބަދަލަކީ ކޮމިޝަނުގެ އިސްނެގުމުގެ މަތިން، ދައުލަތުގެ އެކިއެކި މުއައްސަސާތަކުގެ މުސާރައާއި އިނާޔަތްތައް ދިރާސާކޮށް އެކުލަވާލާފައިވާ އޮނިގަނޑެކެވެ.
މި ހެޔޮ ބަދަލާއެކު ފަނޑިޔާރުންގެ އޮނިގަނޑުގައި ހުރި ނުބައްދަލު ފަރަޤުތަކަށް ހައްލެއް ލިބިގެން ގޮސްފައިވާކަންވެސް ޖޭއެސްސީން ފާހަގަ ކުރެއެވެ.
