ނިކްލަސް ފުލްކްރުގް ޖެހި ދެ ލަނޑާއެކު ޖަރުމަނުން ޕެރޫ ބަލިކޮށްފި

ބައިނަލްއަޤުވާމީ ރަޙުމަތްތެރިކަމުގެ މެޗުގައި ޖަރުމަނުން ޕެރޫ ބަލިކޮށްފި އެވެ.

ޖަރުމަނުގެ މައިންޒުގައި ހުންނަ މެވާ އެރީނާގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މިއީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕްގެ ގްރޫޕް ސްޓޭޖުން ކެޓި ފަހުން ޖަރުމަނުން ކުޅުނު ފުރަތަމަ މެޗެވެ. ވޯލްޑް ކަޕްގެ ގްރޫޕް ސްޓޭޖުގައި ޖަރުމަނުން ކުޅުނު ތިން މެޗުގެ ތެރެއިން މޮޅުވީ އެންމެ މެޗަކުންނެވެ. އެއީ ފަހު މެޗުގައި ކޮސްޓަރިކާ އަތުންނެވެ. ފުރަތަމަ މެޗުގައި ޖަޕާން އަތުން ބަލިވިއިރު، ދެ ވަނަ މެޗުގައި ސްޕެއިންއާ ވާދަކޮށް އެއްވަރުވީ އެވެ. ޕެރޫއާ ދެކޮޅަށް ކުޅުނު މެޗުގައި ޖަރުމަނުގެ ދެ ލަނޑު ވެސް ފުރަތަމަ ހާފުގައި ޖެހީ ފޯވާޑް ނިކްލަސް ފުލްކްރުގް އެވެ. އެއީ މެޗުގެ 12 ވަނަ މިނެޓުގައި ކައި ހަވާޓްޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑާއި، 33 ވަނަ މިނެޓުގައި މާރިއަސް ވޮލްފްގެ އެހީތެރިކަމާއެކު ޖެހި ލަނޑެވެ. މެޗުގެ ދެ ވަނަ ހާފުގައި ޖަރުމަނަށް ތިން ވަނަ ލަނޑެއް ޖަހަން ލިބުނު ފުރުސަތުގައި ހަވާޓްޒް ފޮނުވާލި ޕެނަލްޓީ އަމާޒުވީ ގޯލުގެ އަރިމަތީ ދަނޑިއާ އެވެ.

އިންޓަނޭޝަނަލް ބްރޭކުގައި ޖަރުމަނުން ރަޙުމަތްތެރިކަމުގެ ދެ މެޗު ކުޅޭނެ އެވެ. ފަހު މެޗުގައި މި މަހުގެ 28 ވަނަ ދުވަހު ނިކުންނާނީ ބެލްޖިއަމާ ދެކޮޅަށެވެ.