"އިސްލާމީ އެހެން ޤައުމުތަކުގަ ރޯދަ މަހާ ދިމާކޮށް، އަގުތައް ދަނީ ދަށަށް"

އެއީ މިއަދު ހަމަ ކޮންމެ ތަނެއްގެވެސް ހާލަތެވެ. ބާޒާރަކަށް ވަދެލައިފިނަމަ އިވެމުން ދަނީ އެއް އަޑެކެވެ. ތަކެތީގެ އަގުތައް، އިންތިހާ ބޮޑުވެގެން އެކަމުގެ ޝަކުވާ ކުރާ އަޑެވެ. އެކަށީގެންވާ ގޮތެއްގައި ވިޔަފާރި ކުރިއަށް ނުދާތީ، އަނެއް ބަޔަކު، އެކަމުގެ ޝަކުވާ ކުރާ އަޑެވެ. ހަތިޔާރު އެޅި ހަނގުރާމަވެރި ޠާލިބާން ޖަމާއަތުގެ ކޮންޓްރޯލްގެ ދަށަށް، އޯގަސްޓް 2021ގައި ގެންގޮސްފައި ވާ އަފްޣާނިސްތާނުގެ ވެރިކަން ކުރާ ކާބުލްގެ ބާޒާރު މަތިންވެސް، މި އަހަރުގެ ރަމަޟާން މަހުގެ ފުރަތަމަ ދުވަހު އިވުނީ، ހަމަ އެ ޝަކުވާ ތަކެވެ.

ތޮއްޖެހިފައިވާ ބާޒާރުމަތީގައި ހުރި ކާބުލްގެ ރަށްވެއްސެއް ކަމަށް ވާ މުޙައްމަދު ސަލީމުގެ ޝަކުވާއަކަށްވެސް ވީ، އަފްޣާނިސްތާނުގެ ބާޒާރުތަކުގައި ތަކެތީގެ އަގުތައް އިންތިހާއަށް އުފުލިފައި ވާ ކަމުގެ ޝާކުވާއެވެ.

ކަން މިހެން އޮތް އިރު، އަފްޣާނިސްތާނުގެ ޢާންމު ރައްޔިތުން ދަނީ، ވަޒީފާގެ ފުރުޞަތުތައް ތަނަވަސްކޮށްދިނުމަށް، ޠާލިބާން ސަރުކާރަށް ގޮވާލަމުންނެވެ. އަދި އަންހެން ކުދިންނަށް މަތީ ތަޢުލީމު ހާސިލު ކުރެވޭނެ ފުރުޞަތު އަލުން ފަހި ކޮށްދިނުމަށްވެސް އެތައް ބަޔަކު ދަނީ، ދޭސީ އަދި ބައިނަލްއަޤުވާމީ ފެންވަރުގައި ޑިމާންޑް ކުރަމުންނެވެ.

އެމެރިކާއިން އަފްޣާނިސްތާނުގައި ކުރި ދިގު ހަނގުރާމަ ނިންމާ އެޤައުމުން ފައިބައިގެން ދިއުމާއެކުހެން އަފްޣާނިސްތާނުގެ ކޮންޓްރޯލް، ޠާލިބާން ހަނގުރާމަވެރިން ނެގި ނަމަވެސް، އިސްލާމިކް އެމިރޭޓް އޮފް ޠާލިބާންގެ ސަރުކާރު، އެހެން ޤައުމަކުން އަދި ރަސްމީ ސިފައެއްގައި ބަލައިގެންފައެއް ނުވެއެވެ. ކާބުލްގެ ރަށްވެއްސެއް ކަމަށްވާ މުޙައްމަދު ޒަކަރިއްޔާގެ ޝަކުވާއަކީވެސް އެއީއެވެ.

ރޯދަ ވީއްލުމަށްޓަކާ އަފްޣާނިސްތާނު މީހުން އާންމުކޮށް ތައްޔާރުކޮށް އުޅެނީ ހަވާދުގެ ބާވަތްތައް ގިނަ، ކާބޯތަކެއްޗެވެ. އަދި ޒަމާނުއްސުރެ ބޭނުން ކުރާ ފޮނިކާތަކެތިވެސް ތައްޔާރު ކުރެއެވެ.

އަފްޣާނިސްތާނަށް ކުރިމަތިލާން ޖެހިފައި ވާ އިޤްތިޞާދީ ކާރިޘާގައި އެންމެ ބޮޑު ތަކުލީފެއް އުފުލަމުން ދަނީ އެ ޤައުމުގެ ޢާންމު ރައްޔިތުންނެވެ. ވިޔަފާރިވެރިން ބުނާ ގޮތުގައި އަފްޣާނިސްތާނުގެ ގިނަ މީހުންނަކީ މިއަދު، ކާބޯތަކެތި ގަތުމުގެ ތަނަވަސްކަންވެސް ނެތް ބައެކެވެ.

އަފްޣާނިސްތާނުގައި ހުންނަވާ ވޯލްޑް ފުޑް ޕްރޮގްރާމްގެ އިސް ވެރިޔާ ވަނީ، އަފްޣާނިސްތާނުގައި އިންސާނީ ކާރިޘާއެއް އުފެދުނަ ނުދިނުމަށްޓަކާ، އެ ޤައުމަށް ބައިނަލްއަޤުވާމީ އިތުރު އެހީ ބޭނުންވާ ކަމަށް ގޮވާލައްވާފައެވެ.