ރޯދަމަހު އެމްޓީސީސީން ދެމުންދާ ޚިދުމަތުގެ ވަގުތަށް ބަދަލު އައިނަމަވެސް ރައްޔިތުން އެދޭ ފުރިހަމަ ޚިދުމަތްތަކެއް ފޯރުކޮށްދޭނެކަމުގެ ޔަގީންކަން އެމްޓީސީސީން ދީފިއެވެ.

ރަަމަޟާންމަހު އެމްޓީސީސީގެ މަސައްކަތްތައް ކުރިއަށްގެންދަން ހަމަޖެހިފައިވާގޮތާ ގުޅޭގޮތުން "ރާއްޖެ ޓީވީ"ގައި ވާހަކަދައްކަވަމުން އެމްޓީސީސީގެ ސޭލްސް މެނޭޖަރު އަހުމަދު އިމާދު ރަޝީދު ވިދާޅުވީ އެމްޓީސީސީގެ އާއްމު ވިޔަފާރީގެ ޚިދުމަތް ހެނދުނު 9:00ން މެންދުރުފަހު 2:00ށް ލިބޭނެ ކަމަށެވެ. ނަމަވެސް މެންދުރުފަހު 3:00އާ ހަމައަށް އޮޕަރޭޝަން ކުރިއަށްދާނެ ކަމަށް އިމާދު ވިދާޅުވިއެވެ.

ހުރިހާ ކައުންޓަރަކުން ޚިދުމަތް ލިބޭނެކަން ފާހަގަކުރައްވައި އިމާދު ވިދާޅުވީ ރައްޔިތުން އެދޭފަދަ ފުރިހަމަ އަވަސް ޚިދުމަތްތަކެއް ފޯރުކޮށްދިނުމަށް އެމްޓީސީސީ އޮތީ ފުރިހަމައަށް ތައްޔާރަށް ކަމަށެވެ.

އެމްޓީސީސީގެ ރޯދަ ޕްރޮމޯޝަނަށް އިޝާރަތް ކުރައްވައި އިމާދު ވިދާޅުވީ ރޯދަމަހަކީ ގިނަ އޮޑިދޯނިފަހަރު ގެންގުޅޭ ފަރާތްތަކުން އޮޑިތައް އެހިލާފައި އޭގެ މަސައްކަތްތައް ކުރާ މަހެއް ކަމަށެވެ. މި ޕްރޮމޯޝަންއާއެކު އޮޑިދޯނީގެ ވެރިންނަށް ވަރަށް ބޮޑު ލުޔެއް ލިބޭނެ ކަމަށް އޭނާ ވިދާޅުވިއެވެ.

އިމާދު ވިދާޅުވީ ކޮވިޑް-19އާއި އަދިވެސް އިގްތިސާދަށް ދިމާވި ދަތިތާއެކު ފާއިތުވި ތިން އަހަރުގެ ތެރޭގައި އެމްޓީސީސީގެ "ކަށަވަރު ޝޯރޫމު"ގައި ޚާއްސަ ޕްރޮމޯޝަަން ކުރިއަށް ނުގެންދެވޭ ކަމަށެވެ. ނަމަވެސް މިއަހަރުގެ ޕްރޮމޯޝަން ވަރަށް ފުރިހަމަވާނެ ކަމަށް އޭނާ ވިދާޅުވިއެވެ.

މި ޕްރޮމޯޝަން ޚާއްސަކޮށްފައި ވަނީ އިންޑަސްޓްރިއަލް ބޯޓް ބިލްޑިން އެންޑް އިންޖިނިއަރިން އާއި ޓޫރިޒަމް ދާއިރާ އާއި ދަތުރުފަތުރުގެ ދާއިރާ އާއި މަސްވެރިކަމަށެވެ. އަދި އެ ދާއިރާތަކާ ގުޅުން ހުރި ގިނަ ޕްރޮޑަކްޓުތަކަކުން ޑިސްކައުންޓު ލިބޭނެ އެވެ. ޑިސްކައުންޓު ލިބޭ ޕްރޮޑަކްޓުތަކުގެ ތެރޭގައި ޔަންމާ އިންޖީނު، ސުޒުކީ އިންޖީނު، ސްޓޮކް ބޭޑާ ކޮމްޕޮސައިޓްސް އަދި ފައިބާ ގްލާސް މެޓީރިއަލްސް އަދި ކާސްޓްރޯލް ލުބްރިކަންޓް ހިމެނެ އެވެ. މީގެ އިތުރުން ސުޒުކީ އަދި ޔަންމާ ސްޕެއާ ޕާޓްސް އާއި މެރޯލް ސްޓިއަރިން ސިސްޓަމާއި ޓިއުބް، ޝެފްޓް، ޕްރޮޕެލާ ވެސް ހިމެނެ އެވެ.

މި އަހަރުގެ އެމްޓީސީސީގެ ރޯދަ ޕްރޮމޯ ކުރިއަށް ދާނީ އޭޕްރީލް މަހުގެ ނިޔަލަށެވެ.