ރޯދަމަހާއި ގުޅިގެން މޯލްޑިވިއަން ބްލަޑް ސަރވިސަސްއިން ދެމުންދާ ޚިދުމަތްތަކަށް ބަދަލު ގެނެސްފި

ރޯދަމަހާއި ގުޅިގެން މޯލްޑިވިއަން ބްލަޑް ސަރވިސަސްއިން ދެމުންދާ ޚިދުމަތްތަކަށް ބަދަލު ގެނެސްފިއެވެ.

ބްލްޑް ސަރވިސްއިން ބުނީ 25 މާރިޗު 2023ން ފެށިގެން 1444 ވަނަ އަހަރުގެ ރަމަޟާންމަހާއި ޝައްވާލުމަހުގެ ފުރަތަމަ 7 ދުވަހު އެ ސަރވިސަސްއިން ފޯރުކޮށްދޭ ޚިދުމަތްތަކުގެ ގަޑިތަކަށް ބަދަލު ގެނެވިފައިވާ ކަމަށެވެ. އަދި އެ ސަރވިސަސް ހުޅުވިފައި ހުންނާނީ ކޮންމެ ހަފްތާއެއްގެ ހޮނިހިރު ދުވަހުން ފެށިގެން ބުރާސްފަތި ދުވަހުގެ ނިޔަލަށް ހެނދުނު 9:00ން 03:00ށް އަދި ރޭގަނޑު 8:00ން 02:00 އަށެވެ.

އެގޮތުން އެޗް.ބީ ބެލުމާއި ކްރޮސްމެޗް ހެދުމަށް ސާމްޕަލްނެގުންގެ ޚިދުމަތް ހެނދުނު 9:00ން މެންދުރުފަހު 14:30ށް އަދި ރޭގަނޑު 8:00ން 00:00ށް ، ތެލެސީމިއާ ސްކްރީނިންގެ ޚިދުމަތް ހެނދުނު 09:15ން މެންދުރު 12:00ށް، ތެލެސީމިއާ ކާޑް ދޫކުރުން ހެނދުނު 9:15ން މެންދުރު 12:00ށް، ޑޯނަރުން ގައިން ލޭ ނެގުން ހެނދުނު 9:00ން މެންދުރުފަހު 14:00ށް އަދި ރޭގަނޑު 8:00ން 1:00ށް ޑޯނަރުން ގައިން އެފެރެސިސްކޮށް ލޭ ނެގުން ހެނދުނު 9:00ން މެންދުރުފަހު 13:00ށް އަދި ރޭގަނޑު 8:00ން 23:00ށް، ބޭސް ދޫކުރުމުގެ ޚިދުމަތް ހެނދުނު 9:00ން މެންދުރުފަހު 14:30ށް އަދި ރޭގަނޑު 9:00ން 1:30ށް ދިނުމަށް ހަމަޖެހިފައިވެއެވެ.

މީގެ އިތުރުން ޔުނިޓް-1 އަދި ޔުނިޓް-2 އަކުން ލޭ ގުޅައިދިނުމުގެ ޚިދުމަތް ހެނދުނު 9:00ން 9:30ށް ހުރިހާ އުމުރެއްގެ ކުދިންނަށް ލިބޭނެ އެވެ. އަދި ރޭގަނޑު 8:00ން 8:30ށް 12 އަހަރުން މަތީގެ ކުދިންނަށް އެ ޚިދުމަތް ލިބޭނެ ކަމަށް ބްލަޑް ސަރވިސްއިން ބުނެއެވެ.

އެސަރވިސްއިން ބުނީ ޑޮކްޓަރުން ބެއްލެވުން ހެނދުނު 9:00ން މެންދުރުފަހު 2:45ށް، ރޭގަނޑު 8:00ން 1:45ށް ކުރިއަށްދާއިރު، އައިޖީއެމްއެޗް ޓެސްޓްތަށް ހެދުމަސް ސާމްޕަލް ނެގުމުގެ ޚިދުމަތް ހެނދުނު 9:00ން މެންދުރުފަހު 14:30ށް ކުރިއަށްދާނެ ކަމަށެވެ.

ޑޯނަރުން ގައިން ލޭ ނެގުމަށްފަހު، ކުއްޖާ ގައިން މެންދުރު 12:00 ގެ ފަހުން ނަގާ ސާމްޕަލްގެ ކްރޮސްމެޗް ނިމޭނީ އެރޭ 22:30 ގައެވެ. ރޭގަނޑު 10:30 ގެ ފަހުން ނަގާ ސާމްޕަލްގެ ކްރޮސްމެޗް ނިމޭނީ ޖެހިގެން އަންނަ ދުވަހުގެ ހެނދުނު 11:30 ގައެވެ. އަދި ޖެހިގެން އަންނަ ދުވަހަކީ ބަންދު ދުވަހެއް ކަމުގައިވާނަމަ ކްރޮސްމެޗް ހެދުމަށް ސާމްޕަލް ނެގޭނީ އެދުވަހުގެ ރޭގަނޑު 22:30 ގެ ކުރިން ކަމަށް ބްލަޑް ސަރވިސްއިން ބުނެއެވެ.

އެހެންކަމުން ހުރިހާ ފަރާތްތަކުން ވެސް މިވަގުތުތަކަށް ސަމާލުވުމަށް ވަނީ އިލްތިމާސްކޮށްފައެވެ.