ބަނޑޮސް މޯލްޑިވްސްގެ އަހަރީ ދުވަސް ފާހަގަކުރަން ލޭ ހަދިޔާކުރުމުގެ ޕްރޮގްރާމެއް
15 ސެޕްޓެމްބަރު 2022 | ބުރާސްފަތި 07:30މި ހަރަކާތުގައި ލޭ ހަދިޔާކޮށްފައިވަނީ 50 މީހުން
ބަނޑޮހުގައި ބޭއްވި ލޭ ހަދިޔާކުރުމުގެ ޕްރޮގްރާމްގެ ތެރެއިން
ބަނޑޮސް މޯލްޑިވްސްގެ 50 ވަނަ އަހަރީ ދުވަސް ފާހަގަކުރުމުގެ ގޮތުން ލޭ ހަދިޔާކުރުމުގެ ޕްރޮގްރާމެއް ބާއްވައިފިއެވެ.
ލޭ ހަދިޔާކުރުމުގެ ޕްރޮގްރާމް ފެށުމަށް ބޭއްވި ރަސްމިއްޔާތަށް ފަހު ރާއްޖެއެމްވީ އަށް މައުލޫމާތުދެއްވަމުން ބަނޑޮސް މޯލްޑިވްސްގެ ޖެނެރަލް މެނޭޖަރު އިސްމާއިލް ރަޝީދު ވިދާޅުވީ އެ ރިސޯޓުން އަބަދުވެސް ސީއެސްއާރު ނުވަތަ އިޖުތިމާއީ ޒިންމާގެ ދަށުން ގިނަ ހަރަކާތްތަކެއް ހިންގަމުންދާ ކަމަށެވެ. އެގޮތުން ލޭ ހަދިޔާކުރުމުގެ ޕްރޮގްރާމްތައް މީގެ ކުރިން ވެސް ހިންގާފައިވާނެކަން އޭނާ ފާހަގަކުރެއްވިއެވެ. އަދި މި ފަހަރު މިފަދަ ހަރަކާތެއް ކުރިއަށް ގެންދަނީ އަހަރީ ދުވަހާއި ގުޅުވައިގެން ކަމަށް ވާއިރު ސްޓާފުންގެ ފަރާތުން އެ ހަރަކާތަށް ވަރަށް ރަނގަޅު އެއްބާރުލުމެއް ލިބުނުކަން އޭނާ ވަނީ ފާހަގަކުރައްވާފައެވެ. އަދި ކުރިއަށް އޮތްތަނުގައި ވެސް ބަނޑޮސް ފެނިގެންދާނީ މިފަދަ އިޖުތިމާއީ ކަންކަމުގައި ހަރަކާތްތެރިވާ ބައެއްގެ ގޮތުގައި ކަމަށް އޭނާ ވަނީ ވިދާޅުވެފައެވެ.
މި ހަރަކާތާއި ގުޅިގެން މޯލްޑިވްސް ބްލަޑް ޑޮނަރސްގެ މެޑިކަލް އޮފިސަރު ޑރ.ނޫރް މުހައްމަދު ރާއްޖެއެމްވީއަށް ވިދާޅުވީ ރިސޯޓަކުން އިސްނަގައިގެން މިފަދަ ހަރަކާތެއް ހިންގުމުން ވަރަށް އުފާކުރައްވާ ކަމަށެވެ. ރާއްޖެ އަކީ ތެލެސީމިއާ ކުދިންނާއި އެހެން ބަލި މީހުންނަށް ލޭ ބޭނުންވާ މީހުން ގިނަތަނަކަށް ވާއިރު، ވީހާވެސް ގިނަ މީހުން ލޭ ހަދިޔާ ކުރުމަކީ އެ ސަރވިސަސްގެ ވަރަށް ބޮޑު އެދުމެއް ކަމަށާއި ކުރިއަށް އޮތްތަނުގައި އިތުރު ރިސޯޓްތަކުގައި ވެސް މިފަދަ ހަރަކާތްތައް ކުރިއަށް ގެންދާނެ ކަމަށް އުންމީދުކުރައްވާ ކަމަށް އޭނާ ވިދާޅުވިއެވެ.
މި ހަރަކާތުގައި ލޭ ހަދިޔާކޮށްފައި ވަނީ 50 މީހުންނެވެ.
