ޕޮލިސް ރިސަރޗް އެންޑް އިނޮވޭޝަން ކޮންފަރެންސުން އެއްވަނަ ދިރާސާ ކަރުދާހަކަށް ހައުލާ ރަމީޒް ހުށަހެޅުއްވި ދިރާސާ ކަރުދާސް
22 މާރިޗު 2023 | ބުދަ 02:06މިއީ ރާއްޖޭގައި މިކަހަލަ ކޮންފަރެންސެއް ބޭއްވި ފުރަތަމަ ފަހަރު
ޕޮލިސް ރިސަރޗް އެންޑް އިނޮވޭޝަން 2023 ކޮންފަރެންސް ނިންމުމުގެ ރަސްމިއްޔާތުގައި ހައުލާ ރަމީޒަށް އިނާމު ހަވާލުކޮށްދެއްވަނީ | ރައީސް އޮފީސް
ޕޮލިސް ރިސަރޗް އެންޑް އިނޮވޭޝަން ކޮންފަރެންސްގެ ނިންމުމުގެ ރަސްމިއްޔާތު ބާއްވައިފިއެވެ.
މި ކޮންފަރެންސަކީ ފުލުހުންގެ މަސައްކަތާގުޅޭ މުހިންމު މައުލޫމާތުތައް ހޯދައި އެ މައުލޫމާތުތަކުގެ އަލީގައި ފުލުހުންގެ މުއައްސަސާއިން ދެމުންގެންދާ ޚިދުމަތް ހަރުދަނާކުރެވޭނެ މަގެއް ހޯދުމުގެގޮތުން، ޕޮލިސް ބޯޑާއި މިނިސްޓްރީ އޮފް ހޯމް އެފެއަރޒާއި އަދި ދިވެހި ފުލުހުންގެ ޚިދުމަތް ގުޅިގެން ކުރިއަށް ގެންދިޔަ ކޮންފަރެންސެކެވެ.
ޕޮލިސް ރިސަރޗް އެންޑް އިނޮވޭޝަން ކޮންފަރެންސްގެ ނިންމުމުގެ ރަސްމިއްޔާތުގެ ތެރެއިން ދިރާސާ ކަރުދާސް ހުށަހެޅުއްވި ފަރާތްތަކަށް އިނާމު ވަނީ ހަވާލުކޮށްދެއްވާފައެވެ. އިނާމުތައް ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމެވެ.
އެގޮތުން ދިރާސާ ކަރުދާސް ހުށަހެޅުއްވި ފަރާތްތަކުގެ ތެރެއިން އެއްވަނައަށް ހޮވުނީ އިންޑަސްޓްރިއަލް ރިލޭޝަންސް ސައިކޮލޮޖިސްޓް ހައުލާ ރަމީޒް ހުށަހެޅުއްވި ދިރާސާ ކަރުދާހަށެވެ. އަދި ދެވަނައަށް ހޮވުނީ ޑރ. އަބްދުއް ސައްތާރު އަބްދުއްރަހްމާން ހުށަހެޅުއްވި ދިރާސާ ކަރުދާހަށެވެ.
މި ކޮންފަރެންސްގެ މަޤްޞަދުގެ ތެރޭގައި މަދަނީ ޖަމުޢިއްޔާތަކާއި ދިރާސާކުރާ ފަރާތްތަކާއި ކިޔަވާކުދިންނާއި ކޮމިއުނިޓީ ލީޑަރުންނާއި ސިޔާސަތުތައް ބައްޓަންކުރާ ފަރާތްތަކާއި ސަލާމަތާއި ރައްކާތެރިކަމުގެ ސިނާޢަތުގެ ތަޖުރިބާކާރުންނާއެކު ގުޅުން ބަދަހިކޮށް އަދި އެފަރާތްތަކުގެ ޢިލްމީ ހޯދުންތަކާއި ތަޖުރިބާތައް ޙިއްޞާކުރުން ހިމެނެއެވެ. ތަފާތު ދާއިރާތަކުގެ ތަޖުރިބާކާރުންގެ ދިރާސާ ކަރުދާސްތައް ހުށަހެޅިގެން ދިޔަ މި ކޮންފަރެންސް ބާއްވާފައި ވަނީ މި މާރިޗު މަހުގެ 18 އިން 20 އަށެވެ.
ތިން ދުވަހަށް ކުރިއަށްގެންދިޔަ މި ކޮންފަރެންސް ކުރިއަށް ގެންގޮސްފައިވަނީ މައިގަނޑު ތިން ބަޔަކަށް ބަހާލައިގެންނެވެ. އެގޮތުން ސަލާމާތާއި ރައްކާތެރިކަމާގުޅޭ ތަފާތު 10 ދާއިރާއިން ދިރާސާ ކަރުދާސް ހުށަހަޅާފައިވާއިރު މުޖުތަމައާ ގުޅިގެން ފުލުހުންގެ ޚިދުމަތް ދިނުމާއި ކުށްކުރުން ހުއްޓުވުމަށް ކުރެވިދާނެ މަސައްކަތާ ގުޅޭގޮތުން މަޝްވަރާކުރުން ވެސް ވަނީ ކުރިއަށް ގެންގޮސްފައެވެ.
ސަލާމާތާއި ރައްކާތެރިކަމާގުޅޭ ތަކެއްޗާއި ޚިދުމަތާއި ތަމްރީން ދިނުމުގައި ހަރަކާތްތެރިވާ ފަރާތްތަކަށް، އެފަރާތްތަކުގެ ޚިދުމަތް އާއްމު ރައްޔިތުންނާ ހިއްސާ ކުރެވޭނެ ފަސޭހަ މަގެއް ހޯދައި ދިނުމަށް ޚާއްޞަ އެކްސްޕޯއެއް ކުރިއަށް ގެންގޮސްފައިވާއިރު އެކްސްޕޯގެ ތެރެއިން މިދާއިރާގައި ހުރި ވަޒީފާގެ ފުރުސަތުގެ މައުލޫމާތު ވެސް ވަނީ ފޯރުކޮށްދީފައެވެ.
