ބެލެނިވެރިން ކުދިންނަށް އިސްލާމީ ރިވެތި އުސޫލުން ނަމޫނާ ދައްކަންޖެހޭ: ކޮމިޝަނަރު

ބެލެނިވެރިން ކުޑަކުދިން ބެލެހެއްޓުމުގައި އެކުދިންގެ ހައްގުތަކަށް ރައްކާތެރިވެ، އިސްލާމީ ރިވެތި އުސޫލުން ނަމޫނާ ދެއްކުމަށް މަސައްކަތް ކުރަންޖެހޭ ކަމަށް, ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.

މާފުށީ ސްކޫލުގެ ޕްރައިޒް ގިވިންގ ޑޭ ޝަރަފްކޮށްދެއްވައި ވާހަކަފުޅުދައްކަވަމުން ކޮމިޝަނަރ ވިދާޅުވީ، ތައުލީމަކީ ނިމުމެއް ނެތް މަސައްކަތެއް ކަމަށާއި، ކޮންމެ ދުވަހަކީ އައު އިލްމެއް ނުވަތަ ހުނަރެއް ދަސްކުރަންޖެހޭ ދުވަހަކަށް ހަދަންޖެހޭކަމަށެވެ. ރިވެތި އަޚުލާޤާއި ސުލޫކު ދެއްކުމަށާއި، ތައުލީމު އުގެނުމުގެ އިތުރުން ދިރިއުޅުމުގެ ހުނަރުތައް ދަސްކުރަން މަސައްކަތް ކުރުމަށް ދަރިވަރުންނަށް އޭނާ ނަސޭހަތްތެރިވެވަޑައިގަތެވެ. މީގެ އިތުރުން ބެލެނިވެރިން ކުޑަ ކުދިން ބެލެހެއްޓުމުގައި އެކުދިންގެ ހައްގުތަކަށް މިހާރަށްވުރެ ބޮޑަށް ރައްކާތެރިވުމަށާއި، ކުދިންނަށް އިސްލާމީ ރިވެތި އުސޫލުން ނަމޫނާ ދެއްކުމަށް މަސައްކަތް ކުރަންޖެހޭ ކަމަށް ކޮމިޝަނަރ ވިދާޅުވިއެވެ.

ކުދިން ކަންކަން ދަސްކުރަނީ އެކުދިންގެ ވަށައިގެންވާ މާހައުލުންކަން ފާހަގަކުރައްވައި ކޮމިޝަނަރ ވިދާޅުވީ، ފުރަތަމަ ނަމޫނާ ދައްކާ ބަޔަކަށް ބެލެނިވެރިން ވާންޖެހޭ ކަމަށެވެ.

ކޮމިޝަނަރ ވިދާޅުވީ ފުރަތަމަ މުވައްސަސާއަކީ އިންސާނާކަމަށާއި އަމިއްލަ މީހާގެ ސިފަތައް އިސްލާހުކުރުމަށް މަސައްކަތްކޮށް އަމިއްލަ ނަފްސަށް ތެދުވެރި މީހަކަށް ވުމަށް މަސައްކަތް ކުރަންޖެހޭ ކަމަށެވެ. އެއަށްފަހު އާއިލާގެ ތެރޭގައި އެކަކު އަނެއްކަށް އިހްތިރާމްކޮށް އެހީތެރިވާންޖެހޭ ކަމަށާއި، ރަސްމީ ތައުލީމު ފެށޭ ހިސާބުން ސުކޫލް މަދަރުސާއިން ރަސްމީ ތައުލީމު ދަރިވަރުންނަށް ފުރިހަމައަށް އުގަންނައިދިނުމަށް މަސައްކަތްކުރަން ޖެހޭކަމަށް ވިދާޅުވިއެވެ.

މުދައްރިސުން ކުރަމުންދާ މަސައްކަތްތަކަށް އިޝާރާތްކުރައްވައި ކޮމިޝަނަރ ވިދާޅުވީ، މުދައްރިސުން ކުރާ ބުރަ މަސައްކަތުން ގައުމުގައި ހަރުދަނާ މަސައްކަތްތެރިން އުފެދެމުންދާ ކަމަށާއި، އަދުގެ ޖީލު ބިނާކުރުމުގައި މުދައްރިސުން ކުރާ މަސައްކަތް ނިމުމެއް ނެތް ޝުކުރު ހައްގުކަމަށެވެ.

މީގެ އިތުރުން ކޮމިޝަނަރ ވަނީ މާފުށީ ސްކޫލުގެ ދަރިވަރުންގެ ތެރެއިން އޯލެވަލް އިމްތިހާނުން އެކިވަނަތައް ހޯދި ދަރިވަރުންނަށް މަރުހަބާ ވިދާޅުވެފައެވެ. އޯލެވެލްއިން އެކަށީގެންވާ ނަތީޖާއެއް ނުލިބުނު ދަރިވަރުން މާޔޫސް ނުވުމަށާއި، ހިތްވަރާއެކު މަސައްކަތް ކުރުމަށް ހިތްވަރު ދެއްވިއެވެ. އަދި ލިބޭ ފުރުސަތުތަކުގެ ބޭނުން ހިފައި ހުނަރުވެރި ތައުލީމީ މީހަކަށް ވުމަށް ގަދައަޅައި މަސައްކަތްކުރަން ޖެހޭކަމަށް ވިދާޅުވިއެވެ.

ކޮމިޝަނަރ ވިދާޅުވީ ލީޑަރަކަށްވުމަށް ކޮންމެ ކުއްޖަކުވެސް މަސައްކަތްކުރަން ޖެހޭކަމަށާއި، ކްލާހެއް ލީޑުކުރެވޭނަމަ އެކުއްޖަކަށް ސްކޫލެއްގެ ލީޑަރަކަށް ވެވިދާނެކަމަށެވެ. އަދި ސްކޫލެއްގެ ލީޑަރަކަށްވެވޭނަމަ ރަށެއްގެ ލީޑަރަކަށް ވެވިދާނެ ކަމަށާއި، ރަށެއް ލީޑަރަކަށް ވެވޭމީހަކަށް ގައުމުގެ ލީޑަރަކަށް ނުވެވޭ ސަބަބެއް ނެތްކަމަށެވެ.