ޑީ.އާރު.ޕީ އާއި އެމް.އެލް.އެސް.ޑީ.ޕީ އުވާލައިފި
ދެ ޕާޓީވެސް އުވާލީ 300 މެމްބަރުން ހަމަނުވާތީ
އިލެކްޝަންސް ކޮމިޝަން
މޯލްޑިވްސް ލޭބަރ އެންޑް ސޯޝަލް ޑިމޮކްރެޓިކް ޕާޓީ (އެމް.އެލް.އެސް.ޑީ.ޕީ)، އަދި ދިވެހިރައްޔިތުންގެ ޕާޓީ (ޑީއާރުޕީ) އިލެކްޝަންސް ކޮމިޝަނުގެ ސިޔާސީ ޕާޓީގެ ދަފްތަރުން އުނިކޮށްފިއެވެ.
މިކަން ހާމަނަކޮށް އީސީން ބުނީ އެ ދެ ޕާޓީ އުވާލީ ސިޔާސީ ޕާޓީގެ ޤާނޫނު ގެ 12 ވަނަ މާއްދާއިން ސިޔާސީ ޕާޓީއެއް ވުޖޫދުގައި އޮތުމަށް ޤާނޫނު ލާޒިމުކުރާ 3000 (ތިންހާސް) މެންބަރުން ހަމަނުވާތީ ކަމަށެވެ. އެގޮތުން ދެ ޕާޓީއަށްވެސް މެމްބަރުން ހަމަ ކުރުމަށް ތިން މަސް ދުވަހުގެ މުއްދަތެއް ދީފައިވާ ކަމަށާއި އެ މުއްދަތުގައި ޤާނޫނު ލާޒިމްކުރާ އަދަދަށް މެންބަރުން ހަމަކޮށްފައި ނުވާ ކަމަށް ވެސް ވަނީ ބުނެފައެވެ.
ސިޔާސީ ޕާޓީގެ ޤާނޫނުގެ 30 ވަނަ މާއްދާގެ (ހ) ގެ 1 ވަނަ ނަންބަރުގައިވާ ގޮތުގެ މަތިން ޕާޓީ އުވާލުމަށް ނިންމާ، ޕާޓީގެ ދަރަންޏަށް ޒިންމާވާނެ ފަރާތެއް އެންގުމަށް ދެވުނު މުއްދަތުގައި، ދަރަންޏަށް ޒިންމާވާނެ ފަރާތެއް އަންގާފައިނުވާ ކަމަށް ވެސް އީސީން ވަނީ ބުނެފައެވެ. އަދި އެ ދެ ޕާޓީގެ ދަރަންޏަށް ޒިންމާވާނީ ސިޔާސީ ޕާޓީގެ ގަވާއިދުގެ 29 ވަނަ މާއްދާގެ (ބ) ގައި ވާގޮތުގެ މަތިން އެ ދަރަންޏެއް އުފެދުނުއިރު ޕާޓީގެ އެންމެ އިސްފަރާތެއްގެ ގޮތުގައި ހުންނެވި ފަރާތްކަމުގައި ވަނީ ކަނޑައަޅައިފައެވެ.
ޑީއާރުޕީއަކީ ރާއްޖޭގައި އެންމެ ގިނަ ދުވަސްވީ އެއް ސިޔާސީ ޕާޓީއެވެ. އެ ޕާޓީ އުވާލިއިރު އެންމެފަހުން ޕާޓީގެ ލީޑަރަކަށް ހުންނެވީ ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުއެވެ. ނަމަވެސް ޖާބިރު ވަނީ ޕާޓީ ލީޑަރުގެ މަގާމުން އިސްތިއުފާ ދެއްވައި އައު ޕާޓީއެއް އުފެއްދުމަށް ހުށަހަޅުއްވާފައެވެ.
