ބްރެޒިލްގެ ކުރީގެ ރައީސްގެ އަތްޕުޅުގައި ހުރި، ޓެކްސް ޑިކްލެއަރ ނުކުރާކަމަށް ބެލެވޭ ޖަވާހިރުތަކެއް އިދާރާތަކާ ހަވާލުކުރަނީ
ރިޕޯޓްތަައް ބުނާގޮތުން، 2021ގައި ޓެކްސް އެޖެންޓުން ވަނީ ޖަވާހިރު ހުރި ޕެކޭޖެއް ސީލްކޮށްފައި
ބްރެޒިލްގެ ރައީސް ބޮލްސޮނާރޯ
ބްރެޒިލްގެ ކުރީގެ ރައީސް ޖެއިރް ބޮލްސޮނާރޯގެ މައްޗަށް, ޓެކްސްއަށް މަކަރު ހެއްދެވިކަމުގެ ތުހުމަތު ކުރެވިފައި ވަނިކޮށް، ޓެކްސް ދެއްކުމަކާ ނުލައި އެ ގައުމަށް އެތެރެކުރެއްވިކަމަށް ބެލެވޭ ޖަވާހިރުތަކެއް ކަމާބެހޭ އިދާރާތަކާ ހަވާލުކުރެއްވުމަށް ނިންމަވައިފިއެވެ.
ޖެއިރް ބޮލްސޮނާރޯގެ ވަކީލުންނާ ހަވާލާދީ މީޑިއާތަކުން ރިޕޯޓްކޮށްފައިވާ ގޮތުން، އޭނާ އިދާރާތަކާ ހަވާލުކުރެއްވުމަށް ނިންމަވާފައިވާ ޖަވާހިރުތަކަކީ ސައޫދީ އަރަބިއްޔާއިން އޭނާއަށް ހަދިޔާގެގޮތުގައި ލިބިވަޑައިގެންފައިވާ ތަކެއްޗެވެ. އަދި އެ ތަކެތި ބްރެޒިލްއަށް އެތެރެކުރައްވާފައިވަނީ ޓެކްސް އޮތޯރިޓީތަކަށް ޑިކްލެއަރ ކުރުމަކާ ނުލައި ކަމަށް، ހޯމަ ދުވަހު އެ ގައުމުގެ މީޑިއާތަކުން ވަނީ ރިޕޯޓްކޮށްފައެވެ. ޖެއިރް ބޮލްސޮނާރޯގެ މައްޗަށް މި މައްސަލާގައި ތަހުގީގެއްވެސް ދަނީ ކުރަމުންނެވެ. ބްރެޒިލްގެ ޓެކްސް އެޖެންސީއާއި ފެޑެރަލް ފުލުހުން ދަނީ މި މައްސަލައާ ގުޅިގެން ޚާއްޞަ ތަހުގީގެއް ކުރަމުންނެވެ.
މި މައްސަލަ ފެންމަތިވީ އެ ގައުމުގެ ނޫހެއްކަމަށްވާ އެސްޓަޑޯ ޑި ސައޯ ޕައުލޯގައި އެ ވާހަކަ ރިޕޯޓްކުރުމާ އެކުގައެވެ. ރިޕޯޓްތަައް ބުނާގޮތުން 2021ގައި ޓެކްސް އެޖެންޓުން ވަނީ ޖަވާހިރު ހުރި ޕެކޭޖެއް ސީލްކޮށްފައެވެ. އެތަކެތީގެ އަގު 3.2 މިލިއަން ޑޮލަރަށް އަރާނެ ކަމަށްވެސް ރިޕޯޓްތައް ބުނެއެވެ. މިތަކެތި ފެނިފައިވަނީ 2021 ވަނަ އަހަރުގެ އޮކްޓޯބަރު މަހުގެ ތެރޭގައި ރަސްމީ ދަތުރުފުޅެއްގައި މެދުއިރުމައްޗަށް ވަޑައިގަތުމަށްފަހު އެބުރި ވަޑައިގަތް އޮފިޝަލެއްގެ ދަބަހުންނެވެ. އެ އޮފިޝަލަކީ މިނިސްޓްރީ އޮފް މައިންސްގެ އޮފިޝަލެކެވެ.
އެއާއެކު ސަރުކަރުގެ އެހެން ޑެލިގޭޝަންތަކަށް ގަހަނާތައް ލިބުނުކަން ވަނީ ހާމަވެފައެވެ. ބްރެޒިލްގެ ކުރީގެ ރައީސް ޖެއިރް ބޮލްސޮނާރޯ ވަނީ ގަލަމަކާއި ގަޑިއެއްގެ އިތުރުން، އަގުބޮޑު އެހެން ސާމާނުވެސް ގެންގުޅުއްވާފައެވެ. އެ ތަކެއްޗަކީ މެދުއިރުމަތިން ލިބުނު ތަކެތިކަމަށް ތުހުމަތުކުރާއިރު، ކުރިން އެމަނިކުފާނު ވިދާޅުވެފައިވަނީ އެ ތަކެއްޗަކީ ހަދިޔާތައް ކަމަށާއި، އެތަކެތި ގެންގުޅުއްވީ ގާނޫނާ އެއްގޮތަށް ކަމަށެވެ. އޭގެ ފަހުން، ނިމިދިޔަ ހަފުތާގެ ތެރޭގައި ބްރެޒިލްގެ ފެޑެރަލް ކޯޓް އޮފް އެކައުންޓްސް (ޓީސީޔޫ)އިން ވަނީ އެފަދަ ތަކެތި ތަހުގީގުގެ ބޭނުމަށް ހަވާލުކުރުމަށް އަންގާފައެވެ. އަދި ޓެކްސް ޑިކްލެއަރޭޝަންއާ އެއްގޮތަށް ތަކެތި ޑިކްލެއަރ ނުކޮށް ވާތީ އެކަމުގެ ކަންބޮޑުވުން ވަނީ ފާޅުކޮށްފައެވެ.
