ބޮކުރީ އަލުން ވިކްޓަރީ އަށް
13 މާރިޗު 2023 | ހޯމަ 05:57އޭނާ އަކީ ވިކްޓަރީ އަށް ސޮއިކުރި ހަތަރު ވަނަ ކުޅުންތެރިޔާ
ބޮކުރީ (ވ) ބޯޑު މެންބަރު އިސްމާއީލް ޝަރީފާއެކު ވިކްޓަރީގެ ޖާޒީ ދައްކާލަނީ
ދެވަނަ ޑިވިޝނުގައި ވާޑަކުރަން ތައްޔާރުވާ ވިކްޓަރީ ސްޕޯޓްސް ކުލަބުން ތަޖުރިބާކާރު ކުޅުންތެރިޔާ ހުސައިން ނިޔާޒް މުހައްމަދު (ބޮކުރީ)ގެ ސޮއި ހޯދައިފި އެވެ.
މިދިޔަ އަހަރު އުފަން ރަށް މަހިބަދޫ ސްޕޯޓްސްއިން ފެނުނު ބޮކުރީ އަކީ އެންމެ ފުރަތަމަ ވިކްޓަރީ ސްޕޯޓްސް ކުލަބުން ވިދާލި ކުޅުންތެރިއެކެވެ. އޭނާ ވަނީ ވިކްޓަރީ 2000ގެ މެދުތެރޭގައި ހޯދި ކާމިޔާބީތަކުގައި މުހިންމު ދައުރެއް އަދާކޮށްދީފަ އެވެ. ފުރަތަމަ ޑިވިޝަނުގައި ބޮކުރީ އެންމެ ފަހުން ފެނިގެންދިޔައީ މީގެ ދެ އަހަރު ކުރިން ކްލަބް ވެލެންސިއާއިންނެވެ.
ބޮކުރީ އަކީ އަލުން ފުރަތަމަ ޑިވިޝަނަށް ކޮލިފައިވުމަށް މަސައްކަތް ކުރަމުން އަންނަ ރާއްޖޭގެ އެންމެ ކާމިޔާބު އެއް ކުލަބު ވިކްޓަރީ އަށް ސޮއިކުރި ހަތަރު ވަނަ ކުޅުންތެރިޔާ އެވެ. އޭނާގެ ކުރިން އެ ޓީމުން ވަނީ ގައުމީ ޓީމުގެ ކެޕްޓަން އަކްރަމް އަބްދުލްގަނީ އާއި މުހައްމަދު އުމޭރުގެ ސޮއި ހޯދާފަ އެވެ. މީގެ އިތުރުން ވެލެންސިއާގެ ކޮންޓްރެކްޓްގައި ހުރި ހުސައިން ފައިސަލް ލައްވައި ވެސް ވިކްޓްރީން ސޮއިކުރުވާފައިވެ އެވެ.
މި އަހަރުގެ ފަހުކޮޅު ބާއްވާ ދެ ވަނަ ޑިވިޝަނަށް އެންމެ ބާރަށް ތައްޔާރުވަމުން އަންނަ ކުލަބަކީ ވެސް ވިކްޓަރީ އެވެ. ދެ ވަނަ ޑިވިޝަނުގައި ހިމެނޭ 10 ކުލަބުގެ ތެރެއިން ފުރަތަމަ ޑިވިޝަނުން ޖާގަ ލިބޭނީ ޗެމްޕިއަންކަން ހޯދާ ޓީމަށެވެ.
