ފޮރިން އެކްސްޗޭންޖް ނިޒާމުގައި ހުރި މައްސަލަތައް ހައްލުކުރުމަށް އެމްއެމްއޭއިން ދަނީ ޑީ-ޑޮލަރައިޒޭޝަން ސްޓްރެޓަޖީއެއް އެކުލަވާލައި ފިޔަވަޅު އަޅަމުން - އަމީރު
ބޭރު ފައިސާ ގަނެ، ޔަގީންކުރެވޭ މިންވަރަށް ލިޔެކިޔުން ބަލަހައްޓާފައިވާނަމަ، މި ހަރަދު ޓެކްސް ފައިލްކުރުމުގައި ހިމެނުމުގައި ހުރަހެއް ނެތް
ފިނޭންސް މިނިސްޓަރު އިބްރާހީމް އަމީރު
ފޮރިން އެކްސްޗޭންޖް ނިޒާމުގައި ހުރި މައްސަލަތައް ހައްލުކުރުމަށް މޯލްޑިވްސް މަނިޓަރީ އޮތޯރިޓީން ދަނީ ޑީ ޑޮލަރައިޒޭޝަން ސްޓެރެޓަޖީއެއް އެކުލަވާލައި ފިޔަވަޅުތައް އަޅަމުން ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
މިނިސްޓަރު އަމީރު މިހެން ވިދާޅުވީ، ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު، ލިޔުމުން ޖަވާބު ހޯއްދެވުމަށް ފޮނުއްވި ސުވާލުގެ ޖަވާބުގައެވެ.
މިނިސްޓަރު އަމީރު ލިޔުމުން ފޮނުއްވި ޖަވާބު މަޖިލީހަށް އިއްވަމުން އަމީންއާއްމު ވިދާޅުވީ ޓެކްސްގެ ބޭނުމަށް ވިޔަފާރިތަކުން ހިސާބުތައް ތައްޔާރުކުރުމުގައި އަމަލުކުރަންޖެހެނީ އިންޓަރނޭޝަނަލް އެކައުންޓިންގ ސްޓޭންޑަޑްތަކާއި އެއްގޮތަށް ކަމަށެވެ. ރަސްމީ ބޭންޑަށްވުރެ މަތީ ބޭންޑަކުން ވިޔަފާރިތަކުން ބޭރު ފައިސާ ގަނެ، ކޮސްޓް އޮފް ސޭލްސްގެ ތެރޭގައި މި ހަރަދު ހިމެނޭކަން ޔަގީންކުރެވޭ މިންވަރަށް ލިޔެކިޔުން ބަލަހައްޓާފައިވާނަމަ، މި ހަރަދު ޓެކްސް ފައިލްކުރުމުގައި ހިމެނުމުގައި ހުރަހެއް ނެތް ކަމަށެވެ.
އަދި ފޮރިން އެކްސްޗޭންޖް ނިޒާމުގައި ހުރި މައްސަލަތައް ހައްލުކުރުމަށް މޯލްޑިވްސް މަނިޓަރީ އޮތޯރިޓީން ދަނީ ޑީ ޑޮލަރައިޒޭޝަން ސްޓެރެޓަޖީއެއް އެކުލަވާލާ ފިޔަވަޅުތައް އަޅަމުން ކަމަށެވެ.
މިނިސްޓަރުގެ ޖަވާބާއި ގުޅިގެން މެންބަރު އިބްރާހީމް ރަޝީދު ވަނީ ނިޒާމީ ނުކުތާއެއް ނަންގަވާފައެވެ.
މިކަމާއި ގުޅިގެން މަޖިލީހުގެ ރިޔާސަތުން، ރައީސް މުހައްމަދު ނަޝީދު ވިދާޅުވީ އެކަން އަންނަނީ ކަމުގައި ޖަވާބުގައި ވިދާޅުވެފައިވާ ކަމަށެވެ.
