ރާއްޖޭގެ ވޯޓު ލެވޭ އާބާދީގެ 42 އިންސައްތަ ޕާޓީއެއްގައި ނޫޅޭ
ރިޔާސީ އިންތިޚާބުގައި ވޯޓު ލެވުމުގެ ޙައްގު ލިބިފައިވަނީ 283،272 މީހުންނަށް
ވޯޓުލުމުގެ މަސައްކަތް ކުރިއަށްދަނީ
މިއަހަރު އޮންނަ ރިޔާސީ އިންތިޚާބުގައި ވޯޓު ލެވޭ އާބާދީގެ 42 އިންސައްތަ އެއްވެސް ޕާޓީއެއްގައި ނޫޅޭކަމަށް ތަފާސްހިސާބުތަކުން ދައްކައިފިއެވެ.
އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބު ކުރެއްވި ޓްވީޓެއްގައި ވަނީ މިއަހަރުގެ ރިޔާސީ އިންތިޚާބާ ގުޅޭ ބައެއް ތަފާސްހިސާބުތައް އާއްމު ކުރައްވާފައެވެ. އެގޮތުން މިއަހަރު ބާއްވާ ރިޔާސީ އިންތިޚާބުގައި ވޯޓު ލެވުމުގެ ޙައްގު ލިބިފައިވަނީ 283،272 މީހުންނަށް ކަމަށް އެ ތަފާސްހިސާބުތަކުން ދައްކައެވެ.
ރިޔާސީ އިންތިޚާބުގައި ވޯޓުލެވޭ މީހުންގެ ތެރެއިން ރާއްޖޭގެ ސިޔާސީ ޕާޓީއެއްގައި ރަޖިސްޓްރީ ކޮށްފައިވަނީ 162،935 މީހުން، ނުވަތަ ވޯޓުލެވޭ ޖުމްލަ އާބާދީގެ 58 އިންސައްތައެވެ. އަދި 120،337 މީހުން ނުވަތަ 42 އިންސައްތަ މީހުންނަކީ އެއްވެސް ސިޔާސީ ޕާޓީއެއްގައި ރަޖިސްޓްރީ ކޮށްފައި ނުވާ މީހުންނެވެ.
މި އަހަރުގެ ރިޔާސީ އިންތިހާބު ބާއްވާނެ ތާރީހެެއްގެ ގޮތުގައި އީސީއިން ކަނޑައަޅާފައި ވަނީ އަންނަ ސެޕްޓެމްބަރު މަހުގެ 9 ވަނަ ދުވަހުއެވެ. އަދި ދެވަނަ ބުރަކަށް ގޮސްފިނަމަ އިންތިޚާބު ބާއްވާނެ ތާރީހެއްގެ ގޮތުގައި ކަނޑައަޅާފައިވަނީ އެ މަހުގެ 30 ވަނަ ދުވަހެވެ. އިންތިޚާބުގައި ކެނޑިޑޭޓުންނަށް ވާދަކުރުމުގެ ފުރުސަތު ހުޅުވާލުމަށް ހަމަޖެހިފައިވަނީ ޖުލައި 23 އިން އޮގަސްޓު މަހުގެ ތިންވަނަ ދުވަހާއި ހަމައަށެވެ.
އީސީން ބުނެފައިވާ ގޮތުގައި މިއަހަރުގެ ރިޔާސީ އިންތިޚާބުގައި 600 ވޯޓު ފޮށި ބަހައްޓާނެއެވެ. ރިސޯޓްތަކާއި ސިނާއީ މަސައްކަތްކުރާ ތަންތަނުގައި ވޯޓު ފޮށި ބަހައްޓަން އެ ކޮމިޝަނުން ނިންމާފައިވަނީ މަދުވެގެން 30 މީހުން ރީ-ރަޖިސްޓަރީ ކުރުމުންނެވެ. އަދި ރާއްޖެއިން ބޭރުގައި ވޯޓު ފޮށި ބަހައްޓަނީ 150 މީހުން ރީ ރަޖިސްޓަރ ކޮށްފައިވާނަމައެވެ.
ރިޔާސީ އިންތިޚާބުގެ ތައްޔާރީތައް މިހާރު ފަށާފައިވާއިރު މިއަހަރުގެ އިންތިޚާބުގެ މައި މަރުކަޒެއްގެ ގޮތުގައި ކަނޑައަޅައިފައިވަނީ ދަރުބާރުގެއެވެ.
މިއަހަރުގެ ރިޔާސީ އިންތިޚާބަށް 90 މިލިއަން ރުފިޔާގެ ބަޖެޓެއް ވަނީ ކަނޑައަޅައިފައެވެ. ނަމަވެސް ދެވަނަ ބުރަކަށްދާނަމަ ބަޖެޓު އިތުރު ކުރަން ޖެހޭނެ ކަމަށް އީސީން ވަނީ ބުނެފައެވެ.
