މި މަސައްކަތް މިހާރު އޮތީ ޓެންޑަރ މަރުހަލާގައި
ކުޅުދުއްފުށީ ހޮސްޕިޓަލް
ހަތް ރަށެއްގައި ހޮސްޕިޓަލް އެޅުމަށް މި ހަފުތާގެ ތެރޭގައި ބަޔަކާ ހަވާލުކުރާނެ ކަމަށް, ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
ވެންޓިލޭޓަރުގެ ޚިޔާނާތާ ގުޅިގެން ހޯމަ ދުވަހު ކުރިޔަށްދިޔަ ރައްޔިތުންގެ މަޖިލީހަށް ފިނޭންސް މިނިސްޓަރު އިބްރާހީމް އަމީރު ހާޒިރުކުރުމުން، މިލަންދޫ ދާއިރާގެ މެމްބަރު އަލީ ރިޒާ ވަނީ އެ ހޮސްޕިޓަލުތަކުގެ މަސައްކަތް ލަސްވާ ސަބަބުތަކާއި، އެއްބަސްވުންތަކުގައި ސޮއިކުރެވޭނެ ދުވަސްތަކާ ބެހޭގޮތުން މިނިސްޓަރަށް ސުވާލުދަންނަވާފައެވެ. އެސުވާލަށް ޖަވާބު ދެއްވަމުން މިނިސްޓަރ ވިދާޅުވީ، މި މަސައްކަތް މިހާރު އޮތީ ޓެންޑަރ މަރުހަލާގައި ކަމަށެވެ. އަދި މިހާރު އެ މަރުހަލާގެ އިވެލުއޭޝަން ޕްރޮސެސް ނިމިފައިވާކަމަށް މިނިސްޓަރު ވިދާޅުވިއެވެ.
އެ ހަތް ރަށުގައި ހޮސްޕިޓަލް އަޅާނެ ފަރާތެއް ހޯދުމަށް ސަރުކާރުން އިއުލާންކުރީ މިދިޔަ އަހަރުގެ އޭޕްރީލް މަހުއެވެ.
ހޮސްޕިޓަލުތައް އަޅަން ނިންމާފައިވަނީ ހދ. ހަނިމާދޫ، ށ. މިލަންދޫ، ނ. ވެލިދޫ، ކ. ތުލުސްދޫ، އދ. މާމިގިލި، ވ. ފެލިދޫ އަދި ތ. ވިލުފުށީގައެވެ. މިއިން ކޮންމެ ރަށެއްގައިވެސް އަޅަން ހަމަޖެހިފައިވަނީ 30 އެނދުގެ ހޮސްޕިޓަލެވެ.
