ހިޔާގެ 136 ވަޒީފާއާއެކު އެޗްޑީސީން އޯޕަންޑޭއެއް!

ހުޅުމާލެ ދެވަނަ ފިޔަވަހީގެ ހިޔާ ސަރަހައްދުން ގިނަ އަދަދެއްގެ ވަޒީފާތަކާއެކު ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އޯޕަންޑޭއެއް ބާއްވަން ތައްޔާރުވެއްޖެއެވެ.

އެ ކުންފުނިން މައުލޫމާތު ދޭ ގޮތުގައި މިއީ ހިޔާ ސަރަހައްދު ސާފުކޮށް ބޭއްވުމަށާއި ސެކިއުރިޓީ އިތުރަށް ރަނގަޅު ކުރުމަށް ކުރެވެމުންދާ މަސައްކަތްތަކުގެ ތެރެއިން ހުޅުވާލާ ވަޒީފާގެ ފުރުސަތުތަކެއް ކަމަށެވެ. އެގޮތުން 88 ސެކިއުރިޓީ އެސިސްޓަންޓުންނާއި 48 ސަޕޯޓް ސްޓާފުން ނެގުމަށް ނިންމާފައިވާ ކަމަށް އެ ކުންފުނިން ބުނެއެވެ.

Advertisement

އެޗްޑީސީން ބުނެފައިވާ ގޮތުގައި ސެކިއުރިޓީ އެސިސްޓަންޓުންނާއި ސަޕޯޓް ސްޓާފުންނަށް މުސާރާއިގެ ގޮތުގައި 10،500 ރުފިޔާ ވަނީ ކަނޑައަޅައިފައެވެ.

މި ވަޒީފާތަކަށް ވޯކް އިން އިންޓަވިއު ބާއްވަން ނިންމާފައިވާއިރު މި އިންޓަވިއުއަށް މި މަހުގެ 10 ވަނަ ދުވަހު ބާއްވާ އޯޕަންޑޭގައި ފުރުސަތު ހުޅުވާލާނެއެވެ. އޯޕަންޑޭ ބާއްވަން ނިންމާފައިވަނީ އަންނަ ހުކުރު ދުވަހުގެ ހަވީރު 4:00ން 6:00 އަށް އަދި ރޭގަނޑު 8:00 އިން 10:00 އަށް ދެވަނަ ފިޔަވަހީގައި ހުންނަ ކާމިލް ދީދީ ސްކޫލުގައެވެ.

މި އިންޓަވިއުގައި ބައިވެރިވާން ބޭނުންވާ ފަރާތްތަކުން އައި.ޑީ ކާޑްގެ ކޮޕީ، ތަޢުލީމީ ސެޓިފިކެޓް އަދި ސީވީ ހިފައިގެން ހާޒިރުވުމުން އިންޓަވިއުގައި ބައިވެރިވެވޭނެއެވެ.

އެޗްޑީސީގެ އަމާޒަކީ ހިޔާ ސަރަހައްދަކީ ހިތްފަސޭހަ އަދި ރައްކާތެރި މާހައުލަކަށް ހެދުމަށް ގިނަ މަސައްކަތްތަކެއްކޮށް އަދި އެ މަސައްކަތުގައި ހިޔާ ސަރަހައްދުގައި ދިރިއުޅޭ ފަރާތްތަކުގެ ބައިވެރިވުމާއި ހިޔާލު ހިމެނުމެވެ.