މިދިޔަ އަހަރު ރާއްޖެއިން ޓީބީ ޖެހިފަިއިވާ 136 ބަލިމީހުން ފެނިފައިވާ ކަމަށް ހެލްތް މިނިސްޓްރީން ހާމަކޮށްފި އެވެ.

ޓީބީ ނައްތާލުމަށް ކުރަމުންދާ މަސައްކަތުގެ ތެރެއިން އެކުލަވާލައިފައިވާ ސްޓިއަރިންގ ކޮމިޓީގެ ފުރަތަމަ ބައްދަލުވުމުގައި ހެލްތް މިނިސްޓްރީގެ ފަރާތުން ހާމަކޮށްފައިވާ ތަފާސް ހިސާބުތަކުން ދައްކާ ގޮތުން 2017 ވަނަ އަހަރު ޓީބީ ބަލި ޖެހިފައިވާ 136 މީހުން ރާއްޖެއިން ފާހަގަކުރެވުނު އިރު 2016 ވަނަ އަހަރު ޓީބީ ބަލި ޖެހިފައިވާ 170 މީހުން ވަނީ ފާހަގަކުރެވިފަ އެވެ.

ފާއިތުވެދިޔަ އަށް އަހަރުގެ ތަފާސް ހިސާބުތަކަށް ބަލާ އިރު އެންމެ މަދުން ޓީބީ ބަލި ޖެހިފައިވާ މީހުން ފެނިފައިވަނީ 2011 ވަނަ އަހަރު އެވެ. އެއަހަރު ރާއްޖެއިން 88 ޓީބީ ބަލި މީހުން ފެނިފައިވެ އެވެ. އަދި އެއް އަހަރުން އަނެއް އަހަރަށް ބަލާ އިރު ފަހުގެ އަހަރުތަކުގައ ޓީބީ ބަލި ޖެހޭ މީހުން އިތުރުވެފައިވާ ކަން ވަނީ ފާހަގަކުރެވިފަ އެވެ. ހެލްތް މިނިސްޓްރީން ބުނީ، މި އިތުރުވުމަކީ، ރާއްޖޭގައި ޓީބީ ބަލި ޖެހޭ މީހުން ސީދާ އިތުރުވުމަށް ނުވުން ވެސް އެކަށީގެންވެދާނެ ކަމަށާއި އެހެން ނަމަވެސް ބަލި ޖެހިފައިވާކަން އެނގޭ މީހުން ކުރިއަށް ވުރެ އިތުރުވުން ވެސް އެކަށީގެންވާ ކަމަށެވެ.

ރާއްޖެއިން ޓީބީ ބަލި އެންމެ ފުރަތަމަ ފާހަގަކުރެވިފައިވަނީ 1960 ވަނަ އަހަރު އެވެ. އަދި 1962 ވަނަ އަހަރު ރާއްޖޭގައި ފުރަތަމަ ފަހަރަށް ޓީބީއަށް ހާއްސަ ކްލިނިކެއް ހުޅުވިގެންދިޔަ އެވެ.

ރާއްޖޭގައި އެންމެ ފުރަތަމަ ޓީބީ ބައްޔަށް ހާއްސަ ބީސީޖީ ވެކްސިން ޖަހަން ފަށާފައިވަނީ 1971 ވަނަ އަހަރު އެވެ. އަދި 1988 ބީސީޖީ ވެކްސިން ޖަހާ ކުދިންގެ ނިސްބަތް އާބާދީގެ 98 ޕަސެންޓަށް އެރިއެވެ. ޓީބީ ބަލި މަދުކޮށް ކޮންޓްރޯލް ކުރުމަށް އެންމެ ފުރަތަމަ ގައުމީ ފެންވަރުގެ ސްޓްރެޓެޖިކް ޕްލޭނެއް އެކުލަވާލައިފައިވަނީ 2001 ވަނަ އަހަރު އެވެ. މީގެ އިތުރުން 2004 ވަނަ އަހަރު ރާއްޖެއިން ވަނީ ދުނިޔޭގެ ސިއްހަތު ޖަމިއްޔާގެ ޓީބީ ކޮންޓްރޯލްވެފައިވާ ގައުމުތަކުގެ ލިސްޓުން ޖާގަ ހޯދާފައެވެ.

ޓީބީ ބައްޔާ ގުޅޭ ދެވަނަ ގައުމީ ފެންވަރުގެ ސްޓްރެޓެޖިކް ޕްލޭން އެކުލަވާލައިފައިވަނީ 2008 ވަނަ އަހަރު އެވެ.