އެޗްޑީސީގެ ނަމުގައި ފޭކު މެސެޖުތަކެއް، ސަމާލުވޭ!
4 މާރިޗު 2023 | ހޮނިހިރު 07:30އެޗްޑީސީގެ ނަމުގައި އެކި ދުވަސްވަރު މިފަދަ މެސެޖުތައް ދައުރު ކުރޭ
އެޗްޑީސީ
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ނަމުގައި ފޭކް މެޖްތަކެއް އާއްމުންނަށް ފޮނުވަމުންދާތީ އެކަމަށް ސަމާލުވުމަށް އެ ކުންފުނިން އިލްތިމާސްކޮށްފިއެވެ.
އެޗްޑީސީން ބުނީ އެ ކުންފުނީގެ ނަމުގައި ބައެއްކަހަލަ ލިންކްތަކެއް ހިމެނޭގޮތަށް އާއްމުންނަށް މެސެޖުތަކެއް ލިބެމުންދާކަން ފާހަގަކުރެވިފައިވާ ކަމަށެވެ. އެހެންކަމުން އެކަމަށް ސަމާލުކަންދިނުމަށް އެ ކުންފުނިން އެދެެވެ. އަދި އެފަދަ މެސެޖެއް އެ ކުންފުނިން ނުފޮނުވާނެކަމުގެ ޔަގީންކަންވެސް ވަނީ ދީފައެވެ.
އެކި ދުވަސްވަރު އެޗްޑީސީގެ ނަމުގައި އާއްމުކޮށް ފޭކު މެސެޖުތައް ފޮނުވާކަން އެ ކުންފުނިން ފާހަގަކުރެއެވެ. އެގޮތުން، އާއްމުކޮށް މެސެޖުތައް ފޮނުވަނީ އެ ކުންފުނިން ކުރިއަށްގެންދާ ހައުސިންގ މަޝްރޫއުތަކާ ގުޅުވައިގެންނެވެ.
އެޗްޑީސީއަކީ ސަރުކާރުގެ ބޯހިޔާވަހިކަމުގެ ގިނަ މަޝްރޫއުތައް ހިންގަމުންދާއިރު އޭގެ ނާޖާއިޒު ފައިދާ ނަގައި ބައެއް ފަރާތްތަކުން ފޭކު މެސެޖު ފޮނުވައިގެންނާއި ގުޅައިގެން އޮޅުވާލައިގެން މީހުން އަތުން ފައިސާ ހޯދައެވެ. މިފަދަ ގިނަ އަދަދެއްގެ މައްސަލަތައް ފެންމަތިވެފައިވާއިރު ފައިސާގެ އެއްވެސް މުއާމަލާތެއް ހިންގުމަށް އެޗްޑީސީގެ ފަރާތުން ނުގުޅާނެކަމަށާއި ފައިސާގެ މުއާމަލާތުތައް ކުރާނީ ލިޔެކިޔުމުންކަމަށް އެ ކުންފުނިން ވަނީ ބުނެފައެވެ.
އެޗްޑީސީގެ އިތުރުންވެސް ރާއްޖޭގެ އެކި ކުންފުނިތަކުގެ ނަމުގައި މަކަރާއި ހީލަތުން މީހުން އަތުން ފައިސާ ހޯދާ މައްސަލަތައް ފުލުހަށް ހުށަހަޅައެވެ. އެހެންކަމުން ލިންކުތަކާއެކު ފޮނުވާ މެސެޖުތަކުގައިވާ ލިންކުތަކަށް ނުވަނުމަށާއި ނުދަންނަ ނަންބަރުތަކުން ގުޅުމުން، ސަމާލުވުމަށް ކަމާއިބެހޭ އިދާރާތަކުން އަންނަނީ އިލްތިމާސްކުރަމުންނެވެ.
