އަޝްރަފް ޙަކީމީގެ މައްސަލަ ބަލަމުން އަންނަ ކަމަށް ޕްރޮސެކިއުޓަރުން ބުނެފި

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ މޮރޮކޯގެ ޑިފެންޑަރު އަޝްރަފް ޙަކީމީއާ ގުޅިގެން ހުށަހަޅާފައިވާ ރޭޕުގެ މައްސަލަ އެއް ތަހުގީގު ކުރަމުން އަންނަ ކަމަށް ޕްރޮސެކިއުޓަރުގެ އޮފީހުން ބުނެފި އެވެ.

ނަންޓޭރް ޕްރޮސެކިއުޓް އޮފީހުން ހުކުރު ދުވަހު ބުނީ، އެކަމާ ގުޅިގެން އެ އޮފީހަށް ހުށަހަޅާފައިވާ މައްސަލައެއް މިހާރު އަންނަނީ ބަލަމުން ކަމަށާއި، އެކަމާ ގުޅިގެން ބަލަން ޖެހޭ އެންމެހައި ކަންކަން ބަލަމުން އަންނަ ކަމަށެވެ. އެކަމާ ގުޅިގެން ޙަކީމީގެ ބަހެއް ހޯދުމަށް މީޑިއާ ތަކުން މަސައްކަތް ކުރި ނަމަވެސް، އެކަން ވަނީ ނާކާމިޔާބުވެފަ އެވެ. ނަމަވެސް ޙަކީމީގެ ވަކީލުންނާ ހަވާލާދީ މީޑިއާ ތަކުގައި ބުނެފައި ވަނީ، ޙަކީމީގެ މައްޗަށް ކުރެވޭ ތުހުމަތު ތަކަކީ އެއްވެސް ހަގީގަތެއް ނެތް، އަސްލެއް ނެތް ވާހަކަތަކެއް ކަމަށެވެ. މީގެ އިތުރުން އެ މައްސަލަ ތަހުގީގު ކުރަމުން އަންނައިރު، ކަމާ ގުޅުން ހުރި އިދާރާތަކަށް އެއްބާރުލުން ދެމުން ގެންދާނެ ކަމަށް ވެސް ވަނީ ބުނެފަ އެވެ. ހަމައެއާކު ޙަކީމީ ޕޮލިހަށް ޙާޟިރުކޮށް، އޭނާއާ ސުވާލުކޮށްފައިވާ ކަމަށް ވެސް ވަނީ ބުނެފަ އެވެ.

ބޭރުގެ މީޑިއާ ތަކުގައި ބުނެފައިވާ ގޮތުން ޙަކީމީއާ ގުޅިގެން މައްސަލަ ހުށަހަޅާފައި ވަނީ އުމުރުން 24 އަހަރުގެ އަންހެނެކެވެ.