ކޮޕަ ޑެލް ރޭ މުބާރާތުގެ ސެމީ ފައިނަލްގެ ފުރަަތަމަ ލެގުގައި ބާސެލޯނާ އިން ވާދަވެރި ރެއާލް މެޑްރިޑު ބަލިކޮށްފި އެވެ.

ރެއާލްގެ އަމިއްލަ ދަނޑު ސަންޓިއާގޯ ބާނަބެއު ގައި ކުޅުނު މެޗު ބާސެލޯނާ އިން ކާމިޔާބު ކުރީ 1-0 އިންނެވެ. މި މެޗު އެންމެ ޚާއްސަވި ކުޅުންތެރިޔަކީ ބާސެލޯނާގެ ކެޕްޓަން ސާޖިއޯ ބުސްކެޓްްސް އެވެ. އެ މެޗާއެކު އޭނާ ވެގެން ގޮސްފައި ވަނީ އެލްކްލެސިކޯ ގައި އެންމެ ގިނަ މެޗު ކުޅުނު ކުޅުންތެރިޔާ އަށެވެ. އެއީ 14 މެޗެވެ. މީގެ ކުރިން އެންމެ ގިނަ ކްލެސިކޯ މެޗު ކުޅެނީ ކުރިން ބާސެލޯނާ އަށް ކުޅުނު އާޖެންޓީނާގެ ލިއޮނަލް މެސީ އާއި ރެއާލަށް ކުޅުނު ސްޕެއިންގެ ޑިފެންޑަރު ސާޖިއޯ ރާމޯސް އެވެ. އެއީ 45 މެޗެވެ. ރެއާލްގެ އަމިއްލަ ދަނޑުގައި އެ ޓީމަށް ލިބުނު ބައްޔަކީ ފާއިތުވި 11 މަސް ދުވަހުގެ ތެރޭގައި އަމިއްލަ ދަނޑުގައި ބަލިވި ފުރަތަމަ ފަހަރެވެ. އަނެއް ކޮޅުން މި މެޗުގައި ރެއާލަށް ވަނީ ބާސެލޯނާ ގޯލަށް އަމާޒުކޮށް އެންމެ ހަމަލާއެއް ވެސް ފޮނުވާލެވޭ ގޮތް ނުވެފަ އެވެ. މެޗުގައި ބާސެލޯނާގެ ހަމައެކަނި ލަނޑަކީ ރެއާލްގެ ޑިފެންޑަރު އެޑާ މިލިޓާއޯ އަތުން ބައިކޮޅަށް ވަން ލަނޑެކެވެ. އެއީ މެޗުގެ 26 ވަނަ މިނެޓުގައި ބާސެލޯނާގެ މިޑްފީލްޑަރު ފްރޭންކް ކެސިއޭ ފޮނުވާލި ބޯޅަ އެއް މިލިޓާއޯގެ ފައިގަ ޖެހި ގޯލަށް ވަދެގެންނެވެ.

މި މޮޅާއެކު ބާސެލޯނާ އިން ވަނީ ފައިނަލްގެ ފުރުސަތު ބޮޑުކޮށްފަ އެވެ. ސެމީ ފައިނަލްގެ ދެ ވަނަ ލެގު އޮންނާނީ އޭޕްރިލް މަހުގެ ހަ ވަަނަ ދުވަހު ބާސެލޯނާގެ އަމިއްލަ ދަނޑުގަ އެވެ.