އެމްއާރުއެމްއާއި ޖޭޕީން ވިސްނުންތެރިކަމާއެކު ގޮތް ނިންމަވާނެކަމަށް ގަބޫލުކުރަން - ރައީސް

ސަރުކާރުގެ ކޯލިޝަންގައި މިހާރު ތިއްބެވި މޯލްޑިވްސް ރިފޯމް މޫވްމަންޓާއި ޖުމްހޫރީ ޕާޓީން ކުރިއަށް އޮތް ރިޔާސީ އިންތިހާބުގައި ކޯލިޝަން ހެދުމާ ގުޅޭގޮތުން ވިސްނާވަޑައިގެން ގޮތެއް ނިންމަވާނެކަމަށް ގަބޫލުކުރައްވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.

ތ. ހިރިލަންދޫއަށް ވަޑައިގެން އެރަށުގެ ރައްޔިތުންނާއި އެމްޑީޕީގެ މެންބަރުންނާ ބައްދަލުކުރައްވައި ވާހަކަފުޅުދައްކަވަމުން ރައީސް ވިދާޅުވީ، ކުރިއަށް އޮތް ރިޔާސީ އިންތިހާބު ކާމިޔާބުކުރުމަކީ މުހިންމު ކަމެއް ކަމަށެވެ. ރިޔާސީ އިންތިހާބު ކާމިޔާބުކުރުމަށް އޮތް ފޯމިއުލާއަކީ ކޯލިޝަން ކަމަށް ގަބޫލުފުޅުކުރައްވާ ކަމަށާއި, މިކަމާ ދެކޮޅު ހެއްދެވި ބޭބޭފުޅުވެސް މަސައްކަތްކުރައްވަނީ ކޯލިޝަނަކާއެކީގައި ނުކުންނަވަން ކަމަށެވެ.

ރައީސް ސާލިހް ވިދާޅުވީ، އެމަނިކުފާނާއެކު މިހާރު ކޯލިޝަންގައި ތިއްބެވި ހުރިހާ ޕާޓީތަކަށް ދައުވަތު ދެއްވާފައިވާ ކަމަށެވެ. އަދި ކޯލިޝަން ޕާޓްނަރުންނަށް ދައުވަތު ދެއްވީ އެއީ މުހިންމު ކަމެއްގެ ގޮތުގައި ދެކެވަޑައިގަންނަވާތީ ކަމަށާއި, އޭގެ ހެޔޮ ނަތީޖާ ވަރަށް އަވަހަށް ލިބިގެންދާނެ ކަމަށެވެ.

ރައީސް ވިދާޅުވީ މިހާރު ކޯލިޝަންގައި ތިބި ޕާޓީތަކުގެ ތެރެއިން އަދާލަތު ޕާޓީން ކޯލިޝަން ހަދަން އެއްބަސްވެފައިވާ ކަމަށާއި, އަލަށް މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)އިން ގުޅިވަޑައިގެންފައިވާ ކަމަށެވެ.

ރައީސް ވިދާޅުވީ ކޯލިޝަނަކާއި ނުލައި އިންތިހާބެއް އެއް ބުރުން ކާމިޔާބު ނުކުރެވޭނެ ކަމަށާއި, ކޯލިޝަންގައި މިހާރު ތިއްބެވި ބޭފުޅުން ގޮތް ނިންމަވާނީ ރައްޔިތުންނަށް އެންމެ ފައިދާހުރި ގޮތަށް ކަމަށެވެ. އެބޭފުޅުން ވިސްނުންތެރިކަމާއެކު ގޮތް ނިންމަވާނެކަމަށް ގަބޫލުކުރައްވާ ކަމަށެވެ.

ރައީސް ވިދާޅުވީ ރިޔާސީ އިންތިހާބު ބޮޑު ތަފާތަކުން، އެއްބުރުން ކޯލިޝަނާއެކު ކާމިޔާބުކުރައްވާނެ ކަމަށެވެ.