ދަރިވަރުންގެ ޚިޔާލަށް މަންހަޖު އިސްލާހު ކުރުމުގެ ނަތީޖާ ކިތަންމެހާވެސް ފޮނި

ތިމާވެށި ހިމާޔަތް ކުރުމަށް ކުރަމުންދާ މަސައްކަތްތަކުގެ ވާހަކައިގެ އަޑަކީ، ދޭތެރެ ދޭތެރެއިން ގަދަވެލާ ގޮތަށް، ހަމަ އެ ބާރުމިނުގައި އޮބޭ ވާހަކަތަކެވެ. ބައިނަލްއަޤުވާމީ ފެންވަރުގައި ފާހަގަ ކުރާ ވަކި މުނާސަބާތަކަކާ ގުޅިގެން ވެށި ހިމާޔަތް ކުރުމުގެ ވާހަކަތަކުގެ އަޑު ގަދަވެ، ހަރަކާތްތައް އިތުރުވުމަށްފަހު އަނެއްކާވެސް މަޑުޖެހިގެންދެއެވެ. ނަމަވެސް ތިމާވެށީގެން ޙައްޤުގައި މަސައްކަތް ކުރުމަކީ ދެމެހެއްޓެނިވި ރޫޙެއްގައި ކުރަން ޖެހޭ ކަމެއްކަން އެންމެންވެސް ޤަބޫލު ކުރެއެވެ.

މިކަމުގެ ރީތި މިސާލެއް ފެނިގެންދަނީ ދުބާއީގެ ރޯޔަލް ގްރެމަރ ސްކޫލް ގިލްޑްފޯރޑްގެ ދަރިވަރުންގެ ފަރާތުންނެވެ. ވެއްޓާ ރައްޓެހި ދެމެހެއްޓެނިވި އާދަތަކަކީ މިއަދު މި ދަރިވަރުންގެ އާންމު ދިރިއުޅުމުގެ ބަޔަކަށް ވަނީ ވެފައެވެ. ހައިޑްރޯޕޮނިކްސް ދަނޑުތަކުން ފެށިގެން، ތިމާވެއްޓާ ރައްޓެހި، ދެމެހެއްޓިނިވި ފަރުމާތައް ހެދުން ތައްޔާރު ކުރުމަކީ މި ދަރިވަރުން ފަޚްރުވެރިވުން ޙައްޤު މަޝްރޫޢުތަކެކެވެ.

އެކަމަކަށް ދަރިވަރުން ވަކާލާތު ކުރަމުންދާ ކަންކަމަށް އިތުރު ހިތްވަރެއްދީ، ދަރިވަރުން ބާރުވެރިކުރުވުމުގެ ގޮތުން ދުބާއީގެ ރޯޔަލް ގްރެމަރ ސްކޫލް ގިލްޑްފޯރޑް ސްކޫލްއިން ވަނީ، މި ހަރަކާތްތަކަކީ ދަރިވަރުންގެ ތަޢުލީމީ މަންޙަޖުގެ ބައެއް ކަމުގައި ކަނޑައަޅާފައެވެ. ޕްރިންސިޕަލް ކްލެއަރ ޓަރންބުލް ވިދާޅުވާ ގޮތުގައި، ދަރިވަރުންގެ އަޑަކީ އެހުން މުހިންމު އަޑެކެވެ.

މަންޙަޖުގެ ތެރެއިން ދަރިވަރުން ކުރިއަށް ގެންދާ އެއް ހަރަކާތަކީ ފެނުގައި ގަސް ހެއްދުމުގެ މަޝްރޫއެވެ. ސްކޫލް ކެންޓީނުގައި ހިންގާ މި މަޝްރޫއުގައި ބައިވެރިވާ ދަރުވަރުންގެ ތެރޭގައި، ޢުމުރުން 11 އަހަރުގެ ރަފައޭލް އަދި 12 އަހަރުގެ ސާޝާ ހިމެނެއެވެ.

ކެންޓީނަށް ބޭނުންވާ އެކި ކަހަލަ ފަތްޕިލާވެލި ފޯރުކޮށްދިނުމުގައި ރަފެއޭލްއާއި ސާޝާ އިސް ދައުރެއް އަދާ ކުރެއެވެ.

ސްކޫލްގެ ބޭނުމަށް ފަތްޕިލާވެލި ފޯރުކޮށްދިނުމުގައި ދަރިވަރުން ދަނީ ކާމިޔާބު ހޯދަމުންނެވެ. ޒިންމާދާރު ޒުވާނުންތަކެއް ބިނާ ކުރެވޭ ކަމުގެ އިޙުސާސް ޔަޤީނުންވެސް ކުރެވޭނެއެވެ.

ކެންޓީނު ހުރަސްކޮށް، ސްކޫލްގެ އަނެއް ފަރާތުން ފެންނަ ހުރި ކުލާސްރޫމަށް ނަޒަރު ގޮސް ހުއްޓޭއިރު އެތަނުންވެސް ފެނިގެންދަނީ ވެއްޓާ ދޯޅަ މަންޒަރެކެވެ. އެ ކުލާސް ތެރޭގައި ދަރިވަރުން އަވަދިނެތި އުޅެމުން ދަނީ ތިމާވެއްޓާ ރައްޓެހި، ދެމެހެއްޓެނިވި ހެދުން ފަރުމާ ކުރުމުގެ މަސައްކަތުގައެވެ.

ތިމާވެށީގެ ހަފުތާ ފާހަގަ ކުރުމުގެ ގޮތުން ސޯފިއާއާ އޭނާގެ ކުލާސްކ ކުދިން ވަނީ އުކާލާ ކަރުދާހުގެ ބާވަތްތަކުގެ ތެރެއިން އަލުން ބޭނުން ކުރެވިދާނެ ކަހަލަ ބާވަތްތައް އެއްކޮށްފައެވެ. އޭގެ ތެރޭގައި ޓިޝޫ ކަރުދާހުގެ އިތުރުން ބާވެފައިވާ ފޮތްތައް ހިމެނެއެވެ. މި ތަކެތި ހެދުންތަކުގައި ހަރުކޮށްގެން ތައްޔާރުކުރާ ފަރުމާތަކަކީ، 4 މޫސުމަށްވެސް ފުދޭ ފަރުމާތަކެކެވެ.

ދުބާއީގެ ރޯޔަލް ގްރެމަރ ސްކޫލް ގިލްޑްފޯރޑް އިން އަމާޒު ހިފާފައި ވަނީ، މި ހިނގާ 2023 ވަނަ އަހަރު ނިމޭ އިރު، އެއް ފަހަރު ބޭނުން ކުރުމަށްފަހު އުކާލާ ޕްލާސްޓިކު ބޭނުން ކުރުން މުޅިން ހުއްޓާލުމަށެވެ. މިއީ އަމަލީ ގޮތުން ހާސިލު ކުރެވިދާނެ އަމާޒަކަށް ހެއްދުމަށްޓަކާ ރޯޔަލް ގްރެމަރ ސްކޫލް ގިލްޑްފޯރޑްއިން  ވަނީ، މިހާރު ބޭނުން ކުރަމުންދާ މިފަދަ ޕްލާސްޓިކްގެ ބަދަލުގައި ވެއްޓާ ރައްޓެހި ހައްލުތަކެއް ހޯދުމުގެ މަޝްރޫއެއްގައި އަވާނީ ކުންފުންޏާއެކު އެއްބަސްވުމެއްވެސް އެކުލަވާލާފައެވެ.