ރަޝިޔާ-ޔޫކްރެއިން ހަނގުރާމައަށް އެއް އަހަރު ފުރުމާ ދިމާކޮށް، ހަނގުރާމަ ހުއްޓާލައި ރަޝިޔާގެ ފައުޖުތައް ޔޫކްރެއިންގެ ސަރަހައްދުން ބޭލުމަށް ގޮވާލައި، ހުކުރު ދުވަހު އދ.ގެ ޖެނެރަލް އެސެމްބްލީގައި ނެގި ވޯޓުގައި އިންޑިޔާއިން އެއްވެސް ކޮޅަކަށް ވޯޓު ދީފައެއް ނުވެއެވެ. ޖެނެރަލް އެސެމްބްލީގެ ކުއްލި ބައްދަލުވުމަށް ޔޫކްރެއިނުން ހުށަހެޅި ގަރާރަށް 141 ގައުމުން ތާއީދުކޮށްފައި ވާއިރު، 32 ގައުމަކުން ވޯޓު ދީފައެއް ނުވެއެވެ. އަދި ރަޝިޔާ ހިމެނޭހެން ހަތް ގައުމަކުން ގަރާރާ ދެކޮޅަށް ވޯޓު ދީފައި ވެއެވެ. އެ ގައުމުތަކަކީ ރަޝިޔާ ބެލަރުސް، އުތުރު ކޮރެޔާ، އެރިޓްރިއާ، މާލީ، ނިކަރާގުއާ، އަދި ސީރިޔާއެވެ.    

ކުއްލި ސެޝަންގައި ވާހަކަފުޅުދައްކަވަމުން އިންޑިޔާގެ މަންދޫބު ވިދާޅުވީ، މި މައްސަލައަށް ހައްލު ހޯދޭނީ ސުލްހަވެރި މަޝްވަރާތަކުގެ ތެރެއިން ކަމުގައެވެ. އިންޑިޔާގެ ވިސްނުން ބަދަލުކޮށް "ރަނގަޅު ގޮތް" ޚިޔާރުކުރުމަށް އެމެރިކާ އަދި ޔޫކްރެއިން ހިމެނޭހެން އެތައް ގައުމަކުން ޑެލްހީއަށް ބާރު އަޅަމުން ގެންގޮސްފައިވެއެވެ. ނަމަވެސް އިންޑިޔާއަށް މިކަމުން އަސަރެއް ނުކުރާކަމަށް ޚަބަރުތައް ބުނެއެވެ. އަދި ފާޅުގައި ރަޝިޔާ ކުށްވެރިކޮށްފައެއް ނުވެއެވެ.

ހަނގުރާމާގައި ރަޝިޔާގެ ދައުރު ކުށްވެރިކޮށް މީގެ ކުރިން އދ.ގެ ޖެނެރަލް އެސެމްބަލީއާއި ސަލާމަތީ މަޖިލީހުގައި ނެގި ވޯޓުގައިވެސް އިންޑިޔާއިން ވޯޓު ދީފައެއްނުވެއެވެ.

އިންޑިޔާއާ ރަޝިޔާއާއިން، ފިނި ހަނގުރާމައިގެ ދުވަސްވަރުން ފެށިގެން އައީ ގާތް ގުޅުން ތަކެއް ދަމަހައްޓަމުންނެވެ. ރަޝިޔާއަކީ އިންޑިޔާއަށް އެންމެ ގިނައިން ހަތިޔާރު ފޯރުކޮށްދޭ ގައުމުގެ ގޮތުގައި އޮތް އޮތުން ބަދަލުވެގެން ގޮސްފައިވަނީ އިންޑިޔާއިން އަމިއްލަޔަށް ދިފާއީ ހަތިޔާރު އުފައްދަން ފެށި ހިސާބުންނެވެ. ޑިޕްލޮމެޓިކް ގޮތުންވެސް އެއްގައުމު އަނެއް ގައުމަށް އައީ އެއްބާރުލުން ދެމުންނެވެ. މިގޮތުން ކަޝްމީރު މައްސަލާގައި ސަލާމަތީ މަޖިލީހަށް ހުށަހެޅި ރިޒޮލިއުޝަންތައް މޮސްކޯއިން ވަނީ ވީޓޯ ކޮށްފައެވެ.

ޑެލްހީން މިފަހަރުގެ ގަރާރަށް ވޯޓުދީފައި ނުވިނަމަވެސް އދ.ގެ ޗާޓަރަށާއި ބައިނަލްއަގުވާމީ ގާނޫތަކަށާއި ގައުމުތަކުގެ ސަރަހައްދީ އިމަށް ހުރިހާ ގައުމަކުންވެސް އިހްތިރާމްކުރަން ޖެހޭނެކަމަށް އިންޑިޔާގެ މަންދޫބު ރުޗީރާ ކަމްބޯޖް ވިދާޅުވެފައިވެއެވެ. އަދި އިންސާނީ ފުރާނައިގެ ބަދަލު އެއީ މިފަދަ ގަރާރަކުން ދެވޭނެ އެއްޗެއް ނޫންކަމަށް ވިދާޅުވެފައިވެއެވެ.

ހުކުރު ދުވަހުގެ ގަރާރުގައި ގައުމުތަކުން ވަނީ، އެއްވެސް ޝަރުތަކާނުލައި ރަޝިޔާގެ ފައުޖުތަކުން ޔޫކްރެއިންގެ ހުރިހާ ސަރަހައްދަކުން ފޭބުމަށާއި ހަތިޔާރު ބޭލުމަށް އަންގާފައެވެ.

ހަނގުރާމަ ކުރިޔަށް ގެންގޮސް، ޔޫކްރެއިންގެ ގިނަ ސަރަހައްދުތަކަކަށް ހަމަލާދެމުން ދިއުމުގެ އިތުރުން، މިދިޔަ ސެޕްޓެމްބަރުމަހު ރަޝިޔާއިން ވަނީ ޔޫކްރެއިންގެ ހަތަރު ސަހައްދެއް ރަޝިޔާގެ އަމިއްލަ ތަންތަނުގެ ގޮތުގައި އިއުލާން ކޮށްފައެވެ.

އިންޑިޔާގެ އިތުރުން، ގަރާރަށް ވޯޓު ނުދިން ގައުމުތަކުގެ ތެރޭގައި ޗައިނާ އީރާން އަދި ސައުތު އެފްރިކާ ހިމެނެއެވެ.