ވ. އަތޮޅު ވައްޓަރު ފަޅުތެރެއިން ފެނުނު ހަށިގަނޑަކީ ތެޔޮ ބޯޓުން ގެއްލުނު ބިދޭސީ މީހާގެ ހަށިގަނޑު ނޫންކަން ކަށަވަރުވެފައިވާ ކަމަށް ފުލުހުން ބުނެފިއެވެ.

މީޑިއާތަކަށް ފުލުހުން ފޮނުވި މެސެޖެއްގައި ބުނެފައިވަނީ، ވ. އަތޮޅުން ފެނުނު އިންސާނެއްގެ ހަށިގަނޑަކީ ތެޔޮބޯޓުން ގެއްލުނު ބިދޭސީ މީހާގެ ހަށިގަނޑު ނޫންކަން ވަނީ ކަށަވަރުުކުރެވިފައި ކަމަށެވެ. އަދި އެ ހަށިގަނޑަކީ އޮޔާއެކު ރާއްޖެ އައިސްފައިވާ ހަށިގަނޑެއްތޯ ބެލުމަށް އިންޓަރނޭޝަނަލް ޕާޓްނަރުންނާއެކު ވާހަކަ ދެކެވެމުންދާ ކަމަށެވެ.

ވ. އަތޮޅު ވައްޓަރު ފަޅުން، މަރުވެފައިވާ މީހެއްގެ ހަށިގަނޑު ފެނުނު ދުވަސްވަރަކީ ވިލިމާލޭން ފުރި ތެޔޮބޯޓެއްގައި ތިބި ދެ މީހެއްގެ ޚަބަރެއް ނުވެގެން ހޯދި ދުވަސްވަރެވެ. ގެއްލުނީ ގދ. ތިނަދޫ، މަނާރު، މުހައްމަދު ނިޒާމް، 45، އާއި ބަންގްލަދޭޝް މީހެއްކަމަށްވާ މުހައްމަދު ލިޓަން، 35 އެވެ. އެ ބޯޓު އޮޔާދަނިކޮށް ފަހުން ފެނުނުއިރު، ގެއްލުނު ދިވެހި މީހާ މާލެތެރެއިން ފެނުނެވެ. އޭނާ ފެނުނު ދުވަހު މަރެއްގެ ތުހުމަތަށް ފުލުހުން ވަނީ އޭނާ ހައްޔަރުކޮށްފައެވެ.

ފުލުހުން ނިޒާމް ހައްޔަރުކުރީ ލިޓަންގެ މަރުގެ ތުހުމަތުގައިކަމަށްވާއިރު، އޭނާގެ މައްޗަށް ދައުވާކުރަން ޕީޖީ އޮފީހަށް މިހާރު ފޮނުވާފައިވާކަމަށް ފުލުހުން ބުނެއެވެ. ނަމަވެސް އޭނާއަށް ކުރާނެ ދައުވާތަކާމެދު ޕީޖީން އަދި ގޮތެއް ނުނިންމައެވެ.

މަރުވެ ގިނަ ދުވަސްތަކެއް ވެފައިވާ ކަމަށް ބެލެވޭ މީހެއްގެ ހަށިގަނޑު ވ. އަތޮޅު ވައްޓަރު ފަޅުން ފެނުނީ މިދިޔަ ޖަނަވަރީ މަހުގެ ދެވަނަ ދުވަހުއެވެ. އެ ހަށިގަނޑުގެ ޑީއެންއޭ ސާމްޕަލް ނަގައި ވަޅުލީ މި މަހުގެ 12 ވަނަ ދުވަހުއެވެ.