ޗެމްޕިއަންސް ލީގު ފުޓްބޯޅަ މުބާރާތުގައި ރެއަކީ އާދަޔާ ހިލާފު ރެއެކެވެ. އަމިއްލަ ދަނޑުގައި އެންމެ ފަހުގެ ޗެމްޕިއަން ރެއާލް މެޑްރިޑް އަތުން ލިވަޕޫލް ބަލިވީ ދެ ލަނޑުގެ ލީޑެއް ލިބިފައި އޮތުމަށްފަހު ބޮޑު ތަފާތަކުން 5-2އިންނެވެ. މިހެންވެ މުބާރާތުގެ ގަދަ އަށަކަށް ދިއުމަށް ބާކީ އެއް މެޗު އޮތްނަމަވެސް ގިނަ ބައެއްގެ ނަޒަރުގައި މި މެޗުގެ ނަތީޖާ ދެން މެޑްރިޑާ ދެކޮޅަށް އަނބުރާ ނުލެވޭނެ އެވެ. ނަމަވެސް މިކަމާ ރެއާލް މެޑްރިޑްގެ ކޯޗު ކާލޯ އެންޗެލޯޓީގެ ހިޔާލު ތަފާތެވެ.

އެންޗެލޯޓީ ބުނީ މި މެޗަކީ ވަރަށް އާދަޔާ ހިލާފު މެޗެއްކަމަށާއި ކޮންމެ ކޮންމެ މެޗެއް މި ގޮތަށް ބަދަލެއް ނުކުރެވޭނެކަމަށެވެ. ހާއްސަކޮށް ލިވަޕޫލުގެ ދަނޑުގައި ދެ ލަނޑުގެ ލީޑަކުން ފަހަތުގައި އޮތުމަށްފަހު ކަމަށެވެ. އެންޗެލޯޓީ ބުނީ ލިވަޕޫލަކީ ހަގީގަތުގައި ވަރުގަދަ ޓީމެއްކަމަށާއި އެމީހުން ފުރަތަމަ ހާފުގައި ދެ ގޯލު ޖަހައި ލީޑެއް ނެގުމުން މިވަރަކުން އަދި މި މެޗު ނުނިމޭ ކަމަށެވެ. އަދި ބާކީ އޮތް ދެ ވަނަ މެޗު ފަސޭހަކޮށްލައިގެން ނުވާނެ ކަމަށްވެސް ހަތަރު ފަހަރު މި މުބާރާތް ކާމިޔާބުކޮށްފައިވާ ހަމައެކަނި ކޯޗު އެންޗެލޯޓީ ބުންޏެވެ.

އޭނާ އަދި ބުނީ ދެ ލަނޑުން ބަލިވެފައި އޮވެފައި މެޗު ކާމިޔާބު ކުރެވުނީ ހިތްވަރު އެލުވާނުލައި، ކުޅެގެން ކަމަށެވެ. އަދި ލިވަޕޫލްގެ އެޓޭކަށްވުރެ ހުރިހާ ގޮތަކުން ވެސް މެޑްރިޑްގެ އެޓޭކް ފެނުނީ ވަރުގަދަކޮށް ކަމަށެވެ. މިހެންވެ މި މި މެޗުގައި ދެއްކި ކުޅުން މެޑްރިޑްގެ އަމިއްލަ ދަނޑުގައި ވެސް ދައްކަންޖެހޭ ކަމަށެވެ.

މި މުބާރާތުގެ އެންމެ ކާމިޔާބު ޓީމަކީ ރެއާލް މެޑްރިޑެވެ. އެ ޓީމުން 14 ފަހަރު ޗެމްޕިއަންސް ލީގު ކާމިޔާބުކޮށްފައިވާއިރު ދެ ވަނަ އަށް އެންމެ ގިނަ ތަށި ހޯދާފައިވަނީ އޭސީ މިލާނެވެ. ތިން ވަނާގައިވަނީ ލިވަޕޫލާއި ބަޔާން މިއުނިކެވެ. އެއީ 6 ތައްޓާއެކުގަ އެވެ. ލިވަޕޫލާއި ރެއާލް މެޑްރިޑަކީ އެންމެ ފަހުގެ މުބާރާތުގެ ފައިނަލް ކުޅުނު ދެ ޓީމު ވެސްމެ އެވެ.