ދެ ލަނޑުގެ ލީޑެއް ނެގުމުންވެސް، ރެއާލްއިން ފަހަތުން އަރާ ލިވަޕޫލް އަތުން ހޯދީ ބޮޑު މޮޅެއް!

ޗެމްޕިއަންސް ލީގުގެ ދެވަނަ ބުުރުގައި އަމިއްލަ ދަނޑުގައި ރެއާލް މެޑްރިޑް ކޮޅަށް ދެ ގޯލް ޖަހާ ލީޑް ނެގުމުންވެސް, ލިވަޕޫލަށް ލީޑް ނުހިފެހެއްޓެ ރެއާލްއިން ބޮޑު މޮޅެއް ހޯދައިފިއެވެ.

ދެވަނަ ބުރުގެ ފުރަތަމަ ލެގުގައި ލިވަޕޫލް އަތުން ރެއާލް މެޑްރިޑް މޮޅުވީ 5-2 ނެވެ. އެއީ ފުރަތަމަ ސާދަ މިނެޓުގެ ތެރޭގައި ލިވަޕޫލުން ދެގޯލް ޖަހާ ލީޑްވެސް ނަގާފައިވަނިކޮށެވެ. ލިވަޕޫލަށް ދެ ލަނޑުގެ ލީޑެއް ނަގައިދިނީ ނޫނޭޒްއާއި, ސަލާހުއެވެ. އެކަމަކު ފުރަތަމަ ހާފް ނިމުމުގެ ކުރިން ބްރެޒިލް ފޯވާޑް ވިނީޝިއުސް ޖޫނިއަރ ދެ ލަނޑު ޖަހާ ރެއާލްއަށް ނަތީޖާ ހަމަހަމަކޮށްދިނެވެ. މެޗުގައި ރެއާލްއިން ލީޑް ނެގީ ދެވަނަ ހާފް ފަށައިގެން ދެވަނަ މިނެޓުގައި މިލިޓާއޯ ޖެހި ގޯލުންނެވެ. ފަހު ދެ ލަނޑުޖަހާ ރެއާލްގެ ފެންވަރު ދައްކާލީ ކެޕްޓަން ބެންޒެމާއެވެ. މެޗުގައި ބެންޒެމާއާއި, ވިނީޝިއުސް ޖޫނިއަރވެސް އެއް ކުޅުންތެރިއަކު އަނެއް ކުޅުންތެރިއަކަށް ލަނޑުޖަހަން ފުރުޞަތެއް ތަނަވަސްކޮށްދިނެވެ.

މިމޮޅާއެކު ދެވަނަ ލެގަށްދާއިރު ރެއާލް މެޑްރިޑް އޮތީ ގާތްގަނޑަކަށް ކްއާޓާ ފައިނަލް ޔަޤީންވެފައެވެ. ލިވަޕޫލަށް އޮތީ ރެއާލް ކޮޅަށް ލަނޑުތަކެއް ޖެހުމެވެ. ދެވަނަ ލެގުގައި މިދެޓީމް ރެއާލްގެ ދަނޑުގައި ނުކުންނާނީ އަންނަ މާޗް މަހުގެ 15 ވަނަ ދުވަހުއެވެ. އެންމެ ފަހުގެ ޗެމްޕިއަންސްލީގުގެ ތަށި ރެއާލްއިން އުފުލާލީ ލިވަޕޫލް ބަލިކޮށްފައެވެ.

ޗެމްޕިއަންސް ލީގުގެ ގަދަ ސޯޅަ ޓީމް ވާދަކުރާ ބުރުގެ ފުރަތަމަ ލެގުގައި އިޓަލީގެ ނަޕޯލީން ވަނީ ޖަރުމަނުގެ އިންޓްރަކްޓް ފްރޭންކްފާޓް 2-0 ން ބަލިކޮށް, ފުރަތަމަ ލެގުން ހިތްހަމަޖެހުން ހޯދާފައެވެ. ނަޕޯލީއަށް ފުރަތަމަ ގޯލް ޖަހައިދިނީ ވިކްޓަ އޮސީމެންއެވެ. ދެވަނަ ގޯލް ޖެހީ ޑި ލޮރެންޒޯއެވެ. މެޗުގެ 58 ވަނަ މިނިޓުން ފެށިގެން ފްރޭންކްފާޓުން ކުޅެން ޖެހުނީ ދިހަ ކުޅުންތެރިންނާއެކުއެވެ. އެއީ ކޯލޯ މުއާނީއަށް ސީދާ ރަތްކާޑެއް ދެއްކުމުންނެވެ. ނަޕޯލީން ފުރަތަމަ ލަނޑު ޖެހުމުގެ ކުރިން ލިބުނު ޕެނަލްޓީއެއްވެސް މެޗުގައި ބޭކާރުވިއެވެ.