ތުރުކީއާ ސީރިޔާއަށް އައި ބާރުގަދަ ބިންހެލުމުގައި މިހާތަނަށް 6 މީހުން މަރުވެފައިވާކަމަށް ރިޕޯޓުކޮށްފިއެވެ.

ތުރުކީއާ ސީރިޔާއަށް ބާރުގަދަ ބިންހެލުމެއް އައިސް އެތައް ބަޔަކު މަރުވިތާ ދެ ހަފުތާ ފަހުން އަނެއްކާވެސް 6.3 މެގްނިޓިއުޑްގެ ބިންހެލުމެއް ހޯމަ ދުވަހު ވަނީ އައިސްފައެވެ.

ޔޫރަޕިއަން މެޑިޓެރޭނިއަން ސީސްމަލޮޖިކަލް ސެންޓަރ (އޭއެމްއެސްސީ)ން ބުނެފައިވާގޮތުގައި އެ ބިންހެލުން އައިސްފައިވަނީ ބިމުގެ ދެ ކިލޯމީޓަރު އަޑިންނެވެ.

ފުރަތަމަ ބިންހެލުމުގައި ތުރުކީގައި 41،000 އަށް ވުރެ ގިނަ މީހުން މަރުވެފައިވާ ކަމަށް އޮފިޝަލުން ބުނާއިރު، އަވަށްޓެރި ސީރިއާގައި މަރުވި މީހުންގެ އަދަދު ގާތްގަނޑަކަށް 6،000 އަށް އަރައެވެ. އަދި އެތައް އިމާރާތެއް ވެސް ވަނީ ވެއްޓިފައެވެ.

ތުރުކީގެ ރައީސް ތައްޔިބް އުރުދުޣާން ވިދާޅުވީ 865،000 މީހުން ޓެންޓުތަކުގައި އަދި 23،500 މީހުން ކޮންޓެއިނަރުތަކުގައި ދިރިއުޅެމުންދާއިރު 376،000 މީހުން ދިރިއުޅެނީ ބިންހެލުމުގެ ސަރަހައްދުން ބޭރުގައި ސްޓޫޑެންޓް ޑޯރމިޓަރީތަކާއި ޕަބްލިކް ގެސްޓްހައުސްތަކުގައި ކަމަށެވެ.

ގިނަ އިމާރާތްތަކެއް ހަލާކުވެފައިވާއިރު، 210 މިލިއަން ޓަނުގެ ކުނިބުނި ސާފުކުރަން ޖެހޭނެ ކަމަށް އދ.ގެ ޑިވެލޮޕްމަންޓް ޕްރޮގްރާމް (ޔޫއެންޑީޕީ)ގެ ތުރުކީގެ މަންދޫބު ލޫއިސާ ވިންޓަން ވެސް ވަނީ ވިދާޅުވެފައެވެ.