ލީޑްސްގެ ކޯޗަކަށް ޖަވީ ގްރާސިއާ ހަމަޖައްސައިފި
22 ފެބުރުއަރީ 2023 | ބުދަ 02:34ލީޑްސް އަށް ގްރާސިއާ އިރުޝާދު ދޭނެ އެންމެ ފުރަތަމަ މެޗަކީ ޕްރިމިއާ ލީގުގައި އެ ޓީމުން ސައުތެމްޓަނާ ދެކޮޅަށް ކުޅޭ މެޗު
ލީޑްސްގެ ކޯޗުކަމާ ހަވާލުވި ގްރާސިއާ
އިނގިރޭސި ޕްރިމިއާ ލީގުގެ ލީޑްސް ޔުނައިޓެޑުގެ ކޯޗަކަށް ސްޕެއިންގެ ޖަވީ ގްރާސިއާ ހަމަޖައްސައިފި އެވެ.
ލީޑްސްގެ ކޯޗުކަމުގެ މަޤާމު ހުސްވީ އެ މަޤާމުގައި ހުރި ޖެސީ މާޝް މި މަހުގެ ހަތް ވަނަ ދުވަހު މަގާމުން ވަކިކުރުމާއެކު އެވެ. މިދިޔަ އަހަރުގެ ފެބްރުވަރީ މަހު އެ ޓީމުގެ ކޯޗުކަމާ ހަވާލުވި ޖެސީ މަގާމުން ވަކިކޮށްފައި ވަނީ ޓީމުގެ ނަތީޖާ ދަށްވުމުގެ ސަބަބުންނެވެ. އެއާއެކު މިހާތަނަށް އެ ކުލަބަށް އިރުޝާދު ދެމުން އައީ އެސިސްޓެންޓް ކޯޗެވެ. ލީޑްސް އިން ވަނީ އެ ޓީމުގެ ކޯޗުކަމަށް ގްރާސިއާ ހަމަޖައްސާފައިވާކަން އަންގާރަ ދުވަހު ރަސްމީކޮށް އިއުލާންކޮށްފަ އެވެ. ލީޑްސް އަށް ގްރާސިއާ އިރުޝާދު ދޭނެ އެންމެ ފުރަތަމަ މެޗަކީ ޕްރިމިއާ ލީގުގައި އެ ޓީމުން ސައުތެމްޓަނާ ދެކޮޅަށް ކުޅޭ މެޗެވެ. މި ސީޒަންގެ ނިޔަލަށް ލީޑްސްގެ ކޯޗުކަމާ ހަވާލުވި ގްރާސިއާގެ އެންމެ ބޮޑު މަސައްކަތަކީ އެ ޓީމު ރެލިގޭޝަން ޒޯނުން ސަލާމަތްކޮށްދިނުމެވެ.
ވިލަރެއާލުން ކޯޗިން މަސައްކަތް ފެށި އުމުރުން 52 އަހަރުގެ ގްރާސިއާ ވަނީ އެކި ކުލަބުތަކަށް ކޯޗުކަން ކޮށްދީފަ އެވެ. އޭގެ ތެރޭގައި ސްޕެނިޝް ލީގުގެ ކާޑިޒް އާއި އަލްމޭރިއާ، އޮސަސޫނާ އަދި ވެލެންސިއާ ހިމެނެ އެވެ. މީގެ އިތުރުން ޕްރިމިއާ ލީގުގެ ވަޓްފޯޑަށް ވެސް އޭނާ ވަނީ އިރުޝާދު ދީފަ އެވެ. އެންމެ ފަހުން ގްރާސިއާ މަސައްކަތް ކޮށްފައި ވަނީ ޤަތަރުގަ އެވެ. އެ ޤައުމުގެ އަލް ޝަދްގެ ކޯޗުކަމުން އޭނާ ވަކިވީ މިދިޔަ އަހަރުގެ ޖޫން މަހު އެވެ.
