ޔާމީންގެ ހުކުމް އިސްތިއުނާފް ކުރަން ހުށަހަޅައިފި
21 ފެބުރުއަރީ 2023 | އަންގާރަ 11:30ވ އާރަށު ހިޔާނާތުގެ މައްސަލައިގައި ޔާމީނު މައްޗަށް 11 އަހަރަށް ޖަލަށް ލައި، 5 މިލިއަން ޑޮލަރުން ޖޫރިމަނާކޮށް ހުކުމްކޮށްފައިވޭ
ކުރީގެ ރައީސް އަބްދުﷲ ޔާމީން
ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ މައްޗަށް އިއްވާފައިވާ ޖަލު ހުކުމް އިސްތިއުނާފުކުރުމަށް ހުށަހަޅައިފިއެވެ.
މިކަން އެމަނިކުފާނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އަބްދުﷲ ސިޔާޒު ވަނީ ކަށަވަރު ކޮށްދެއްވާފައެވެ. އޭނާ ވިދާޅުވެފައިވާ ގޮތުގައި ރައީސް ޔާމީންގެ މައްޗަށް ކްރިމިނަލް ކޯޓުން ދެ ހުކުމެއް އިއްވާފައިވާއިރު ދެ ފަހަރުވެސް ގަބޫލުކުރަން ދަތި ގޯސްތައް ގާޒީ ހެއްދެވިކަމަށެވެ. އަދި އެއީ އެއްވެސް ގާނޫނީ ހަމައެއް ނެތް ސިޔާސީ ދައުވާއެއް ކަމަށާއި ކާމިޔާބު ލިބޭނެ ކަމަށް އޭނާ ވިދާޅުވިއެވެ.
ވ. އާރަށު ހިޔާނާތުގެ މައްސަލައިގައި ޔާމީނު 11 އަހަރަށް ޖަލަށް ލައި، 5 މިލިއަން ޑޮލަރުން ޖޫރިމަނާ ކުރުމަށް އެ ކޯޓުގެ އިސްގާޒީ އަހުމަދު ޝަކީލު ޙުކުމް ކުރައްވާފައިވަނީ މިދިޔަ ޑިސެމްބަރު މަހުގެ 25 ވަނަ ދުވަހުއެވެ.
ޔާމީނުގެ އިތުރުން އާރަށު މައްސަލައިގައި ޔޫސުފް ނަޢީމަށް ވެސް ދައުވާ ކުރިއެވެ. އެގޮތުން އާރަށު ހިޔާނާތުގެ މައްސަލައިގައި ޔޫސުފް ނައީމަށް ކޮށްފައިވަނީ ރިޝްވަތު ދިނުމުގެ ކުށުގެ ދައުވާއެވެ. އެ ދައުވާ ސާބިތުވެ، އޭނާ 3 އަހަރާއި، 2 މަހާއި 12 ދުވަހަށް ޖަލަށް ލުމަށް ކްރިމިނަލް ކޯޓުން ވަނީ ޙުކުމް ކޮށްފައެވެ. އެ ޙުކުމް ދިވެހިރާއްޖޭގެ ހައިކޯޓުގައި އިސްތިއުނާފު ކުރާނެ ކަމަށް ވެސް އޭނާ ގެ ޤާނޫނީ ވަކީލުންގެ ޓީމުން ވަނީ ބުނެފައެވެ.
ކްރިމިނަލް ކޯޓުގެ ޙުކުމް ހައިކޯޓުގައި އިސްތިއުނާފު ކުރުމަށް 60 ދުވަހުގެ މުއްދަތެއް ލިބެއެވެ.
