އަމީނީ މަގަށް ވާވަރަށް މެޓީރިއަލްސް ހުންނާނީ ގެނެސްފައި: އެމް.ޑަބްލިއު.އެސް.ސީ
އަމީނީ މަގުގެ ފެނުގެ ހޮޅިތަކާއި ނަރުދަމާ ހޮޅިތަކުގެ ޑިޒައިނަށް ބަދަލުގެނެސް އަޕްގްރޭޑް ކުރާނެ
އެމް.ޑަބްލިއު.އެސް.ސީ ގެ މެނޭޖިންގ ޑިރެކްޓަރ ހަސަން ޝާހު
އަމީނީމަގުގައި ތާރުއެޅުމުގެ މަޝްރޫއު ލަސްވިޔަ ނުދިނުމަށް ޓަކައި އެ މަގަށް ބޭނުންވާ ހުރިހާ މެޓީރިއަލްއެއް ހުންނާނީ ގެނެސްފައި ކަމަށް އެމް.ޑަބްލިއު.އެސް.ސީ ގެ މެނޭޖިން ޑިރެކްޓަރު ހަސަން ޝާހު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން ޝާހު ވިދާޅުވީ އަމީނީމަގުގައި ތާރު އެޅުމުގެ ޕްރޮޖެކްޓަކީ ޕްލޭނިންގ މިނިސްޓްރީން ހަތް މަސް ދުވަހުގެ ތެރޭގައި ނިންމަން އަމާޒު ހިފި ޕްރޮޖެކްޓެއް ކަމަށާއި އެހެން ނަމަވެސް އެ މަސައްކަތުގެ ފުރަތަމަ ދެތިން މަހެއްގެ ތެރޭގައި އެމް.ޑަބްލިއު.އެސް.ސީ އިން ވެސް އެ ކަމަށް ތައްޔާރުވެފައި ނެތުމުން ކޮންމެވެސް ވަރަކަށް މެޓީރިއަލް ގެނައުމުގައި ލަސްތަކެއް އޮތް ކަމަށެވެ.
އިތުރަށް ޝާހް ވިދާޅުވީ މާލޭ ސްޓްރީޓް ސްކޭޕިން ޕްރޮޖެކްޓް ފެށިގެން އައީ ވެސްޓުޕާކު ސަރަހައްދުން ކަމަށާއި އެ ސަރަހައްދުގައި ވެސް ކުރިން ހުރި ހޮޅިތަކަކީ ހިމަ ހޮޅިތަކަށް ވާތީ ވަނީ ފަލަ ހޮޅިއަށް ބަދަލުކޮށްފައި ކަމަށެވެ. ހަމަ އެ ގޮތަށް އަމީނީ މަގުގެ ފެނުގެ ހޮޅިތަކާއި ނަރުދަމާގެ ހޮޅިތައް ވެސް ޑިޒައިނަށް ބަދަލު ގެނެވި އަޕްގްރޭޑް ކުރެވޭނެ ކަމަށް އޭނާ ވިދާޅުވިއެވެ.
