ލައުރެއުސް އެވޯޑު: އަހަރުގެ އެންމެ މޮޅު ކުޅިވަރު ޝަޚުސިއްޔަތަކަށް މެސީ އަދި އެމްބާޕޭ ވާދަކުރަނީ

ލައުރެއުސް ސްޕޯޓްސް އެވޯޑްސްގައި ހޮވާ އަހަރުގެ އެންމެ މޮޅު ކުޅިވަރު ޝަޚުސިއްޔަތަކަށް އާޖެންޓީނާގެ ކެޕްޓަން ލިއޮނަލް މެސީ އާއި ފްރާންސްގެ ތަރި ކީލިއަން އެމްބާޕޭ ނޮމިނޭޓުވެއްޖެ އެވެ.

މެސީ އާއި އެމްބާޕޭ އިތުރުން މި އެވޯޑަށް ވާދަކުރަނީ ނެދަލެންޑްސްގެ މޮޓޯ ރޭސިން އެތުލީޓު މެކްސް ވާސްޓެޕަން، ސްވިޑެންގެ މޮންޑޯ ޑުޕްލަންޓިސް، ސްޕެއިންގެ ޓެނިސް ކުޅުންތެރިޔާ ރަފައެލް ނަޑާލް އަަދި އެމެރިކާގެ ބާސްކެޓު ކުޅުންތެރިޔާ ސްޓެފެން ކަރީ އެވެ. މީގެ ތެރެއިން މެސީ ވަނީ މިދިޔަ އަހަރު ޤަތަރުގައި ބޭއްވި ފީފާ ވޯލްޑް ކަޕް މުބާރާތާއި ފައިނަލިސިމާ، މިދިޔަ ސީޒަންގެ ފްރާންސް ލީގު އަދި ޓްރޮފީ ޑީ ޗެމްޕިއަންސް ކާމިޔާބުކޮށްފަ އެވެ. މީގެ އިތުރުން އެ މުބާރާތުގެ އެންމެ މޮޅު ކުޅުންތެރިޔާ އަށް ވެސް ހޮވުނީ މެސީ އެވެ. އެމްބާޕޭ ވަނީ މިދިޔަ ސީޒަންގެ ފްރާންސް ލީގާއި، ޓްރޮފީ ޑީ ޗެމްޕިއަންސް ކާމިޔާބުކޮށްފަ އެވެ. ފްރާންސްއާއެކު ފީފާ ވޯލްޑް ކަޕްގެ ފައިނަލްގައި އެމްބާޕޭ ކުޅުނެވެ. އެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާ އަށް ދިން ރަން ބޫޓު ވެސް ކާމިޔާބުކުރީ އޭނާ އެވެ.

އެންމެ ފަހުން މި އެވޯޑުން ހޮވި އަހަރުގެ އެންމެ މޮޅު ކުޅިވަރު ޝަޚުސިއްތަކަށް ހޮވުނީ މޮޓީ ރޭސިން އެތުލީޓު ވާސްޓެޕަން އެވެ. އަންހެން ޝަޚުސިއްޔަކަށް ހޮވުނީ ޖެމެއިކާގެ އެލައިން ތޮމްސަން ހެރާ އެވެ. މީގެ ކުރިން ނަޑާލް ވެސް ވަނީ މި އެވޯޑު ކާމިޔާބުކޮށްފަ އެވެ.