ލީޑްސްގެ ކޯޗަކަށް ޖަވީ ގްރާސިއާ ހަމަޖައްސަން މަސައްކަތް ކުރަނީ

އިނގިރޭސި ޕްރިމިއާ ލީގުގެ ލީޑްސް ޔުނައިޓެޑުގެ ކޯޗަކަށް ސްޕެއިންގެ ޖަވީ ގްރާސިއާ ހަމަޖެއްސުމަށް މަސައްކަތް ކުރަމުން އަންނަ ކަމަށް ބޭރުގެ މީޑިއާ ރިޕޯޓުތައް ބުނެފި އެވެ.

ލީޑްސްގެ ކޯޗުކަމުގެ މަޤާމު ހުސްވީ އެ މަޤާމުގައި ހުރި ޖެސީ މާޝް މި މަހުގެ ހަތް ވަނަ ދުވަހު މަގާމުން ވަކިކުރުމާއެކު އެވެ. މިދިޔަ އަހަރުގެ ފެބްރުވަރީ މަހު އެ ޓީމުގެ ކޯޗުކަމާ ހަވާލުވި ޖެސީ މަގާމުން ވަކިކޮށްފައި ވަނީ ޓީމުގެ ނަތީޖާ ދަށްވުމުގެ ސަބަބުންނެވެ. އެއާއެކު މިހާރު އެ ކުލަބަށް އިރުޝާދު ދެނީ އެސިސްޓެންޓް ކޯޗެވެ. ލީޑްސް އިން މިހާރު އަންނަނީ ގްރާސިއާ އެ ކުލަބުގެ ކޯޗަކަށް ހަމަޖެއްސުމަށް އޭނާއާ މަޝްވަރާ ކުރަމުން ކަމަށް މީޑިއާ ރިޕޯޓުތައް ބުނެ އެވެ. އެ މަޝްވަރާތައް އަދި ކުރިއަށް ދަނީ ވަރަށް ކާމިޔާބުކޮށް ކަމަށާއި، އެކަމާމެދު ވަރަށް އަވަހަށް ގޮތެއް ނިންމާނެ ކަމަށް ވެސް ރިޕޯޓުތައް ބުނެ އެވެ. ގްރާސިއާގެ އިތުރުން ލީޑްސްގެ ކޯޗުކަމަށް ގެންނަން ބޭނުންވާ މީހުންގެ ލިސްޓުގައި އިތުރު ދެ މީހެއް ނަން އޮތް ކަމަށް ވެސް ރިޕޯޓުތައް ބުނެފައިވެ އެވެ.

ވިލަރެއާލުން ކޯޗިން މަސައްކަތް ފެށި އުމުރުން 52 އަހަރުގެ ގްރާސިއާ ވަނީ އެކި ކުލަބުތަކަށް ކޯޗުކަން ކޮށްދީފަ އެވެ. އޭގެ ތެރޭގައި ސްޕެނިޝް ލީގުގެ ކާޑިޒް އާއި އަލްމޭރިއާ، އޮސަސޫނާ އަދި ވެލެންސިއާ ހިމެނެ އެވެ. މީގެ އިތުރުން ޕްރިމިއާ ލީގުގެ ވަޓްފޯޑަށް ވެސް އޭނާ ވަނީ އިރުޝާދު ދީފަ އެވެ. އެންމެ ފަހުން ގްރާސިއާ މަސައްކަތް ކޮށްފައި ވަނީ ޤަތަރުގަ އެވެ. އެ ޤައުމުގެ އަލް ޝަދްގެ ކޯޗުކަމުން އޭނާ ވަކިވީ މިދިޔަ އަހަރުގެ ޖޫން މަހު އެވެ.