ޔޫސުފް ގަރްމޫ، އޭނާގެ އުފަން ފަސްގަނޑު ދޫކޮށް، އަވައްޓެރި ތުރުކީވިލާތަށް ދިރިއުޅުން ބަދަލުކުރީ، ސޫރިޔާގައި ކުރަމުން ދިޔަ ވަރުގަދަ ހަނގުރާމައިން ސަލާމަތްވުމަށްޓަކައެވެ. ނަމަވެސް، ސޫރިޔާއާއި ތުރުކީވިލާތް ހިއްސާކުރާ ބޯޑަރު ސަރަހައްދަށް، ފެބުރުއަރީ 6 ވަނަ ދުވަހު އައި ބާރުގަދަ ބިންހެލުމާ ގުޅިގެން އަނެއްކާވެސް ސޫރިޔާގެ ހަނގުރާމަގަނޑުގެ ތެރެއަށް އެނބުރި ދާން ޖެހުނު އެތައް ހާސް މީހުންނެއްގެ ތެރޭގައި ގަރްމޫ ހިމެނެއެވެ.
ގަރްމޫގެ ދިރިއުޅުން މި ފަހަރު ސޫރިޔާއަށް ބަދަލުކުރަނީ ވަގުތީ ގޮތުންނެވެ. އެއީ މި ވަގުތަށް އެކަން އޮތް ގޮތެވެ. އެ ފުރުސަތަކީ ތުރުކީވިލާތުގެ ސަރުކާރުން ހުޅުވާލި ފުރުސަތެކެވެ. ތުރުކީވިލާތުން ވަނީ ސޫރިޔާގައި އިދިކޮޅު ހަނގުރާމަވެރިން ކޮންޓްރޯލްކުރަމުންދާ ހުޅަނގު އުތުރުގެ ސަރަހައްދުތަކަށް 6 މަސް ދުވަހުގެ މުއްދަތަކަށް ދިރިއުޅުން ބަދަލުކުރުމަށްފަހު، އަލުން އަނބުރައި ތުރުކީވިލާތަށް އެތެރެވުމުގެ ހުއްދަ އޮންނަ ގޮތަށް، ޚާއްސަ ފުރުސަތެއް ހުޅުވާލާފައެވެ. އެ ފުރުސަތުގެ ބޭނުން ހިފައި، ގިނަ އަދަދެއްގެ ބަޔަކު ދަނީ، ސޫރިޔާގައި ތިބި އެމީހުންގެ އާއިލާގެ މެންބަރުންގެ ގާތަށް ދިއުމަށް ދަތުރުކުރަމުންނެވެ.
މިތަނަށް އެނބުރި މިއައީ ޗުއްޓީއަކަށް. ބޯހަމަޖައްސާލަން. ބިންހެލުމުގެ ބިރުވެރި ތަޖުރިބާތަކާ ދުރުވެލަން. އަހަރެންގެ އާއިލާ ލޮލަށް ނުފެންނަތާ 4 އަހަރުވެއްޖެ. ތުރުކީވިލާތުގަ ދިރިއުޅެމުން ދިޔައީ އެކަނި. ބިންހެލުން އައި ތުރުކީގެ ހިސާބުތަކުގެ ހާލަތު ވަރަށް ގޯސްކޮށް އޮތީ.ޔޫސުފް ގަރްމޫ؛ ތުރުކީވިލާތުގައި ދިރިއުޅެމުންދިޔަ ސޫރިޔާގެ ރެފިއުޖީއެއް
ބާބް ހަމާމް ހުރަސްކޮށް ތުރުކީވިލާތުން ސޫރިޔާއަށް އެތެރެވަމުންދާ މީހުންގެ ތަފާސް ހިސާބުތަކެއް ރަސްމީ ސިފައެއްގައި ހާމަކޮށްފައެއްނުވެއެވެ. ނަމަވެސް، ތުރުކީވިލާތާއި ސޫރިޔާއާ ދެމެދު ދަތުރު ކުރެވެން އޮންނަ ބާބް އަލް ހަވާ މަގުން 4600 އެއްހާ މީހުން ހުރަސްކޮށްފައި ވާކަމަށް ވަނީ ހާމަކޮށްފައެވެ. މިއީ ފެބުރުއަރީ 15 ވަނަ ދުވަހު ޚާއްސަ ފުރުސަތު ހުޅުވާލިފަހުން، ފެބުރުއަރީ 17 ވަނަ ދުވަހާ ހިސާބަށް ހުރަސްކުރި މީހުންގެ އަދަދެވެ.
ސޫރިޔާގެ ހަނގުރާމައިގެ ތެރެއިން ނުކުމެ، ތުރުކީވިލާތުގައި ގަރްމޫ ދިރިއުޅެމުން ދިޔައީ ގާޒިއާންތެޕްގައެވެ. ގަރްމޫ ކިޔައިދިންގޮތުގައި އެ ސަރަހައްދުގައި މިހާރު މީހުން ތިބީ ޓެންޓުތަކުގައެވެ. ވެހެމުންދާ ވާރޭގެ ތެރޭގައެވެ. ގަދަ ފިނީގައެވެ. ދުވަސްވަރަކީ ފިނި މޫސުމުގެ ދުވަސްވަރަށް ވުމުގެ އިތުރުން، ސޫރިޔާގެ ރެފިއުޖީންނަށް އެ ސަރަހައްދުގައި އެކި ކަހަލަ ތަކުލީފުތަކާ ކުރިމަތިވާކަން ގަރްމޫ ވަނީ ފާހަގަކޮށްފައެވެ.
ސޫރިޔާއަށް ނިސްބަތްވާ 3.6 މިލިއަނެއްހާ މީހުން، ރެފިއުޖީންގެ ގޮތުގައި ތުރުކީވިލާތުގައި ދިރިއުޅެމުންދާއިރު، ބިންހެލުމުގެ ކުރިންވެސް ތުރުކީ މީހުންގެ ފަރާތުން އެކި ކަހަލަ ފުރައްސާރަތަކާ ކުރިމަތިލާންޖެހެއެވެ. ތުރުކީވިލާތުގައި އާންމު ދިރިއުޅުމުގެ ޚަރަދުތައް ބޮޑުވަމުން ދިއުމާއި އެނޫންވެސް އިގްތިސާދީ ތަކުލީފުތަކަކީ، ސޫރިޔާއިން އެތެރެވި ރެފިއުޖީންނާހެދި ވެގެން އުޅޭ ގޮތެއް ކަމަށް ގަބޫލުކުރާ ތުރުކީ މީހުން އުޅެއެވެ.
ގަރްމޫ ކިޔައިދިން ގޮތުގައި، ތުރުކީވިލާތުގެ ފުލުހުން ވަނީ، ތުރުކީ އާއިލާތަކާ ދުރުގައި ތިބުމަށް، މިސްކިތެއްގައި ހިޔާވަހިކަން ހޯދަމުންދިޔަ ސޫރިޔާގެ ބަޔަކު އެ މިސްކިތުން ބޭރުކޮށްފައެވެ. ކަން މިހެން އޮތްއިރު، ތުރުކީވިލާތުގެ އާންމުން ދަނީ، އެމީހުންގެ ގެތަކާއި ފިހާރަތައް ލޫޓުވަމުން ދަނީ ސޫރިޔާގެ ރައްޔިތުންކަމަށް ތުހުމަތުކޮށް، ރުޅިވެރިކަން ފާޅުކުރަމުންނެވެ.
ތުރުކީވިލާތުގެ ބަނދަރުމަތީ ސިޓީއެއް ކަމަށްވާ އިސްކަންދަރޫންގައި ދިރިއުޅެމުން ދިޔަ މަންސޫރު ހަމޫދު ބުނިގޮތުގައި، އޭނާ ދިރިއުޅުނު ގެ ބިންހެލުމުގައި ހަލާކުވުމާ ގުޅިގެން އޭނާ ނިދައިހަދަމުން ދިޔައީ ޕާކެއްގެ ތެރޭގައެވެ.
އަހަރެން ދިރިއުޅުނު ގެ ބިންހެލުމުގަ ސުންނާފަތިވި. އެ ހިސާބުން އަހަރެން ދިރިއުޅެން ފެށީ ޕާކެއްގެ ތެރޭގަ. އެމީހުން ޓެންޓުތަކެއް ދިން އަހަރުމެންނަށް. އެކަމަކު، އެއީ ހަމަ ދައްކާލަން، ނަމެއްގަ ކުރި ކަމެއް. އެހެންވެ، އަހަރެންގެ އަމިއްލަ ވަޒަނަށް އަންނަން ނިންމީ. ދިރިހުއްޓަސް، މަރުވާން ޖެހުނަސް، އަހަރެން ބޭނުމީ އަހަރެންގެ އާއިލާގެ ގާތުގަ ހުންނަން.މަންސޫރު ހަމޫދު؛ ތުރުކީވިލާތުގައި ދިރިއުޅެމުން ދިޔަ ސޫރިޔާގެ ރެފިއުޖީއެއް
ތުރުކީވިލާތުގެ ސިޓީއެއް ކަމަށްވާ އަންތާކްޔާގައި ދިރިއުޅެމުން ދިޔަ އަނަސް ހާޖް ގަދްރޫ ބުނިގޮތުގައި އެ ސިޓީގެ ކަންކަން ހިސާބަކަށް ހަމަޖެހިލަންދެން، އޭނާގެ ދިރިއުޅުންވެސް އާއިލާ މެންބަރުންގެ ގާތަށް (ސޫރިޔާގެ އިދްލީބަށް) ބަދަލުކުރަން ނިންމާފައިވާކަމަށެވެ.
އަހަރުމެން ތިބީ އަންތަކިޔާގަ. އޭރު ގަޑިން، ފަތިހު 04:30 ހާއިރު ވާނީ. ބިންހެލުމުގަ ބޮޑެތި ގެއްލުންތަކެއް ލިބުނު. ހާލަތު ވަރަށް ގޯސް. ގިނަ ބަޔަކު މަރުވި. އެހެންވެ، މިކަން ހަމައަކަށް އެޅިލަންދެން އިދްލީބުގަ ތިބި އަހަރުމެންގެ އާއިލާ މެންބަރުންގެ ގާތަށް ބަދަލުވާން ނިންމީ. އަންތާކިޔާ އޮތީ ހަމަ މުޅިންހެން ސުންނާފަތިވެފަ. ދިރިއުޅެން ވަރަށް ދަތި. ބިންހެލުމާ ވިދިގެން އައި ގަޑިއެއްހާއިރު ހީވީ ގިޔާމަންވެގެން އުޅޭހެން.އަނަސް ހާޖް ގަދްރޫ؛ ތުރުކީވިލާތުގައި ދިރިއުޅެމުންދިޔަ ސޫރިޔާގެ ރެފިއުޖީއެއް
ސޫރިޔާގެ ހުޅަނގުއުތުރު ސަރަހައްދުގެ ކޮންޓްރޯލް އޮންނަނީ ރައީސް ބައްޝާރު އަލް-އަސަދާ ދެކޮޅު ހަނގުރާމަވެރިންގެ އަތުގައި ކަމަށް ވާ އިރު، އެ ސަރަހައްދުގެ އާބާދީ ގާތްގަނޑަކަށް 4 މިލިއަނަށް އަރައެވެ. އިދިކޮޅު ހަނގުރާމަވެރިންނަކީ ތުރުކީވިލާތުގެ އެއްބާރުލުން ލިބޭ ބައެކެވެ. ބިންހެލުމުގެ ކާރިސާގެ ކުރިންވެސް އެ ސަރަހައްދުގެ މީހުންނަކީ ބައިނަލްއަގުވާމީ އެހީއަށް ބަރޯސާވެގެން އުޅުނު ބައެއްކަން އދ.ން ވެސް ފާހަގަކުރެއެވެ.
