ޕްރެކްޓިސް ޕާލަމަންޓް ފޯރ ވިމެން" 2023 ގެ ފުރަތަމަ ބެޗްގެ ބައިވެރިންނަށް ސެޓްފިކެޓްތައް ހަވާލުކޮށްފި
19 ފެބުރުއަރީ 2023 | އާދީއްތަ 11:04ޕްރޮގްރާމް މެދުވެރިކޮށް މިހާތަނަށް 171 އަންހެނުން ސިޔާސީ ދާއިރާއަށް ތައްޔާރުކުރެވިފައިވޭ
ޕްރެކްޓިސް ޕާލަމަންޓް ފޯރ ވިމެން" 2023 ގެ ފުރަތަމަ ބެޗްގެ ބައިވެރިން
ޕްރެކްޓިސް ޕާލަމަންޓް ފޯރ ވިމެން" 2023 ގެ ފުރަތަމަ ބެޗްގެ 39 ބައިވެރިންނަށް ސެޓްފިކެޓްތައް ހަވާލުކޮށްފިއެވެ.
ހޮނިހިރު ދުވަހުގެ ހަވީރު އޮތް ރަސްމިއްޔާތުގައި ބައިވެރިންނަށް ސެޓްފިކެޓްތައް ހަވާލުކޮށްދެއްވީ ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު އަދި މަޖިލީހުގެ ހިއުމަން ރައިޓްސް ކޮމިޓީގެ މުގައްރިރު ޖީހާން މަހްމޫދު އާއި ޔޫއެންޑީޕީގެ ރެސިޑެންސް ކޯޑިނޭޓަރު ކެތްރިން ހޭސްވެލްއެވެ.
ރަސްމިއްޔާތުގައި ވާހަކަފުޅު ދައްކަވަމުން ޖީހާން ވިދާޅުވީ މި ޕްރޮގްރާމް މެދުވެރިކޮށް މިހާތަނަށް 171 އަންހެނުން ސިޔާސީ ދާއިރާއަށް ތައްޔާރުކުރެވިފައިވާ ކަމަށެވެ. ޕްރޮގްރާމް ފަރުމާ ކުރެވިފައިވަނީ ސިޔާސީ ދާއިރާގައި ހަރަކާތްތެރިވާން ބޭނުންވާ އަންހެނުންގެ ޤާބިލުކަން އިތުރު ކުރުމަށް ކަމަށާއި ސިޔާސަތުތައް ކަނޑައެޅުމުގައި ބަސް ބުނާ ހިސާބަށް އަންހެނުން ވާސިލްކޮށްދިނުމަށް ކަމަށެވެ.
މި ޕްރޮގްރާމްގެ ފުރަތަމަ ބެޗްގެ ކުރިއަށް ގެންގޮސްފައިވަނީ 12 ފެބްރުއަރީން 18 ފެބްރުއަރީއަށެވެ. 2021 ވަނަ އަހަރާއި 2022 ވަނަ އަހަރު މި ޕްރޮގްރާމް ސީރީޒްގެ 5 ޕްރޮގްރާމެއް ބާއްވާފައިވެއެވެ. ވޭތުވެދިޔަ ޕްރޮގްރާމްތަކުގައި ރާއްޖޭގެ އެކި ކަންކޮޅުތަކުން 116 އަންހެނުން ބައިވެރިވެފައި ވެއެވެ. އަދި ޚާއްސަ އެހީއަށް ބޭނުންވާ 21 މީހަކު ބައިވެރިވެފައިވެއެވެ.
ޕްރެކްޓިސް ޕާލަމެންޓް ސީރީޒްގައި މަދަނީ ތައުލީމުގެ މުހިންމު ބައިތަކާއި ރައްޔިތުންގެ މަޖިލީހުގެ މުހިންމު މަސައްކަތްތަކާއި ގުޅޭގޮތުން މައުލޫމާތު ފޯރުކޮށްދެއެވެ. އަދި ޕްރޮގްރާމްގެ ބައިވެރިންގެ މެދުގައި މަޖިލީޙުގެ ޖަލްސާއެއްގެ ނަމޫނާ މާދިރީއެއް ބާއްވައެވެ.
