ޒިޔަދަމްގެ ހުރިހާ ވާރިސުންވެސް ބޭނުންވަނީ މަރަށް މަރު ހިފަން، މަންމަވެސް މަރުވުމުގެ ކުރިން ބުނެފައި އޮތީ އެގޮތަށް
އެ ނިންމުމުގައި އެއްވެސް މަޖުބޫރުކަމެއް އަދި ނުފޫޒެއް ނެތްކަމަށް ހުރިހާ ވާރިސުންވެސް ބުނޭ
މި މައްސަލާގައި ދައުލަތުން ދައުވާ އުފުލާފައިވަނީ ހީނާވިލާ، މުހައްމަދު ޝަނޫނާއި، ބީޗްވިލާ އަލީ ސިފާމްގެ މައްޗަށް
ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލައިގައި, 7 އަހަރަށްފަހު ކުށް ސާބިތުވާކަމަށް ނިންމާފައިވާއިރު، ޒިޔަދަމްގެ ހުރިހާ ވާރިސުންވެސް މަރަށް މަރު ހިފަން ބޭނުންވާކަމަށް ބުނެފިއެވެ.
ކްރިމިނަލް ކޯޓުގައި މި މައްސަލައާ ގުޅިގެން ދައުވާ އުފުލީ ލ މުންޑޫއަށް ނިސްބަތްވާ މުޙައްމަދު ޝަނޫންއާއި އަލީ ސިފާމްގެ މައްޗަށެވެ. ދެމީހުންގެ މައްޗަށްވެސް އުފުލީ ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދައުވާއެވެ.
އެހެންނަމަވެސް ޤަސްދުމަރު ސާބިތުވެފައިވަނީ ހަމައެކަނި ޝަނޫންގެ މައްޗަށެވެ. ވުމާއެކު ޝަނޫންގެ މައްޗަށް ކުރާ ދައުވާއާ ގުޅިގެން އަދަބު ކަނޑައެޅުމަށްޓަކައި، ވާރިސުންގެ ބަސް ވަނީ ނަގާފައެވެ.
ޒިޔަދަމް މަރުވިއިރު އޭނާގެ މަންމަ ދުނިޔޭގައި ހުރި ނަމަވެސް، އޭނާގެ މަންމަ މިހާރު ވަނީ ނިޔާވެފައެވެ. އެހެންނަމަވެސް އޭނާގެ މަންމަ ދުނިޔޭގައި ހުރިއިރު ފުލުހުންގެ ތަހުގީގަށް ދީފައިވާ ބަޔާނުގައި ބުނެފައިވަނީ، އޭނާ ޒިޔަދަމްގެ މަރަށް މަރު ހިފަން ބޭނުންވާ ކަމަށެވެ.
ޒިޔަދަމްގެ ބައްޕަގެ އިތުރުން، އެއްބަނޑު އެއްބަފާ އަންހެން 5 ކުދިންނާއި އެއްބަނޑު އެއްބަފާ ފިރިހެން އެއް ކުއްޖަކު ހުރެއެވެ.
އަދި އެއްބަފާ ދެ ކުއްޖަކުވެސް ތިބެއެވެ.
އާދިއްތަ ދުވަހު ކްރިމިނަލް ކޯޓުގައި ކުރިއަށް ދިޔަ އަޑުއެހުމަކީ ވާރިސުންގެ ބަސް ނެގުމަށް ބޭއްވި އަޑުއެހުމެކެވެ. އެގޮތުން ދައުލަތުން ވަނީ ޒިޔަދަމްްގެ މަރާއި ގުޅިގެން ވާރިސުންނަށް ނިންމިދާނެ ގޮތްތައް ކިޔާދީފައެވެ.
އޭގެ ތެރޭގައި 3 ގޮތެއް ހިމެނޭއިރު، އެއް ގޮތަކީ ޤިޞާސް ނުވަތަ މަރަށް މަރު ހިފުމެވެ. ދެން އޮތް ގޮތަކީ ޤިޞާސް މާފު ކުރުމާއެކު މަރުގެ ދިޔަ ނެގުމެވެ. ތިން ވަނަ ގޮތަކީ ޤިޞާސްއާއި މަރުގެ ދިޔަވެސް މާފު ކުރުމެވެ.
ޒިޔަދަމްގެ ހުރިހާ ވާރިސުންވެސް ބުނެފައިވަނީ އެމީހުން މަަރަށް މަރު ހިފަން ބޭނުންވާ ކަމަށެވެ. އެ ނިންމުމުގައި އެއްވެސް މަޖުބޫރުކަމެއް އަދި ނުފޫޒެއް ނެތްކަމަށް ހުރިހާ ވާރިސުންވެސް ބުނެއެވެ.
ޝަނޫންގެ މައްޗަށް ޤަސްދުމަރު ސާބިތުވި ނަމަވެސް، ސިފާމްގެ މައްޗަށް އެ ކުށް ސާބިތު ކުރެވޭ މިންވަރަށް ކުށުގެ ރުކުންތައް ދައުލަތުން ސާބިތުކޮށްދެވިފައެއް ނުވެއެވެ.
އެހެންނަމަވެސް، ސިފާމްވެސް މި އަމަލު ހިންގުމުގައި އެހީތެރިވެފައިވާކަމާއި، ޒިޔަދަމްއާއި މަރާމާރާރީ ހިންގުމުގެ އިތުރުން، އޭނާ މަރުވެގެން ދިޔަ އަމަލުތައް ހިންގުމުގައި މަގުފަހި ކޮށްދީފައިވާކަން ޝަރީއަތަށް ހުށައެެޅިފައިވާ ހެކިތަކުން ސާބިތުވާކަމަށް ގާޒީ ވިދާޅުވިއެވެ.
ވުމާއެކު، ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގައި ބައިވެރިވުމުގެ ކުށް އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާކަމަށް ގާޒީ ނިންމެވިއެވެ.
ދެން އޮންނާނީ މި މައްސަލައިގެ އަދަބާ ގުޅޭގޮތުން ވާހަކަ ދެއްކުމާއި، ޙުކުމް ކުރެއްވުމެވެ. މައްސަލަ ބައްލަވާ ގާޒީ ވިދާޅުވީ، އަންނަ ހަފްތާގައި އެ އަޑުއެހުން ބާއްވަވާނެ ކަމަށެވެ.
ކްރިމިނަލް ކޯޓުގައި މި މައްސަލަ ބައްލަަަވަނީ ގާޒީ އިސްމާއިލް ޝަފީއުއެވެ.
