ނޮޓިންގހަމް ފޮރެސްޓް އަތްދަށުވެ, އަލުން ލީގު ތާވަލްގެ އެއްވަނައަށްދާން ލިބުނު ފުރުޞަތު މެންޗެސްޓަރ ސިޓީން ނަގާލައިފިއެވެ.

އާސެނަލް މެޗުން މޮޅުވެއް, އެއްވަނައަށް ޖެހިލާފައިވަނިކޮށް އެނބުރި އެމަޤާމަށް ދާން ސިޓީއަށް ފުރުޞަތު އޮތީ ނޮޓިންގހަމް ފޮރެސްޓް ބަލިކޮށްގެންނެވެ. އެކަމަކު ފުރަތަމަ ލީޑްވެސް ހޯދާފައިވަނިކޮށް މެޗު ނިމުނީ އެއްވަރު ވެގެންނެވެ. ފުރަތަމަ ހާފް ނިމެނިކޮށް ބާނާޑޯ ސިލްވާ ޖެހި ލަނޑުން ސިޓީން ކުރި ހޯދިއެވެ. އެކަމަކު އިތުރު ފުރުޞަތެއްގެ ބޭނުމެއް ސިޓީއަށް ނުކުރެވުނެވެ. ބަދަލުގައި ފެނުނީ މެޗު ނިމެން ހަ މިނެޓަށް ވެފައިވަނިކޮށް ވޫޑް ލަނޑު ޖަހާ ސިޓީ މޮޅުވިޔަދުނީ ހިފެހެއްޓި ތަނެވެ.

މެޗަށްފަހު ސިޓީގެ ކައިލް ވޯކާ ބުނީ ޓީމްގެ ފަރާތުން ފެނުނީ ބަލައިގަނެވޭނެފަދަ ކުޅުމެއް ނޫންކަމަށެވެ. އަދި ނަތީޖާއަކީވެސް ބަލައިގަނެވޭނެ ނަތީޖާއެއް ނޫންކަމަށެވެ. ގޯލް ކުރިމަތިން ލިބޭ ފުރުޞަތުތަކުގެ ބޭނުން ކުރުމުގައި މިހާރަށްވުރެ ހުށިޔާރުވާންޖެހޭކަން ކައިލް ވޯކާ ފާހަގަކުރިއެވެ. ނޮޓިންގހަމް ފޮރެސްޓްގެ ގޯލް ބަލަހައްޓަމުން ދަނީ ޕީއެސްޖީގެ ލޯނު އެއްބަސްވުމެއްގެ ދަށުން ކުޅެމުން އަންނަ ކޭލާ ނަވާސްއެވެ. އޭނާއަކީ ރެއާލް މެޑްރިޑްގައިވެސް ކާމިޔާބީތައް ހޯދި ކީޕަރެކެވެ.

މެޗުން މޮޅުނުވުމުން ސިޓީ ދެވަނާގައި އޮތީ 24 މެޗުން 52 ޕޮއިންޓާއެކުއެވެ. އެއްވަނާގައި އާސެނަލް އޮތީ 23 މެޗުން 54 ޕޮއިންޓާއެކުއެވެ.