އިނގިރޭސި ކުލަބު ޗެލްސީގެ ސަޕޯޓަރުންގެ ހިތްހަމަނުޖެހުން ކޮޅުންލައި ކުޅުންތެރިންނާއި ކޯޗަށް ފާޅުގައި މަލާމާތް ކުރަން ފަށައިފި އެވެ.

އަމިއްލަ ދަނޑުގައި ރޭ ސައުތެމްޓަން އަތުން 1-0 އިން ބަލިވުމުން ޗެލްސީ ވަނީ 31 ޕޮއިންޓާއެކު 10 ވަނަ އަށް ވެއްޓިފަ އެވެ. ކޯޗު ގްރެހަމް ޕޮޓާގެ ކޯޗުކަމުގައި ކުޅުނު 17 މެޗުގެ ތެރެއިން ޗެލްސީ މިހާތަނަށް މޮޅުވެފައިވަނީ އެންމެ ފަސް މެޗުންނެވެ. މިހެންވެ ސަޕޯޓަރުން ވަނީ އޭނާ ނޫން ކޯޗަކު ބޭނުންވާ ކަމަށް މެޗަށް ފަހު އަޑުގަދަކޮށް ބުނަން ފަށައިފަ އެވެ.

ޓީމު ވަރުގަދަ ކުރުމަށް ޗެލްސީގެ އާވެރިޔާ ޓޮޑް ބޮއެލީ މިހާތަނަށް 600 މިލިއަން ޕައުންޑް ހަރަދުކޮށް މޮޅު ކުޅުންތެރިން ގެނައި ނަމަވެސް އަދި އެދެވޭ ކާމިޔާބީއެއް ނުހޯދެ އެވެ. ރޭގެ މެޗުގައި ސަޕޯޓަރުންގެ ހިތްހަމަނުޖެހުން އެންމެ ބޮޑަށް އަމާޒުވި އެއް ކުޅުންތެރިއަކީ މިޑްފީލްޑަރު މެންސަން މައުންޓެވެ. ޗެލްސީގެ އައު ކޮންޓްރެކްޓްގައި ސޮއިކުރުމާމެދު ވަކިގޮތެއް ނުނިންމައި ހުރި ކުޅުންތެރިޔާ އާއި ދެންތިބި ހުރިހާ ކުޅުންތެރިން ވެސް މިހާރަށްވުރެ ރަނގަޅަށް ކުޅެންޖެހޭ ކަމަށް ސަޕޯޓަރުންދެކެ އެވެ.

ޗެލްސީ މިހާރު އޮތް ފޯމަށް ބަލާއިރު މި ސީޒަން ނިމޭއިރު އަންނަ ސީޒަނުގައި ޔޫރަޕުގެ އެއްވެސް މުބާރާތަކުން ޖާގަ ނުލިބިދާނެ ކަމުގެ ބިރު އޮތުމަކީ ވެސް ސަޕޯޓަރުގެ ކަންބޮޑުވުމެކެވެ.

މެޗަށް ފަހު ޕޮޓާ ބުނީ ކުށްވެރިއަކީ އޭނާ ނޫންކަމަށާއި ނަމަވެސް ބަލިވުމުން ސަޕޯޓަރުން ހިތްހަމަނުޖެހޭނެ ކަމަށެވެ.

އޭނާ ބުނީ ޗެމްޕިއަންސް ލީގުގައި ޖަރުމަނުގެ ބޮރޫޝިޔާ ޑޯޓްމުންޑް އަތުން ބަލިވި މެޗާއި ރޭ ސައުތެމްޓަން އަތުން ބަލިވި މެޗުގައި ވެސް ފުރަތަމަ ހާފުގައި ރަނގަޅަށް ނުކުޅެވުނު ކަމަށެވެ. އަދި ފަހު ހާފުގައި ކުޅުން ރަނގަޅު ކުރި ނަމަވެސް އެއީ ފުދޭ ވަރެއްނޫން ކަމަށެވެ.