ޗެލްސީ ބަލިކޮށް، ފްލަމެންގޯ ގަދަ 16 އަށް

މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގުރޫޕް ޑީ ގައި ޗެލްސީއާ ދެކޮޅަށް ކުޅުނު މެޗުން ވެސް މޮޅުވެ، ފްލަމެންގޯ އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

މުބާރާތުގައި މި ދެ ޓީމު ކުޅުނު ފުރަތަމަ މެޗުން ވެސް ވަނީ މޮޅުވެފަ އެވެ. ހުކުރު ދުވަހުގެ ރޭ ޗެލްސީއާ ދެކޮޅަށް ކުޅުނު މެޗު ފްލަމެންގޯ އިން ކާމިޔާބު ކުރީ 3-1 އިންނެވެ. އެއީ މެޗުގައި ޗެލްސީ އިން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ތިން ލަނޑު ޖަހައިގެންނެވެ.

މެޗު ފަށައިގެން 13 ވަނަ މިނެޓުގަައި ޗެލްސީ އިން ވަނީ ލަނޑު ޖަަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޕެޑްރޯ ނެޓޯ އެވެ. އެއީ ފްލެމެންގޯގެ ފަހަތުން ހެދުނު ގޯހެއްގެ ފައިދާ ނަގައި، ލިބުނު ފުރުސަތުގައި އޭރިޔާ ތެރެއަށް ވަދެ ތިރި ތިރިން ގޯލަށް ބޯޅަ ވައްދާލައިގެން އޭނާ ޖެހި ލަނޑެކެވެ.

ނަމަވެސް މެޗުގެ 62 ވަނަ މިނެޓުގައި ފްލަމެންގޯ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ބްރޫނޯ ހެންރީކޭ ޕިންޓޯ އެވެ. އެއީ ޗެލްސީގެ އޭރިޔާ ތެރެއިން ލިބުނު ބޯޅައެއް އެއް ފަހަރުން ގޯލަށް ވައްދާލައިގެން އޭނާ ޖެހި ލަނޑެކެވެ.

އޭގެ ތިން މިނެޓު ފަހުން ފްލަމެންގޯ އިން ވަނީ ދެ ވަނަ ލަނޑެއް ޖަހައި މެޗުގައި ލީޑު ނަގައިފަ އެވެ. އެ ޓީމަށް ލިބުނު ކޯނަރެއްގައި ހުރަސްވި ބޯޅަ ޕިންޓޯ ބޮލުން ޖައްސާލި ވަގުތު ގޯލަށް ވައްދާލައިގެން އެ ލަނޑު ޖެހީ ޑެނީލޯ އެވެ.

މެޗުގެ ފުރިހަމަ ވަގުތު ހަމަވާން ހަތް މިނެޓަށް ވެފައި ވަނިކޮށް ފްލަމެންގޯ އިން ވަނީ ތިން ވަނަ ލަނޑެއް ޖަހައި އިތުރަށް ލީޑު ފުޅާ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ވަލާންސް ޔަން އެވެ.

މޮޅާއެކު ފްލަމެންގޯ އިން ގަަދަ 16 އިން ޖާގަ ހޯދީ އެ ޓީމު ކުޅުނު ދެ މެޗުން ވެސް މޮޅުވެ ހަ ޕޮއިންޓާ އެކު އެވެ. ފްލަމެންގޯ އަތުން ބަލިވި ޗެލްސީ އޮތީ ދެ ވަނައިގަ އެވެ.