ފީފާ ކުލަބު ވޯލްޑް ކަޕްގެ ކުއާޓާ ފައިނަލްގައި ޕަލްމެއިރާސްގެ މައްޗަށް ކުރި ހޯދައި، ޗެލްސީ އިން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

އެމެރިކާގެ ލިންކޮން ފިނޭންޝިއަލް ފީލްޑްގައި ހޮނިހިރު ދުވަހުގެ ފަތިހު ކުޅުނު މެޗު ޗެލްސީ އިން ކާމިޔާބު ކުރީ 2-1 އިންނެވެ. މެޗުގައި ޗެލްސީ އިން ކުރި ހޯދާފައި ވަނިކޮށް، ޕަލްމެރިއާސް އިން ނަތީޖާ ހަމަހަމަ ކުރި އެވެ. މެޗުން ޗެލްސީ މޮޅުވީ ފަހު ވަގުތުގެ ތެރޭގައި ޕަލްމެއިރާސްގެ ކުޅުންތެރިޔެއްގެ އަތުން ބައި ކޮޅަށް ވަތް ލަނޑުންނެވެ.

ޗެލްސީ އިން ވަނީ މުބާރާތުގެ ގަދަ 16 ވަނަ ބުރުގައި ބެންފީކާއާ ދެކޮޅަށް ކުޅުނު މެޗުން މޮޅުވެފަ އެވެ. އަދި ގަދަ 16 ވަނަ ބުރުގައި ޕަލްމެއިރާސް އިން ވަނީ ބޮޓަފޯގޯއާ ދެކޮޅަށް ކުޅުނު މެޗުން މޮޅުވެފަ އެވެ.

މެޗު ފަށައިގެން 16 ވަނަ މިނެޓުގައި ޗެލްސީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ކޯލް ޕާމާ އެވެ. އެ ލަނޑު ޖަހަން ޕާމާ އަށް ފުރުސަތު ތަނަވަސްކޮށްދިނީ ޓްރެވޯ ޗަލޯބާ އެވެ.

މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ޕަލްމެއިރާސް އިން ވަނީ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ. އެ ލަނޑު ޖެހީ އެސްޓެވާއޯ ވިލިއަމްސް އެވެ. އެއީ ރިކާޑް ރިއޯސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގައި ލީޑު ނަގަން ޗެލްސީގެ ޕާމާ އަށް ލިބުނު ފުރުސަތު ކާމިޔާބު ކުރެވޭ ގޮތެއް ނުވި އެވެ. އޭގެ ފަހުން، މެޗުގެ ފުރިހަމަ ވަގުތު ހަމަވާން ހަތް މިނެޓަށް ވެފައި ވަނިކޮށް ދެ ވަނަ ފަހަރަށް ޗެލްސީ އަށް ލީޑު ލިބުނީ ޕަލްމެއިރާސްގެ ގޯލު ކީޕަރު ވެވާޓަން އަތުން ބައި ކޮޅަށް ވަތް ލަނޑުންނެވެ. އެއީ މަލޯ ގުސްޓޯ ހުރަސް ކުރި ބޯޅަ މަތަ ކުރަން އުޅުމުގެ ތެރޭގައި އޭނާ އަތުން ބައި ކޮޅަށް ވަދެގެންނެވެ.

މުބާރާތުގެ ސެމީ ފައިނަލްގައި ޗެލްސީ ނިކުންނާނީ ފްލުމިނެންސޭއާ ދެކޮޅަށެވެ.