އެންމެ ސިނގިރޭޓު ފޮށްޓެއް އެތެރެކުރިޔަސް ޑިއުޓީ ނަގާ ގޮތައް ހަދަނީ
5 ޖުލައި 2024 | ހުކުރު 11:44އަމިއްލަ ބޭނުމަށް ގެންނަ ތަކެއްޗަށް ވެސް އޮގަސްޓް 1ން ފެށިގެން ޑިއުޓީ ނަގަނީ
ކަސްޓަމްސް ބިލްޑިންގެ ބޭރުން ނަގާފައިވާ ފޮޓޯ އެއް
ރާއްޖެ އަށް އެތެރެ ކުރާ އެންމެ ސިނގިރޭޓް ފޮއްޓަކަށްވެސް ޑިއުޓީ ނަގާ ގޮތައް ހަދާ، ރާއްޖެ އެތެރެ ކުރާ ތަކެއްޗަށް ލުއި ދެމުން ދާ އުސޫލް ބަދަލުކޮށް، ޑިއުޓީ ނަގާ ގޮތައް މޯލްޑިވްސް ކަސްޓަމްސް އިން ގަވައިދު ބަދަލު ކުރަން ނިންމައިފިއެވެ.
ދައުލަތުގެ މީޑިއާ އަށް މައުލޫމާތު ދެއްވަމުން ބުރާސްފަތި ދުވަހުގެ ރޭ، މޯލްޑިވްސް ކަސްޓަމްސްގެ ޑެޕިއުޓީ ޗީފް ސުޕްރިންޓެންޑެންޓް އަޙްމަދު ނިޔާޒް ވިދާޅުވީ، އަމިއްލަ ބޭނުމަށް ގެނައި ކަމުގައި ވިޔަސް އެއްގަމު އުޅަނދާއި ކަނޑު އުޅަނދު އެތެރެކުރުމުގައި މިހާރު ދޭ އިނާޔަތް ކަނޑާލަން ސަރުކާރުން ނިންމާ އެތަކެތިން ޑިއުޓީ ނަގާ ގޮތައް ހަމަޖައްސަމުންދާ ކަމަށެވެ.
ނިޔާޒް ވިދާޅުވީ، ސިނގިރެޓުގެ އިތުރުން ވޭޕް ކުރުމަށް ބޭނުންކުރާ ތަކެއްޗާއި، އެނަރޖީ ޑްރިންކް އެތެރެ ކުރުމުގައި ދެމުންދިޔަ އިނާޔަތްތައް ކަނޑާލުމަށް ވެސް ނިންމާފައިވާ ކަމަށެވެ.
މިބާވަތްތަކުގެ އިތުރުން އަމިއްލަ ބޭނުންތަކަށް އެތެރެ ކުރާ އެއްފަހަރު ބޭނުންކޮށްފައި އެއްލާލާ ޕްލާސްޓިކްގެ ބާވަތްތައް ވެސް އިނާޔަތް ކަނޑާލާ ތެކެތީގެ ތެރޭގައި ވަނީ ހިމަނާފައެވެ.
ކަސްޓަމްސްގެ އޮފިޝަލް ވިދާޅުވީ، އަންނަ އޯގަސްޓް މަހުގެ ފުރަތަމަ ދުވަހުން ފެށިގެން މި ގެނައި ބަދަލުތަކާ އެއްގޮތައް އަމަލު ކުރުމަށް ނިންމާފައިވާ ކަމަށެވެ.
ކަސްޓަމްސް އިން ބައެއް ތަކެތި ރާއްޖެ އެތެރެ ކުރުމުގައި ދެމުން އައި ލުއި ކަނޑާލަން ނިންމީ، ރާއްޖޭގެ ތިމާވެއްޓާއި ދިވެހީންގެ ޞިއްޙަތު ސަލާމަތްކުރުމަށް އަޅަންޖެހޭ ފިޔަވަޅެއްގެ ގޮތުގައި ކަމަށް ކަސްޓަމްސްގެ އޮފިޝަލް ހާމަ ކުރި ނަމަވެސް، މި ކަމުގައި ފާޑުކީ ބައެއް އާންމު ފަރާތްތަކުން ބުނެފައިވަނީ، މިއީ ދައުލަތުގެ އާމްދަނީ އިތުރު ކުރަން ގެންނަ ބަދަލެއް ކަމުގައެވެ.
