އަޓްސޫގެ ވަކިވުމާއެކު ފުޓުބޯޅަ އާއިލާގެ ތައުޒިޔާ އޭނާގެ އާއިލާ އަށް
19 ފެބުރުއަރީ 2023 | އާދީއްތަ 02:13އޭގެ ތެރޭގައި ކުރީގެ މަޝްހޫރު ކުޅުންތެރިންނާއި، ފުޓުބޯޅަ ކުލަބުތައް ވެސް ހިމެނޭ
ކްރިސްޓިއަން އަޓްސޫ
ތުރުކީ އާއި ސީރިއާ އަށް އައި ބިންހެލުމުގައި ވެއްޓުނު އިމާރާތެއްގެ ތެރޭގައި ތާށިވެ، މަރުވި ކްރިސްޓިއަން އަޓްސޫގެ އާއިލާ އަށް ފުޓުބޯޅަ އާއިލާ އިން ތައުޒިޔާ ފޮނުވަން ފަށައިފި އެވެ.
ފެބްރުވަރީ މަހުގެ ހަ ވަނަ ދުވަހު އައި ބިންހެލުމުގައި އެތައް ބަޔަކު ގެއްލުނުއިރު، އޭގެ ތެރޭގައި އަޓްސޫ ވެސް ހިމެނެ އެވެ. އޭނާ ހޯދުމުގެ މަސައްކަތް އެކި ފަރާތްތަކުން ކުރަމުން އަންނަނިކޮށް، ހޮނިހިރު ދުވަހު އޭނާ ފެނުނީ މަރުވެފައި އޮއްވާ އެވެ. އެއާއެކު ފުޓުބޯޅައިގައި ހަރަކާތްތެރިވާ އެކި ފަރާތްތަކުން ވަނީ އެކަމުގެ ހިތާމަ ފާޅުކޮށް، އަޓްސޫގެ އާއިލާ އަށް ތައުޒިޔާ ފޮނުވައިފަ އެވެ. އޭގެ ތެރޭގައި ކުރީގެ މަޝްހޫރު ކުޅުންތެރިންނާއި، ފުޓުބޯޅަ ކުލަބުތައް ވެސް ހިމެނެ އެވެ.
ޗެލްސީގެ ފުޓުބޯޅަ ލެޖެންޑް ޖޯން ޓެރީ ވެސް ވަނީ އަޓްސޫ މަރުވުމާ ގުޅިގެން ހިތާމަ ފާޅުކޮށް، ތައުޒިޔާ ފޮނުވައިފަ އެވެ. މީގެ އިތުރުން މާކް ޑޯލަސް ބުނީ އަޓްސޫ ވަނީ ޔަތީމުވެފައިވާ ކުދިންނާއި، މައިންބަފައިން ދޫކޮށްލާފައިވާ ކުދިންގެ އިތުރުން އަދި ޓްރެފިކް ކުރުވޭ ކުދިންނަށް އެހީވުމަށް ޗެރިޓީއެއް ޤާއިމުކޮށްފައި ކަމަށެވެ. އޭނާ ބުނީ ގާނާގެ ނިކަމެތި ގައިދީންނަށް އެހީވުމަށް އެތައް ހާސް ޕައުންޑެއް ހަދިޔާކޮށް، އެމީހުންގެ ފުރާނަ ސަލާމަތް ކުރުމުގެ އޮޕަރޭޝަންތަކަށް ފައިސާ ދެއްކީ ވެސް އަޓްސޫގެ އެހީތެރިކަމާއެކު ކަމަށެވެ. އެކަން އާންމުންގެ ތެރޭގައި އެހާ ބޮޑަށް ދައްކަން އަޓްސޫ ބޭނުންނުވި ކަމަށް ވެސް އޭނާ ބުންޏެވެ. މީގެ އިތުރުން އަޓްސޫ އަކީ މޮޅު ފުޓުބޯޅަ ކުޅުންތެރިޔެެއް ކަމަށާއި، ނަމަވެސް އެއީ އެއަށްވުރެ މާ ރަނގަޅު މީހެއް ކަމަށް ވެސް ބުންޏެވެ.
މީގެ އިތުރުން ގާނާގެ ކުޅިވަރު ނޫސްވެރިޔަކު ބުނީ، އޭނާ ހަނދާން ވަނީ މީގެ ދެ އަހަރު ކުރިން އަޓްސޫ ގާނާ އަށް ގޮސް، އޭނާގެ އަމިއްލަ ޚަރަދުގައި އެތައް ފުޓުބޯޅަ ބޫޓެއް ޗެރިޓީ އަށް ހަދިޔާ ކުރި ދުވަސް މަތިން ކަމަށެވެ. މީގެ އިތުރުން އެ ނޫސްވެރިޔާ ބުނީ ހަގީގަތުގައި ވެސް އަޓްސޫ އަކީ ގާނާގެ މުޖުތަމައު ހަނދާން ވާން ކުޅުންތެރިޔެެއް ކަމަށާއި، އަޓްސޫގެ ވަކިވުމަކީ ވަރަށް ހިތާމަ ހުރި ކަމެއް ކަމަށެވެ.
ޗެލްސީ ފުޓުބޯޅަ ކުލަބުން ބުނީ އަޓްސޫގެ ހިތާމަވެރި ވަކިވުމުން އެ ކުލަބުގެ އެންމެން ތިބީ ހާސްވެފައި ކަމަށެވެ. އެ ކުލަބުން ބުނީ އެމީހުންގެ ޚިޔާލުތަކާއި، ލޯބި އަޓްސޫގެ އާއިލާ އާއި ރަހުމަތްތެރިންނަށް ފޯރާނެ ކަމަށެވެ. ނިއުކާސަލް ޔުނައިޓެޑުން ބުނީ އަޓްސޫ މަރުވިކަން އެނގުމުން އެމީހުންނަށް ވެސް ވަރަށް ބޮޑު ހިތާމައެއް ލިބުނު ކަމަށާއި، އަޓްސޫ އަކީ ހުނަރުވެރި އަދި ޚާއްސަ ކުޅުންތެރިޔެއް ކަމަށެވެ.
އުމުރުން 31 އަހަރުގެ އަޓްސޫ މަރުވިއިރު އޭނާ ކުޅެމުން އައީ ތުރުކީގެ ކުލަބަކަށެވެ.
